MARK 14 - Akthar Trongirhna (BSI)

Jisu Thatnatu Amichaang

¹ Ipek chol jaonoh tol leh Laalna buhdoon nijannih avaatlaia akthloi thiimpu khatkho ringjih lulok eiin khatloh a amahta inruktea suura ithat umeta amijonpei;

² alamva anmah in anson, “Buhdoon suunga tlohnohrei, alamva mii in dirdir tihtuei.”

Jisu ta Bethani a Thao Atei

³ Che amah in Bethani a reichi kop Simon inna a amlai, tebor kuunga anbok in, kumei khat in amrimtui aman khalmo chaal thao alabaster a anseem abuurkhat a thlenna thlengsa, che amah in akhumta amhoongche akangchunga apoihpei.

⁴ Chuta arouin amilung inhaanga khatleh khat insonsei, “Jarella mah amanchaal inteiphu thaota ampaampeime?

⁵ Alamva mah inteiphu thao i dinari reija inthum akralla ajurhche anran anriingta malanleva” ta anmah in kumeita anrilhpei.

⁶ Chuta Jisu in asonei, “Amahta akroua mahve; jarelna nannih in amahta namilahme? Amah in akthra thlouta kikuunga atlohpei.

⁷ Alamva anran anriingva nannihsoh injomma amjou tuei, che nannih in anmah kuunga akthra nantlohja laia nantlohtu; chuta nannihva keisoh injomma amnoh uchou.

⁸ Amah in achekpot keikuunga atlohpei; keita kanhuihnoh maa a amah in kiruungta thao poih a keinuulpei.

⁹ Che atak a keiin nankuunga kisonchou, tukleiram apumtea Akthra Trong ita anraan anraanna a, amah in atlohthlou ita intheihna veia anson usa.”

Jisu Jurhnatu Judas in Aja

¹⁰ Cheva Judas Iskariot, somleinih ankaarna inkhat in, Jisu ta jurhnatu akthloi thiimpu kuunga sehsa.

¹¹ Che mahchu antheih in anroomthoksa, che baobeh malannatu trongchet anlohpei, che amah in ajurhnatu reipakthra amjonpei.

Jisu in Aroisoh Laalna Buh Asaakjou

¹² Che chol jaonoh tol doonna matsah aknia, anmah in khuldoon sadam ankatnia, aroi in amahkuunga anson, “Kannih in ramma seh a khuldoon buh saaknatu thlouraang kantloh ume?”

¹³ Amah in aroi ankaarna innihta amthlah ei, che ankuunga asonei, “Khuuboom suunga sehve, che tuiipul tonga kupakhat nantuukpitu; amahta juihve,

¹⁴ amah in aluutna innpuninga sonve, ‘Lulok in ason, kei rapkhei khumchu khome, ramma keiin kiroi eisoh khuldoon buh kisaak ume?’

¹⁵ Che amah in maseenga amchaangche achungnung khumkhat nanimmuhtu; mahchun inihturel thlouraang tlohve.”

¹⁶ Che aroi eiin inthruh a che khuuboomma sehsei, che amah in ankuunga asonnanga antuukpipei; che mahchunna khuldoon buhdoonnatu thlouraang antlohpei.

¹⁷ Che khulouhram aphah in amah in somleinihsoh thlengsa.

¹⁸ Che anmah in tebor a ansaaklaia, Jisu in asonei, “Atak a, keiin nankuunga kitihchou, nankaarna inkhat in keita keijurhtung, mah chuvah keisoh jouta aksaa mii khanna.”

¹⁹ Che anmah in marhuui amithronpei, chuche amahkuunga inkhat khat a antihpei, “Mahchu keisangme?”

²⁰ Amah in ankuunga asonei, “Mahchu somleinih nankaarna inkhat, amah in tol alohnatu kama keisoh jouta akut apuurtu.

²¹ Alamva miivaa Asa kupa in amah turelna injihche khananga sehtu, chuta miiva Asa kupata akjuur amahkhava lahnasa! Amah turelva anpoknoh in ralla thratuta.”

Akpu vaa Buhdoon

²² Che anmah in ansaaksuunga, amah in tol loua doi amlan, mahchuta akhoihche ankuunga malanna asonei, “Louve, mah i kei kiruungsa.”

