MARK 6 - Akthar Trongirhna (BSI)

Jisu ta Najareth in Loulounoh ei

¹ Amah in ohchunnata sehsa che amah ramboom talla thlengsa; mahche aroi inkho amahta anjuihpei.

² Che amah in sabat nia sinakok ah matheih amthronpei; che amah trongta aktheih ei in salungkhoua anroua insonsei, “Ramnata mah vachah i alohme? Jaknang lousingta aphahmeio? Jaknang salungkhouna thlouta akut a ammeio?

³ Mah i thingchal mii Meri asa kupa, Jems leh Joses mahche Judas leh Simon vaa an uhte khatkho amah asarva inihsoh inruuijou mii khanohme?” Cheva amlung amihaangpei.

⁴ Che Jisu in ankuunga asonei, “Amah ramboom khop noh a, amah unao pasa ankaar akho, mahche ataploikuung khop noh a, ringraan inkho amahta injahnohsei.”

⁵ Cheva amah in salungkhouna thlou mah khanna tlohnohsa, akna mii arouta anchunga akut jamma amthratei.

⁶ Che anmah in amilotnoh khanna alamveia salungkhousa. Che amah in khuu khuua matheih a sehsa.

Jisu in Aroi Somleinihta Amthlah ei

⁷ Che amah in somleinihta aongei, che innih innih a mathlah amthronpei, mahche ankuunga akseengnoh li manom ancheknatu akchek amneh amlannei.

⁸ Che sungrolh inkhat khopta, tolkho, thongkho, khapatkho, baobehkho nannih in rapkheitla nansehna a jakhatkho phurh janoh tuta amah in akchaak ei;

⁹ chuta kekhraangva chuungve che lungluut innih maruuinohve.

¹⁰ Che amah in ankuunga asonei, “Amun khatta mathlah a nansehnohmiil, nannih in nantlungna innkhan amve

¹¹ Che amun aktleitlei a nannihta nanisoongnoh eile, mahche nantrongta rungaidah eile, nannih in amunkhata nanmahlaia, nankehna uphulkha mathiimma mahve alamva trongirhna in anmahta indahna veitu.”

¹² Chunna anmah in sehsei mahchuche miita rilthlengnatu trong anraanpei.

¹³ Che anmah in khousaar tam aminom, khatkho akna miita thao antei in anmah in thraei.

Aklup John in Thi

¹⁴ Kurung Herot in mahchu atheihpei; alamva Jisu akming inthangsa. Arouin anson, “Aklup John kha thinata ringsa; mah churella amah atuui makhei in achunga thlou atlohpei.”

¹⁵ Chuta aktlei in anson, “Mah i Elijah.” Chela aktlei in anson, “Mah i Ringraan inkhat, amlui ringraan inkhat nangjim.”

¹⁶ Chuta Herot in mahchu atheihlai amah in ason, “Keiin akang kitan John ta ringsa.”

¹⁷ Alamva Herot in mii mathlah a John ta amsuur, anao Philip akmei Herodia relna makaanga simma asih; alamva amahta apaalpi.

¹⁸ Alamva John in akuunga ason, “Nangin ninao akmeita niloh i trongsuur in janoh.”

¹⁹ Che Herodia in akuunga atlohthlou rella indahsa, che athatja hangta that cheknohsa.

²⁰ Alamva Herot in John ta trihsa, amah in John i akchim mahche akseeng mii ta arom, che amah in kalla asihpei, amah in akuungnata arungeih laiva, amah in khalmo inchoisa; che aroomthok nanga arungeih.

²¹ Chuta Herot apokni a amah in kurung koolna mii, che phrangkiei, mahche Kalili na aklokeita buh doonnatu taancha thlengsa.

²² Alamva Herodia asakumei in luut a laamsa, amah in Herot leh Rapkheina akthleng mii eita anril ampelpei; che kurung in kumei kuunga ason, “Jangmekhat slakho nangin nikditchu keinih chele, keiin kamlan uche.”

²³ Che amah in akuunga trongchet amlanpei, “Jangmekhat slakho nangin keinih chele, kamlan uche, kei kuruung huunna tangkhai slakho kamlan uche.”

²⁴ Che amah in apaalla inthruhsa, che anukuunga atihpei, “Jaknang pootta kinih usame?” Che anuin akuunga ason, “Aklup John vaa akang.”

²⁵ Che amah in innot a kak hanga kurung kuunga luutsa, che aruipei, “Keiin nikuunga kinihche mah chuvah intha a aklup John vaa akangta tarpeng chunga sih a kamlanro.”

²⁶ Che kuruungchu kaa ralla kilaalpeita insiirsa, chuta amah trongchet leh rapkheina mii anthleng in alamveia amah trongchu akuunga khoi indahsa.

