MARK 2 - Akthar Trongirhna (BSI)

Jisu in Apangnem thi Miikhatta Amthrat

¹ Nikhat ninih aknua amah in Kaparnaum ah anlengin amah atakva inna amta antongpei.

² Miitam boomsei, chunna anmah turella ohchunna khumkho sangnohsa, inkhaar apaal luungkho sangnohsa; che amah in ankuungah akthra trongta araanei.

³ Mii manli in tuklaia apangnem thi miikhatta puuia anthlen,

⁴ cheva mii tammal rella amah kuungah thlen cheknoh seia, anmah in amah amnachung inbungta ankekche mahoa, apangnem thi mii in antolhna tuklaita amithlakpei.

⁵ Chuna anmah in amilotkhata Jisu in amuh a apangnem thi miikuungah ason, “Kisakupa, nang nileh eita ki ip peiche.”

⁶ Ipek ringjih lulok ste in mah khanna inbok a, anrilsuunga inruiisei,

⁷ “Mahmii in jarella ngatrong meio? Amah in Ringpu ta usitnoh a trongsa! Tunang in alehta ip achekme chuta Ringpu khop in acheknoh ningme?”

⁸ Che kak hanga akroua ankaara trong inruieita Jisu vaa li in arompeia ankuunga asonei, “Jarella nannih nanrilla mainanga inruichoume?”

⁹ Apangnem thimiita, “Nang nilehkha ki ippeita son chunoh a; inthoua nang nantolhnata loua sehrota sonni, jaknangin aklaibebme?”

¹⁰ Chuta miivaa Asa kupa in alehta ipnatu tukleiramma achek am tih a namrom cheknatu amah in apangnem thimiita ason–

¹¹ “Keiin nangta kisonche, inthoua nantolhnakha loua ni inna inlengrosa.”

¹² Che amah in inthoua antolhnakha kak hanga alohche mii annaamta mah a sehsa; machunna anmah naamtein salungkhou seia Ringpu ta paar mathrat a antih, “Inih in mainangjim loumuhnoh luung mangme!”

Jisu in Levi ta aong

¹³ Amah in veikhatla tuiiboom apaalla sehsa; che miinaam in amah kuungah inlomsei, mahche anmahta amtheih ei.

¹⁴ Che amah in aseh in, roi teenna phrangki thlaamma inbok a am Alphias asa kupa Levi ta amuh in ason, “Kiknu keijuihro.” Mahchunna inthoua amah aknuta ajuihpei.

¹⁵ Amah in teborra buh asaaknatu anboklai, roi akthrai eileh alehchel mii khatkho amah roijuih eiin Jisu soh inbokjousei, alamva amah aknujuihva miitam ei.

¹⁶ Mahche Pharisi vaa ringjih lulok eiin, amah in alehchel mii eisoh che roithrai eisoh ansaakjou anmuh in aroikuunga anson, “Jarella roithrai mahche alehchel mii eisoh asaakjoume?”

¹⁷ Mahchuta Jisu in atheih a ankuunga asonei, “Aruung akthra miiningva maipa kananoh, chuta aknaei turella kana; keiin akchimlamseh eita ak ong thlengnoh ang chuta alehchelei turella thlengsang.”

Buhel Rella Ruina

¹⁸ Pek John aroileh Pharisi aroi eiin buhella ammei; chunna anmah in Jisu kuungah thlenga ason, “John aroileh Pharisi aroi eiin buh anhelche, nang niroiva buh helnoh ei i jarelname?”

¹⁹ Mahchun Jisu in asonei, “Changri in changvaang akthleng rapkhei eisoh an amjoulai anmah in buhel anchek ume? Changri in anmahsoh an amlaisoot anmah in buhel cheknoh ei.

²⁰ Mah aknichu thlengumang, changrita anmah kuungnata aphurhlai, che mah aknichunna anmah in buh anhel umang.

²¹ Tukhat inkho amlui puunna akthar puunkirra louphohnoh ei, phoh eile, phohna munkha, tihva amluinata akthar aphohna in akaia ralladom thranoh a inthrit.

²² Mahche tukhat inkho amlui savun thongta akthar nganglirah atuii lousuungnoh ei, suungeile, nganglirah atuii in savun thongta amphuuktu, chunna nganglirah atuiikho savun thongkho maangtu, chuta akthar nganglirah atuii i akthar savun thonga anlousuungning.”

Sabatni Rella Rui

²³ Sabatni khat a amah in loulai juih a seh, che amah aroiin anseh malamma niim ahuumta chin anmithronpei.

²⁴ Mahchunna Pharisi in amahta anson, “Anro, Sabat niah tlohphunoh thlouta niroi in antloh i jarelname?”

²⁵ Che anmahta asonei, “Davit in atlohkha paanohchoume, andarkaar amlai che antraamlai anmah in jangthlouta antlohme.

²⁶ Abiathar in aklok thiimpu aveilaia, amah in Ringpu inna khatloh a luutme, mahche thiimpu noh a saa janoh ankat tolta ansaak, che amah in anruuipikho amlannei.”

²⁷ Che anmahta asonei, “Sabat i mii turella aseem, mii in Sabat turelna noh.

²⁸ Chunna miivaa Asa kupa i Sabatni tukho akpu sa.”