²³ Che amah in chapla alohpei, mahchuta ampaakcheva amah in ankuunga amlanei, mahche annaamte in mahchu an iinpei.

²⁴ Che amah in ankuunga asonei, “Mah i kei trongirhnavaa thiisa, miitam turella akluungsa.

²⁵ Atak a, keiin nankuunga kisonchou, keiin veikhat inlenga ngangli atuii i iinnoh usang Ringpu kurung huunna aknia akthar veia ki innohmiil.”

²⁶ Che anmah in laa tlohjoua chorophol muulla sehsei.

Pitar in Andahsam Jisu in Matsah a Aphoong

²⁷ Che Jisu in ankuunga asonei, “Nannih nannaamte in keita nanmah umang ang; alamva mah i injih a amsa, ‘Keiin sadamkemta kamrattu che sadam in inthek invorh usei.’

²⁸ Chuta keita kamringangche aknua, nannih nanmaa Kalili ah keiin lousehtung.”

²⁹ Pitar in akuunga ason, “Anmah annaamte in nangta nakmah a seh seilakho, keiva tiknikho nakmahnohtung.”

³⁰ Che Jisu in akuunga ason, “Atak a, keiin nikuunga kisonche, mi in khulouh talla, aarkhong in veinih ankhuungnoh maa a, nangin keita veithumkhek kandah a inleem uche.”

³¹ Chuta amah in karaang kanga ason, “Keiin nangsoh thijoutung, keiin nangta nandahnoh luungtung.” Che mahchunanga annaamte inkho intrimbenga ansonpei.

Ketsemani ah Jisu in Angen

³² Che anmah in Kethsemani antih amunna sehsei; che amah in aroikuunga asonei, “Keiin kingensuunga, onna loubokve.”

³³ Che amah in Pitar leh Jems mahche John ta anruuipiei, che amah aril klah leh insuk inhal amthronpei,

³⁴ che amah in aroi ankuunga asonei, “Kei kikli i khalmo thisamma klahsang; onna louamve, che heithriilve.”

³⁵ Che ste inlah ah asehche, amah in tukleia intolh a angenpei, mah i vei ajaleva, amah akuungnata pungi masehro.

³⁶ Che amah in ason, “Abba, Pa, poot anaamte nikuunga veikir; mah kammi keiningnata louro; chuta keiin kamdon veinoh a nangin nimdon veiso.”

³⁷ Che amah in athlenglaia anmahva inna louamsei, che amah in Pitar kuunga ason, “Simon, in mangcheme? Nangin pung khatrukho innoh a doucheknoh cheme?

³⁸ Nannih in madoina a nantlaknoh natu doutrangve che ngenve; li inva amdon chuta ruung invah marnopsa.”

³⁹ Che veikhatla amah in ngennatu sehsa, intrimbeng trongta sonna angen.

⁴⁰ Che amah in veikhat athlenglaikho anmah in inna louamsei, alamva an ihmuh hanga anmit khalmo klahsei; che anmah in akuunga khatloh a amisangtu tihkho romnohsei.

⁴¹ Che amah in ankuunga veithum tihpi thlengsa; che ankuunga asonei, “Nannih in pekphah inna inngaia ammang choume? Ajapei, apungkha thlengsa; miivaa Asa kupakha alehvaa ankut a anjurh usa.

⁴² Inthouvesa seh raseio, anve, keijuurtu miikha inihkuunga innaisa.”

Jisu ta Ansuur

⁴³ Che Kak hanga amah in atrong suunga, somleinih ankaarna inkhat, Judas in thlengsa, che amahsoh inruuia miitam chemthal mahche sungsoh inruuia thlengsei, anmahva akthloi thiimpu khatkho ringjih lulok che anparuul in amithlah ei.

⁴⁴ Ipek akjuurmii in ankuunga daang malanna atih ei, “Keiin kamchohmiikha Amahkhasa; Amahta suurchoulaia thra sella phurhvesa.”

⁴⁵ Che amah in athlengsoh kak hanga Jisu kuunga avache atihpei “Lulok!” cheva amahta amchohpei.

⁴⁶ Che anmah in akutkhit a ansuurpei.

⁴⁷ Chuta ankaar a akngir inkhat in chem akjuukche akthloi thiimpu vaa roijuih inkhatta amkuur apheklokpei.

