MARK 5 - Akthar Trongirhna (BSI)

Thranoh Li Luut Miikhatta Jisu in Amthrat

¹ Anmah in tuiiboomtong Keraseni ramma thlengsei,

² che amah in mulinata anthruhlai akseengnoh li luutmii khat in rusuunnata inthruh amah in antuukpi.

³ Amahva rusuunkaara am; che amahta thirrui akho ankhitta cheknohsei;

⁴ alamva amahta inleng inlenga thirhang leh thirrui akho ankhit, chuta thirruikha angem ngemma pot a akthek, che thirhangkho akir kirra akhoih, che tukhat inkho amahta madam cheknatu anlii amnohsei.

⁵ Khulouh suun rusuunkaara che muulchungah lai amrel amah in ongtlamma am, che akroua lunga inchuk inchuk a am.

⁶ Amah in Jisu ta saraalla aheimuh in tlaanna amahta amthruunpei;

⁷ che amah in arool inkaanga onga ason, “Akthloirem Ringpu vaa Asa kupa Jisu keita jangniktlohja angme? Ringpu ming sonna kitihche keita kamlahnohro.”

⁸ Alamva amah in akuungah ason, “Akseengnoh linang miikhannata inthruhro!”

⁹ Che Jisu in amahta arui, “Nikming tume?” Amah in amsang, “Kei kikmingva miitam; alamva kannihva tammung.”

¹⁰ Che ramboom khannata anmahta masehnoh natu amah in anoollei.

¹¹ Mahchunna muul ajaara vok loomkhat athlaisa a ammei;

¹² che anmah in akuungah anoolpei, “Kannihta vokjaam kaara kanluutnatu kanimthlahro.”

¹³ Che amah in ajapei, che akseengnoh li in inthruhseia vokjaam khanna luutsei; che vokvah akpul innihvak ei, antrumna a inlaak a tuiiboomma tlasei che tuiia luut a thisei.

¹⁴ Vokjaamta aksel in tlaanna khuuboom leh ramboomma ansonpei. Che jangthlouta suukmetea an annatu anmah in thlengsei.

¹⁵ Che anmah in Jisu kuungah thlengsei, miitam in anruuipi khousaar chuung miikhan aril chimma puunreikho silh a inbok a am anmuhpei, che anmah in intrisei.

¹⁶ Che akmuh eiin khousaar in anruuipi miile vokjaamkha khatloh a suukmeta antongpei

¹⁷ Che anmah in Jisu ta amah amunni mathlah a anmahso inthringpi ramma asehnatu annoolpei

¹⁸ Anmah in mulisuungah aluut suunga, khousaar in anruuipi mii in amahsoh anruuia asehnatu asonpei.

¹⁹ Chuta amah in indahsa, che akuungah ason, “Inna inlengro, mah chuvah Akpu in nangturel jikcha atlohthloukha che nangta veichahphah namlungsikha, niruul nipai ankuungah sonro.”

²⁰ Che amah in seh a Jisu in amah kuungah jikchahphah a thlou keitlohme tihkha Dekapolis a trong amthronpei, mahchuta akmuh miinaam in salungkhousei.

Jairas Asakumei Khatkho Jisu Apuunta Akpal Kumei

²¹ Che Jisu in inkhattonga mulia inlenga avanlaia, khalmo miitam in amahta anlompei, che amahva tuiiboom araalla amsa.

²² Cheva akming Jairas an ong, sinakok inkhat akpuuichu thlengsa; che amahta amuh in, amah in akehkungah intolhsa.

²³ Che akuunga inruruh a ason, “kei kisakumei naoi i thisamma amsa. Thlengro che nikutkha akuunga jamro, chunna thra aja, che ringtu.”

²⁴ Cheva amahsoh inruuia sehsa. Che khalmo miitam in amahta anjuihpei che anlompei.

²⁵ Che kum somleinih thiiluung kumei khat mahchun rouam.

²⁶ Che maipa tam ankut ah khalmo klah kanang aphah, amah in asih anaam akatkirpei, che thra cheknohsa chuta ralladom asokna veisa.

²⁷ Amah in Jisu rella antong atheih, che miitam in amah aknuta anjuihpei, che apuunta apal.

²⁸ Alamva amah in ason, “Keiin amah puunruta palsanglakho, keita kamthrattung.”

²⁹ Che kak hanga thiitam luungchu inngaisa; che amah in natna riinata thra sang ta amah aruungin antheihpeita.

³⁰ Che Jisu in akuungnata tuui inthruhsa ta arom invah kak hanga miitamting inheia ason, “Tunang in kei puunta apalme?”

³¹ Che amah aroiin akuungah anson, “Miitam invella inkholh i nangkho nimuhche nisonlamang, ‘Tunang in keipal angme?’ ”

³² Tunang in keipalmeta amah in invella a anpei.

³³ Chuta kumei in, keikuungah jangta atlohme tihkha aromin, kumei in trih a inchuunna amaikuungah thlenga intolhsa, che akuungah akchim anaamte atongpei.

³⁴ Che amah in akuungah ason, “Kisa kumeio, nangin namlot kharella nangta namthratpei, leh oia sehrosa, che nang ninatna riikha thrasaso.”

³⁵ Amah in tronga a amsuunga, rampuui inn khannata mii arouin thlenga ansonpei, “Nang nisa kumeikha thisa. Jarelna lulokta ralla namnok mangme?”

³⁶ Chuta anmah in asonta lounoh, Jisu in sinakok akpuui kuunga ason, “Intrinohro, malot paningro.”

³⁷ Che Pitar leh Jems mahche Jems anao John khop noh a tukhat in keita keijuihnohve.

³⁸ Anmah in sinakok akpuui innkhanna anthleng laiva, amah in tranga ongsa.

³⁹ Mah khanna aluutche, ankuunga asonei, “Jarelna nannih in tranga onga traptruui choume? Naoi thinoh chuta inning.”

⁴⁰ Che amahta aminuihpei. Chuta amah in annaamta apaalla amthruh ei, che nao apa leh anu mahche amah in anruuipi eita akhaampei, che nao amna ah luutsei.

⁴¹ Akut a amtuhche akuungah ason, “Nao kumei, keiin nangta kisonche, inthouro.”

⁴² Che kak hanga anmah in salungkhoua sipsei.

⁴³ Che amah in ankuungah klukanga asonei, tukhat in mah i rom janohtu, che amah kuungah saakphu ste malanveta asonei.