MARK 12 - Akthar Trongirhna (BSI)

Ngangli Billa Lampaar Saavaa Pandam

¹ Che amah in pandam veia ankuunga trong amthronpei, “Kupakhat in nganglibil atloh, che mahchuta inhiilla pal amkhah, mahche ngangli atuii asornatu khur khatkho achoh, che stlaankhat athah, che mahchuta lampaar amsaalpei, cheva atakva khuuboom aktleia sehsa.

² Laichu aphah inva, amah in lampaar aksaa ankuungnata akrah ste aphahnatu amah roijuihta amthlah ei;

³ che anmah in ansuurche ankhonpei, che anmahta aruuk a amilengpei.

⁴ Veikhatla amah in ankuunga aktlei roijuih amthlahla, che anmah in akanga amiratche aminuihpei.

⁵ Che amah in aktleita amthlahlaei, che anmah in anthatpei, arouta ankhon che arouta anthatpei.

⁶ Amah in arilvol asa kupakhat asihmang; achena a amah in ankuunga amthlah, ‘Anmah in kisa kupata injah tuei ta amdon.’

⁷ Chuta lampaar aksaa in khatleh khat insonsei, ‘Mah i pipasa; thlengve, amahta thatreio, che amah in achang khaankha inih ita veitu.’

⁸ Che amahta ansuurche anthatpei, che nganglibil apaalla anlonpei.

⁹ Mahchu nganglibil Akpu in kha atloh tueime? Amah in thlengtu che lampaar aksaaeita ammaang tuei, mahche ngangli bilkha aktleikuunga amlantu.

¹⁰ Nannih in mah ringjih i paanohchoume; ‘Inntloh mii in andahtal lungta akiinga kukchopii louveisa.

¹¹ Mahchu Akpu in atloh, che mahchu nanmit in salungkhou same?’ ”

¹² Che amahta ansuurnatu insuulsei, chuta miitamta trihsei, alamva anmahta indah a pandam amlankha anrompei; chunna amahta mathlah a sehsei.

Roithaang Malan relna Anrui

¹³ Che amah atronga ansuurnatu anmah in Pharisi ste leh Horodia mii steta akuunga amithlahpei.

¹⁴ Che anmah in anthlengche akuunga anson, “Lulok, kannih in nangi chimche ta kanrom, mahche nangin tukhatkho thousanohche; alamva miivaa inkaang phomkho injahnoh luungche, chuta Ringpu lam akchimta namtheihning. Keisaar kuunga roi malanni trongsuura tlohphume nohle tlohphunohme?”

¹⁵ Kannih in kamilan ume, chunohleh malannohtu ungme? Chuta anmah in akthra anveisinkha aromma, amah in ankuunga asonei, “Jarella keita chaang nan an angme? Baobeh apumkhat keithlenve, che keiin mahchu antang.”

¹⁶ Che anmah in baobeh apumkhat anthlenpei. Che amah in ankuunga asonei, “Onna injih i tunangsoh intrimme che tumingme?” Anmah in akuunga anson, “Keisaar.”

¹⁷ Jisu in ankuunga asonei, “Keisaar kuunga malanphukha Keisaar kuunga malanve, che Ringpu kuunga malanphukha Ringpu kuunga malanve.” Che anmah in akuunga salungkhousei.

Thinata Ring Rella Anrui

¹⁸ Che thinata ring amnoh aktih Sadukis in amahkuunga thlengsei; che anmah in akuunga trong anrui,

¹⁹ “Lulok, Moses in kannih turella amjihpei mah chuvah kupakhat in athiche akmeita mahle, chuta asa amnohle, amah unaoin akmeichu lou aja, che auh anao turella asa apokche koolkem aja.

²⁰ Unao kupa sirih ammei; matsahrem in akmei aneihpei, che amah in athi inva asa amnohsa;

²¹ che innih tihpi in amahta alohpei, che thisa, asa amnohsa; che inthum tihpikho mahchusoh intrimma suuksa;

²² Che sirih tihpi inkho asa amnohsa juktoolremva kumei khakho thisa.

²³ Thinata anring laiva mahchu tunang akmei vei ume? Alamva sirih in anmei amiveipei.”

