MARK 11 - Akthar Trongirhna (BSI)

Jisu in Raalchek a Jerusalem Luut

¹ Che anmah in Chorophol Muulla am Betphake leh Bethani, mahche Jerusalem annai in amah in aroi innihta amthlahpei,

² che ankuunga asonei, “Nanmaa a am khuukhan nannih in sehve, che kak hanga nannih in nanluut laia samong aruulkhat inkhit a am nantuuktu, mahchu tukhat inkho huuinanoh mangei, majak choulaia thlenve.

³ Tukhat in nankuunga, mah i jarella nantlohme? ta nanirui eile, ‘Akpu in darkaar che intha amlenglatu ta masangve.’ ”

⁴ Che anmah in sehsei, che samong aruulchu lamkomma am thongkunga inkhit a amta anmah in antuukpei; che anmah in amijakpei.

⁵ Mahchunna tunangkhat ngirra am in ankuunga asonei, “Nannih in jangtlohnatu, samong aruulkha namijakme?”

⁶ Che anmah inkho Jisu in ason khananga ankuunga ansonpei; che anmah in anjapei.

⁷ Che anmah in samong aruulkha Jisu kuung anthlenpei, che anmah in anpuun anrei achunga anthahpei; mahchuche achunga chuungsa.

⁸ Che aktam in anpuun anrei lamchunga anthah, mahche aktlei in lounata thingbur antukche anthah.

⁹ Che amah amaa a akseh leh akjuih in tranga ongsei, “Hosana! Akpu minga akthleng amahkha doiphahsa!

¹⁰ Inih Pa Devit va kurung huunna akthlengsam i doiphahsa! Ankaang remma hosana!”

¹¹ Che amah in Jerusalem a luutsa, mahche mathruunna thlaamsuunga hongsa; che bilam anaam invella a an in, mahchu thilsa, amah in anthruhche somleinihsoh Bethani a sehsei.

Jisu in Thotthingta Phool Atloh

¹² Akhuvar a Bethani nata anthlenglai, amah in avon traamsa.

¹³ Che saraalla thotthing inkhat abur jaova moong amuhpei, che amah in inrah tunaita a an, amah in a an inva, jakhatkho tuuknohsa aburnoh a, alamva mahchu thotthing anrahna manjangnuram nohmang.

¹⁴ Che amah in mahchuta ason, “Tukhat inkho veikhat inlenga nikrah naksaanoh eiso.” Cheva aroi in mahchuta antheihpei.

Jisu in Mathruunna Thlaamma Luut

¹⁵ Che anmah in Jerusalem a thlengsei. Mahchuche amah in mathruunna thlaamma luutsa che tukhat in mathruunna thlaam asuunga akjuur leh aklei eita thek amthronpei, mahchuche baobeh amlatmii tebor leh khuinu akjuurmii inboknata amah in achung athlang amlatpei ei;

¹⁶ che amah in tukhatkho mathruunna thlaamsuunga jakhatkho thlen majanoh.

¹⁷ Che amah in ankuunga matheih a atih, “Kei inni jaat naamtetu ngenna inn tih a in ongtuta injih a amnohme? Chuta nannih in mah i inru inraanva akon namiveipei.”

¹⁸ Che akthloi thiimpu leh ringjih lulok in mahchuta antheihpei che amahta mamaangnatu lam anjonpei; anmah in amahta trihsei, alamva amah in amtheihna khanna mii in salungkhousei.

¹⁹ Che khulouhram aphah in anmah in khuuboom nata inthruhsei.

Thotthing nata Para Matheihna

²⁰ Chunna anmah in juktiinga anseh in thotthingchu akjungphah inhuuichu anmuhpei.

²¹ Che Pitar in intheihsa, mahche akuunga ason, “Lulok, anro! Nangin phool nitloh thotthingkha inhuuisa.”

²² Che Jisu in ankuunga amsangei, “Ringpu ta malotve.

²³ Tak a keiin nankuunga kitihchou, tukhat in mah muulta, ‘Inlongbulhro che tuiiboom suunga tlarota sonchoule, che arilla chingna amnoh luungle, amah inta malotle ason anaam veikirtu, che akuunga mahchu veitu.’

²⁴ Churella keiin nankuunga kisonchou, nannih in bilam ngenna nihchoule, mahchu kphahpeita malotve; che mahchu nanta veitu.

²⁵ Che nannih in ngirra nanngenrel, tukhat kuunga nanjanoh amle ipve; chunna ringram ak am Pa inkho nanleh eikha a iptu.

²⁶ Chuta nannih inta ipnohchoule ringramma am nanpa inkho nannih nanlehta nani ipnohtu.”

Akchek Amneh Jisu Relna Trongrui

²⁷ Che anmah in veikhat Jerusalem a thlengsei. Che amah in mathruunna thlaamma aluut suunga, akthloi thiimpu leh ringjih lulok khatkho anparuul ei in akuunga thlengsei,

²⁸ che amah in akuunga asonei, “Jangnichek nimneh amrella mah i nitlohme, nohle mah achek amneh i nitlohnatu tunang in nangta namlanme?”

²⁹ Jisu in ankuunga asonei, “Keiin trongkhat naniruitang; kamsangve, mahche keiin mah i jangnang kichek kimneh ah kitlohme kison uchou.

³⁰ John in alupkha ringram name nohle mii tingname? Kamsangve.”

³¹ Che anmah in khatleh khat inngeia amsei, “Inih in ringram tingna tihmaleva amah in asontu, ‘Jarella amahta malotnoh choume?’

³² Chuta inih in, ‘Mii tingna tih a ison ume?’ Chulata amah in miita trihsei, alamva John va akchim ringraan ta aktam in anrompei.”

³³ Chunna Jisu kuunga amisangpei, “Kannih in romnoh ung.” Che Jisu in ankuunga asonei, “Kei inkho mah i jaknang akchek amneh ah kitlohme nanisonnoh usang.”