⁴⁸ Che Jisu in ankuunga asonei, “Inru miita aksuursam nanga, chemthal khatkho sungsoh inruuia keita keisuur thleng sachoume?

⁴⁹ Aknirel keiin nannihsoh inruuia mathruunna thlaamma nannihta nanimtheih a ammang, che mahlai nannih in keisuurnohchou, chuta ringjih trongkha athlungna veisa.”

⁵⁰ Che annaamte in amahta mathlah a tlaankirsei.

⁵¹ Che intlangsa khat in amahta ajuihpei, jakhatkho injaonoh chuta bulaapuunna aruungta inthlomning; che anmah in ansuurpei,

⁵² chuta bulaapuun alonche athlaia tlaansa.

Jisu in Jama Anmaikuunga

⁵³ Che anmah in Jisu ta akthloi thiimpu kuunga anphurhpei, che akthloi thiimpu annaam leh anparuul khatkho ringjih lulok in inchunna amsei.

⁵⁴ Che Pitar in amahta inlabeb a ajuih, akthloi thiimpu innmuk phah a; che amah in mei oh a akngaak raalmii eisoh inbok a am.

⁵⁵ Ipekva akthloi thiimpu mahche jama annaam in Jisu ta anthatna turella sakhi anjonpei, chuta anmah in jakhatkho tuuknohsei.

⁵⁶ Alamva aktam in amahrella chimnoh a sakhi amilanpei, che anmah sakhichu inchunnohsei.

⁵⁷ Che arouin ngirra amah turella chimnoh sakhi malanna anson,

⁵⁸ amah in ason kantheih, “Keiin mah mathruunna thlaam kut a anseem ita kikthrit kirche nithum suunga aktleikhat kiseemtu, mah chuvah kut ah seemnohtung.”

⁵⁹ Chunna anmah sakhi luungkho intrimnohsei.

⁶⁰ Che akthloi thiimpu in alaitalla angirhche Jisu ta arui, “Nangin namsangtu amnohsame? Nangta nakjanoh a mii in sakhi amilanni khasame?”

⁶¹ Chuta amah in jakhatkho masangnoh a rimta amsa, veikhatla akthloi thiimpu in akuunga anrui, “Doiphah Asa kupa Khrista kha nangcheme?”

⁶² Che Jisu in ason, “Keisang; che nannih in miivaa Asa kupakha tuuivaa akchangtong kut a inbok che ringramna raalmiisoh inruuia thleng nanmuhtu.”

⁶³ Che akthloi thiimpu in alungluutta akthritche atihpei, “Jarella mairella sakhi malannatu darkaar ammangme?

⁶⁴ Amah in Ringpu ta usitnoh a trong nantheihpei. Nannih in nanngirhnava khasame?” Che annaamte in indah a amahta thatnatu ngirsei.

⁶⁵ Che arouin amahta amichil, amai amikhum, che amahta marat amithronpei mahche akuunga anson, “Kanisonro!” Che amahta akngaak raalmii in suura anbengpei.

Pitar in Jisu ta Andahna

⁶⁶ Che Pitar in athlangtong innmuk a amsuunga, akthloi thiimpu vaa roijuih kumei khat thlengsa,

⁶⁷ che amah in a an inva Pitar mei oh a am amuh a akuunga ason, “Nangkho Najareth na Jisu soh inruui miinoh cheme.”

⁶⁸ Chuta amah in indah a ason, “Nangin nisonni keiin romkhonoh ang che louthleihnoh ang,” che amah in kolol kuunga inthruhsa.

⁶⁹ Che roijuih kumei in amahta amuhlapei, che akngir ankuunga veikhatla son amthronlapei, “Mah kupa i ankaarna inkhat.”

⁷⁰ Chuta amah in veikhat indahlasa. Che akomma akngir ei in veikhatla Pitar ninga anson, “Nangi inlitnoh a ankaarna inkhatche; alamva nangi Kalili na mii che,”

⁷¹ Chuta amah in akroua phool inpesa che trongchet malanna, “Nannih in nantrongna mah kupa i keiin romnohluung ang.”

⁷² Che kak hanga aarkhong in veinihtipi inkhuungsa, Jisu in Pitar kuunga asonta intheihkirsa, “Aarkhong in veinih ankhuungnoh amaa a nangin keita veithumkhek kandah uche.” Che amah in aril sok a ankhupche marhuuisa.