MARK 4 - Akthar Trongirhna (BSI)

Chivorhvaa Pandam

¹ Veikhatla amah in tuiiboom apaalla matheih amthronpei. Che miitam in amah kuungah inboomsei, chunna amah in tuiiboom chung mulisuunga luut a inboksa; che mii naamtein tuiiboom apaalla amsei.

² Che amah in pandam veia tam amtheih ei, che amah in matheih a asonei:

³ “Rungaive! Chivorh mii khat in avorhnatu inthruhsa.

⁴ Amah in chita avorh in, chi arouva lamkomma tla, cheva va in thlenga mahchu anchunpei.

⁵ Che arouin lung amnachunga tla, mahchun philtam amnoh taningvah intha a moong, mahchu philtam thuuknoh;

⁶ che kini ahanglaia akjung chom taningvah inhuuisa.

⁷ Chi arouin kuling kaara tla, che kuling inkaanga ahippei, che inrahnohsa.

⁸ Che chi arouin tuklei athratna ah tla a adoon thra inthruhsa, che thra moonga sopthumvak, soprukvak mahche reijavak akrah ralla inrahsa.”

⁹ Che amah in ason, “Tunangkhat in arungeihnatu amkuur am miikhan, rungaiso.”

Pandam Kharelna Amtheihnaei

¹⁰ Che amah in akroua amlai, amahsoh inlomma ak amin somleinihsoh inruuia pandam kharella akuungah anrui.

¹¹ Che amah in ankuungah asonei, “Ringpu vaa kurung huunna anrukta nankuungah kamlanpeichou, chuta apaalla ak am eiva bilam pandamma insonsa;

¹² chunna anmah in atak a muhvah aja chuta romnoh tuei, che anmah in atak a rungaiva aja chuta lou theihnoh tuei; anmah in veikhat inhei tuei, che in iptuei.”

Jisu in Chivorh Pandamta Invuia Amtheihnaei

¹³ Che amah in ankuungah asonei, “Mah pandam i nannih in romnoh sachoume? Chuleva khatloh a pandam anaam nannih in rom nanchek tupotme?

¹⁴ Chivorh mii in trongta avorh

¹⁵ Che lamkomma aktlakha anmahsei, trong anrungeihta seitanin kak hanga thlenga che ankuungah am trongkhata alohpei.

¹⁶ Che mahchunanga lungchungah akvorh eikho, trongchu antheihlaiva, kak hanga roomthoksoh inruuia anloh;

¹⁷ che anmah antak a akjung amnoh a, chuta kakruta moongning, trong irella klah knang nohle chut in athleng laia kak hanga anmah in inriilsei.

¹⁸ Che aktlei in kuling kaara avorhkhasei; anmahva trong arungai khasei,

¹⁹ chuta tukleiram turel insuulsei, che doonkhaal tinga roomthoksei, che aktlei akthloi akditing luutsei che inhalsei a akrah amnoh veisei.

²⁰ Chuta arouva tuklei athratna ah avorhkhasei anmahva trong anrungeihche aklou khasei mahche sopthumvak, soprukvak che reijavak inrahsei.”

Mitton Luktoonga Makhum

²¹ Che amah in ankuungah asonei, “Mittonta ataarna ah taarnoh a luktoong thuuia nohle kukthool thuuia itaar tupotme?

²² Alamva inthuptu jakhatkho amnoh, indangtupot seengning, inruktu jakhatkho amnoh, akvaara thlengtupot seengning.

²³ Tunangkhat in arungeihnatu amkuur am miikhan rungaiso.”

²⁴ Che amah in ankuungah asonei, “Nannih in nantheihchu thratea louve; nannih in olla namilanna chaang khanna olla nanphahtu che thloia nankuungah nanimlantu.

²⁵ Alamva tam ak am ningah ralla amlantu che ak amnoh ningva amah in asihkhakho alohtu.”

Akmoong Chivaa Pandam

²⁶ Che amah in ason, “Ringpu kurung huunna i miikhatvaa chita kuleichungah akthek khanangsa,

²⁷ che khulouh ah intolh a mahche suunna inthoutu, che chi in akekche moongtu, amah in khatloh a moongme romnohtu.

²⁸ Thalei in akroua amthruhning, matsahremma adoon, che inmuum, mahchuche inmuumnata akrah apum vei.

²⁹ Chuta akrahkhan aminlaiva, kak hanga amah in tokoia avaat, alamva chiluh thlengsa.”

Intram Amuvaa Pandam

³⁰ Che amah in ason, “Ringpu kurung huunna i jangso imlakchek ume, nohle jaknang pandam in alamveia ihuuina ume?

³¹ Mah i intram amunang, kuleichungah ivorhlaiva, thaleichung ak am chi anaamtechung andihrem;

³² mahchu ivorhlaiva kmoonga liinsa che inlou naamtechung ralla akliinrem vei, che abaak in liinna inbaak, mahchun marvaanna va in amah aliah anbuh anseem.”

³³ Amah in ankuungah trong veia pandam tam asonei, anmah inkho rungai anchek;

³⁴ amah in ankuungah pandamnoh a routrongnoh, chuta aroi ankuungah ajea amah in bilam anaam amtheih ei.

Jisu in khuleh Thli Amngeih

³⁵ Mahni khulouhram athlengin, amah in ankuungah asonei, “Aktleitonga vanna sehrasei.”

³⁶ Che miitamta amah eiche, anmah in amahta mulisuunga anphurhpei, matsahna nanga aktlei mulikho anmahsoh inruuijoua sehsei.

³⁷ Che aktrang khuleh thli karaangsa, che tuiisolh in mulita amratpei, mahchun mulisuungah tuii luut amthronpei.

³⁸ Chuta amahvah thikhemma insa; che anmah in amithohche akuungah anson, “Lulok, kannihva maangsamsung nangin kanimdonnoh sacheme?”

³⁹ Che amah in anthohche thlita akhaampei, che tuiiboomta ason, “Nangninga leh oi am veiso!” che thliraangchu ingaisa, daichritsa.

⁴⁰ Amah in ankuungah asonei, “Nannih in jarelna intrichoume? Nannihva namilot amnohme?”

⁴¹ Che anmahva intria thonohsei, che khatleh khat insonsei, “Amah i jaknangmii meio? Thlileh tuiiboom inkho atrongta amijuih i!”