²⁷ Che kak hanga kuruung in amah akngaak raalmiita amthlahpei che aklup John akangta thlennatu jathang amlanpei. Amah in sehsa che simnata akangchu atanpei.

²⁸ Che amah akangchu tarpeng chunga athlenpei, che kumeikuunga amlanpei; che kumei in anukuunga amlanpei.

²⁹ Aroi in mahchuta antheih in, anmah in thlengseia aruungchu anlohpei, che rusuunna anphuumpei.

Jisu In Mii Akpul Rangata Amsaak

³⁰ Raangroi in Jisu kuunga inlengsei, che anmah in antlohthlou anaamteta akuunga ansonpei.

³¹ Che amah in ankuunga asonei, “Nanroua houla intheihnanoh amunna seh a lai kak inngaivesa.” Alamva aktam in seh ei thlengei, che anmah in buh ansaakna tukho sangnohsei.

³² Che anmah in mulia antak anroua houla intheihnoh na a sehsei.

³³ Ipekva miitam in anmah ansehnachu anmuhpei, che anmahta anrompei, cheva anmah in khuupii khuupiinata tlaanna sehsei, che anmahchung matsah a loutlungsei.

³⁴ Amah in tuiipaal annaisoh miitam inlomma amuhpei, che amah in ankuunga arilvol hangsei, alamva anmahva sadamkem amnoh sadam nangjimsei; che amah in ankuunga khalmo tam matheih amthronpei.

³⁵ Che mahchu athil inva, aroi in thlenga akuunga ason, “Mah amun i houla intheihlou che pungi ipekva thilsa;

³⁶ mathlah eirosa anmah ramboomma che khuu khuu avella ansehche antaktu saakphu ste slakho leia ansaaknatu.”

³⁷ Chuta amah in ankuunga amsangei, “Saakphu ste ankuunga malaneive.” Che anmah in akuunga asonei, “Kannih in seh a denari reijanih chaangna tol kanleiche ansaaknatu ankuunga kamilan usame?”

³⁸ Che amah in ankuunga asonei, “Tol jikcha jaomang choume? Seh choulaia anve.” Che anmah in antuuklaia asonei, “Tol ranga leh nga innih.”

³⁹ Cheva anmah in loom loom veia meiphulchung inboknatu annaamta jathang amlanpei.

⁴⁰ Chunna anmah in loom loom veia reija, che sopnga veia inboksei.

⁴¹ Che tol ranga leh nga innihkha alohche amah in ringramting intouva anche, doi amlanpei, mahche tolkha akhoihche miinaam kuunga semnatu aroikuung amlanpei.

⁴² Che annaam in ansaakche anvon invahsei.

⁴³ Che anmah in anvui anvi luktoong somleinih amitlonpei, che ngakho injaosa.

⁴⁴ Che tol aksaa eichu akpul ranga ei.

Jisu in Tuiichunga Seh

⁴⁵ Kak hanga amah in aroieita mulisuung amkallei che amah amaa a aktleitong Bedsaida a aloumaseh ei, amah in miitamta amthrin suungna.

⁴⁶ Che anmahta amthlahche aknua, amah in muulchunga ngennatu kalsa.

⁴⁷ Che khulouhram athleng inva, mulichu tuiiboom alaia amsa, che amah akroua tuiikomma amningsa.

⁴⁸ Che amah in saraalla insuulla ansehchu amuh ei, alamva thli in anmahtonga amratpei, che khulouh anna manlivak aktlaklaia, tuiiboom chunga seh a amah in ankuunga thlengsa. Anmahta ralla mahtangei ta amdon.

⁴⁹ Chuta anmah in tuiiboom chunga seh a thleng anmuh in kukthlata thleng inaita amidonpei, che trap a ongsei;

⁵⁰ alamva annaam in amahta anmuh in intrisei, chuta kak hanga amah in ankuunga asonei, “Nanril liinve, keisang; intrinohve.”

⁵¹ Che anmahsoh inruuia muli chuungsei cheva thliraangkho inngaisa. Cheva anmah in salungkhou khemsei,

⁵² alamva anmah in tol relna bahap tlanoh eichuta anmah anril trangei.

Kenesaret ah Jisu in Akna Amthrat

⁵³ Che anmah in ohchuta anvancheva Kenesaret ramma thlengsei, che mulita tuiipaalla ansihpei.

⁵⁴ Che anmah in mulinata anthruhsoh, kak hanga mii in amahta anrompei,

⁵⁵ che intongpi ramtonga tlaansei che aknaeita thlen amithronpei.

⁵⁶ Che amah in athlengna makheia, khuu khuua, khuuboom khuuboomma, nohle ramboom ramboomma mahche keithiil keithiilla aknaeita amthratei, che amahta intuukpia amah apuunrei slakho akpaleita amthratei.