²⁴ Jisu in ankuunga asonei, “Nannih in Ringpu atuuikho ringjihkho romnohchou, mairella nannih in inlaalnoh choume?

²⁵ Alamva anmah in thinata anring laiva, innpaal nohle changvaanga malanchu amnoh usa, chuta ringramna ringroi nangjim usei.

²⁶ Che akthinata ringi, Moses nirik ah nannih in paanohchoume, inbang kaarna tronghou kharella, khatloh a Ringpu in akuunga asonme, keivah Abraham vaa Ringpu ang?

²⁷ Amahvah akthivaa Ringpu noh, chuta akring turella; nannih in khalmo nanlaalpei.”

Kliin Trongthuun

²⁸ Che ringjih lulok ankaarna khat in athlenglai anmah in khatleh khat trong inteleita atheihpei, amah in thratea amsangkhata amuh in, “Jaknang trongthuun in anaamte kaar a matsahremme?” ta akuunga arui.

²⁹ Jisu in amsang, “Matsahrem chuva, rugaive, Israel o; inihvaa Akpu Ringpu i Khalekning;

³⁰ che nangin niril apumte, niruungvaa nikli apumte, nimdon apumte, mahche niklii apumtein nang Akpu Ringpu ta rilvolro;

³¹ innih tihpi in maisa, nangin nantongpita nitaktal nanga rilvolro, mah ichunga ralla trongthuun kliin aktlei amnohsa.”

³² Che ringjih lulok in akuunga ason, “Nang chimsache, Lulok; nangin chimma nisonpei, mah chuvah amahvah khalekning, aktlei jakhatkho amnoh chuta amahning;

³³ che amahta malung apumtein, anaamte bahaptla a akloutheih ril apumtein, mahche ikli apumtein amahta rilvol mahche intongpi miita khalek veia rilvolro, mah naamtein meia haalla inkat apumte chunga akralremsa.”

³⁴ Che amah in ksinga amsangpei ta Jisu in aromma, amahkuunga ason, “Nangin Ringpu vaa kurung huunna khannata inlahnoh sache.” Mahchu aknua tukhat inkho intrinoh luunga akuunga trongrui cheknohsei.

Misaiah Relna Anrui

³⁵ Che Jisu in mathruunna thlaamma amtheih suunga, amah in ason, “Khatloh a Khrista ta Devit vaa Asa kupa tih a ringjih lulok in asonme?

³⁶ Devit ataktal in, akseeng li a chuunga sonna amdangpei, “ ‘Kei Akpu in Akpu ninga asonpei, “ ‘kei kikchangtonga nanboksoot, “ ‘nang nak andah eita nikehthuuia keiin kisihtu.’

³⁷ “Devit ataktal inkho amahta Akpu ta aong; chunna khatloh a amahta amah asa kupa vei ume?” Che miitam in inlomma roomthoksoh inruuia amahta anrungeihpei.

Trongsuur Lulok kuunga Jisu in Amthritei

³⁸ Che amah in matheih a a atih ei, “Ringjih lulok eita cheksilve, anmahta keithilla mii in injah a amithruunnatu lungluut insuul silh a seh andit

³⁹ che sinakok ah akthrarem inbokna phomma che injahna aja buhdoonna phomma inbok andit,

⁴⁰ anmah in trulmeinu an innta ansutche sootkhak a akngen veisinnei. Anmah in ralla klah kanang anphatu.”

Trulmeinu in Adoon Amlan

⁴¹ Che amah in poot ankatna amaa a inboksa, mahche miitam in pootkatna a baobeh amilanta amah in jih a am. Doon akhaal ei in baobeh tam amilan.

⁴² Che anran trulmeinu inkhat in thlengsa, amah in kuri baobeh apum innih amlan, mahchu pulla lupakhat.

⁴³ Che amah in aroita aongeiche ankuunga asonei, “Atak a, keiin nankuunga kisonchou, mah anran trulmeinuin poot akat i annaamte in ankatchunga amah in ralla akatpei.

⁴⁴ Alamva anmahva andoonpot suungnata ste louva ankatning chuta amahvah adoonpoot aringna apumteta amlanpei.”