MARK 16 - Akthar Trongirhna (BSI)

Jisu in Veikhat Ring

¹ Che Sabatni achesoh, Meri Makadalini leh Jems che Salomi anu Meri in amrimtui inteina thao anthlen, chunna anmah in seh a amahta anteinatu.

² Che kouhva matsahrem anrang juktiinga anmah in rusuunpiia sehsei mahlaiva ramvaarsa.

³ Che anmah in khatkhat a insonsei, “Rusuun khaarna lungita inihngut a tunang in amilatmeio?”

⁴ Che achunga an an in, lung inlat a amta anmuhpei, mahchu khalmo inrol lungpii.

⁵ Che rusuunna anluut in, intlangsa khat changtonga inbok a am anmuhpei, puunngou a inliing, mahchuta anmuh in salungkhousei.

⁶ Chunna ankuunga asonei, “Salungkhou nohve; nannih in Najareth na Jisu amithlukhata nanjon. Amahvah ringsa, onna amnohsa; amahta amitolhna munkha anve.

⁷ Chuta sehve, amah aroi leh Pitar ninga sonve amahvah nannih nanmaa Kalili a lousehsa; mahchunna nannih in amahta nanmuhpitu, amah in nankuunga matsah a nanisonche khananga.”

⁸ Che anmah in apaalla anthruhche rusuunnata tlaansei; alamva antak inchuun mahche salungkhou suuksei che intrikhemsei.

Meri Makadalini Kuunga Jisu Atakta Ammuh

⁹ Ipekva anmah in kouhtu matsahrem akni inranga, mah chuvah amah in matsahremma Meri Makadalini mah chuvah khousaar sirih amnomna kumeikuunga atakta ammuhpei.

¹⁰ Amah in anthruhche amahsoh anruuipi ankuunga asonei, chunna anmah in marhuuia trapsei.

¹¹ Amah in ringsa mahche keiin kammuhpei ta ankuunga asonkha antheih in anmah in malotnohsei.

Aroi Innih Kuungah Jisu in Atakta Ammuh

¹² Mahche aknua anmah in ramboomma ansehsuunga, ahoongkhat veia anmah innih kuungah atakta ammuh ei,

¹³ che anmah in anlengche aktlei kuungakho ansonpei, chuta anmah in malotnohsei.

Somleikhat Ankuunga Jisu in Atakta Ammuh

¹⁴ Achenaremma somleikhat in tebor a inbok a an amlaia amah in thlengsa; che anmah in amilotnoh khatkho anriltrang khanna amah in ankuunga asaallei, alamva amah in aringche aknua amahta akmuh in malotnohsei.

¹⁵ Che amah in ankuunga asonei, “Tukleiram anaamte nannih in sehve che akthra trongta mii naamte kuunga raanve.

¹⁶ Tukhat in malot a inlup akphahta akaltu; chuta tukhat in malotnoh a inlupta amlaaltu.

¹⁷ Che amlot mii ankuungva mah daang in anruuipituei: kei kikminga anmah in khousaar aminomtu; akthar trong trongtuei;

¹⁸ muruul suur seilakho che tuur iinseilakho; anmahta jakhatkho tlohnohtuei; akna aksaaeita anmah ankut in anpalla thratuei.”

Jisu ta Ringram a Ahan

¹⁹ Chunna Akpu Jisu in anmahsoh antrongnua, ringramma amahta ahanpei, che Ringpu akchang kuttonga inboksa.

²⁰ Che anmah in amun naamtea ansehche anraanpei, Akpu in anmahsoh thlou atlohlaia, daang in atlohthlou akthra trongchu chimsa ta anrompei. Amen.