Biblia Todo Logo
Bìoball air-loidhne

- Sanasan -

MARK 10 - Akthar Trongirhna (BSI)


Kumei Madah relna Jisu in Amtheihnaei
( Met 19:1–12 ; Luk 16:18 )

1 Che mahchuta amthlahche Judia aveel Jordan araalla sehsei, che miitam in veikhat inleng inlenga amahta anlomlapei; che amahtu anono veia anmahta amtheih ei.

2 Che Pharisi in thlenga amahta chaang anna arui, “Trongsuur nujuih a kupakhat in akmei inthrekpi ajame?”

3 Amah in ankuunga amsangei, “Moses in nankuunga jaknang trongthuun amlanme?”

4 Anmah in amisang, “Kupakhat in rai majih a kumei inthrekpi Moses in ajapei, che amahta amnomtu.”

5 Chuta Jisu in ankuunga asonei, “Nannih nanril in atrangrelna mah trongthuun i amjih.

6 Chuta aseem amthron lainata, ‘Ringpu in kumei kupa aseempei.’

7 ‘Mah in alamveia kupakhat in anuleh apa mathlah a kumeisoh inchuntu,

8 che anmah innih in ruung khalek veiusei.’ Chunna anmah in innih veijnoh a chuta ruung khalek veiusei.

9 Chunna Ringpu in alamveia amchun ei i, mii in threknoh eiso.”

10 Che aroi in mairella innsuunga veikhat akuunga anrui.

11 Che ankuunga asonei, “Tukhat in akmeita anthrekpiche aktlei kumei khatta changvaang leva, kumei laalthlou atlohpei;

12 Che kumei inkho amsalta anthrekpiche aktlei kupata changvaang leva, amah inkho kupa laalthlou atlohpei.”


Jisu in Naoeita Doi Amlanei
( Met 19:13–15 ; Luk 18:15–17 )

13 Che naoeita amah in apalnatu; akuunga anthlen, che aroi in anmahta ansaalei.

14 Chuta Jisu in mahchu amuh in amlunghaangsa, che ankuunga asonei, “Nao eikha keikuunga thlengeiso, anmahta khaamnoh eive; alamva Ringpu vaa kurung huunnakha mah naonang antasa.

15 Atak a, keiin nankuunga kisonchou, tukhat in naokhat nangjimma Ringpu kurung huunnata lounoh choulevah mahchun luutnoh uchou.”

16 Che naoeita akutbaanga akoneiche anchunga akut jamma doi amlanei.


Kdoon Mii
( Met 19:16–30 ; Luk 18:18–30 )

17 Che amah in rapkheitla ah asehnatu amthronso, kupakhat in tlaanna thleng che amaikuunga akhuk amkamche akuunga arui, “Akthra lulok, ache amnoh chaan kphahnatu keiin jangkitloh ume?”

18 Che Jisu in akuunga ason, “Jarella keita akthrata nak ong angme? Tukhatkho akthra amnoh chuta Ringpu khopning.

19 Nangin trongthuunkha nirom; ‘Inthatnohve, miimei miisa laalnohve, Inrunohve, Akchimnoh sakhi a ngirnohve, malei seinohve, nannu nanpata injahve.’ ”

20 Che amah in akuunga ason, “Lulok, keiin nao kivei lainata mah anaamte i kimjuih kirpei.”

21 Che Jisu in akuunga a an in arilvol hangsa, che akuunga ason, “Nangin inkhat namvaatmang; seh a nangin nidoon naamtekha juurro, che anrankuunga malaneiro, che nangin ringramma doonkhaal veiuche; che thlenga kiknu keijuihro.”

22 Mahchu ason in amai inthimsa, che amah in marhuuia inlengsa; alamva amahva andoon ankhaal tam asih.

23 Che Jisu in invella a anche aroi ankuunga asonei, “Akdoonei in Ringpu kurung huunna ah luuttupot ei i khalmoa klu!”

24 Che amah in atrong chunna aroi in salungkhousei, chuta veikhatla Jisu in ankuunga asonei, “Naoeio, mah i jikcha phah a klume Ringpu kurung huunna a luut i!

25 Akdoon mii in Ringpu kurung huunna ah aluuttu ngutva kukthrimpoa uuksa in aluut in aklaitu.”

26 Che anmah in thloia salungkhousei, che akuunga anson, “Chuleva tunang in achaan inkal aphahchek tupotme?”

27 Jisu in anmahta a anche asonei, “Miiningva mahchu veinohtu, chuta Ringpu ningva mahchunoh; alamva poot anaamte Ringpu ningva veikir.”

28 Pitar in Jisu kuung ason amthronpei, “Anro, kannih in anaamte kanmahkirpei che nangta kanjuihpeiche.”

29 Jisu in asonei, “Atak a keiin nankuunga kitihchou, akthra trong rella che keiturel tukhat in a inn alou nohle auh anao nohle asar ajuur nohle anu apa nohle asa anao nohle aram amuul mathlahnoh leva,

30 ipek chup in tukhat in, a inn alou che auh anao che asar ajuur che asa anao che aram amuulchung klah knang athlenglai loutho cheknohle, athlengsam ache amnoh punsi a saruk reijavak phahnohtu.

31 Che aktam matsah in juktooltu che juktool in matsahtu.”


Jisu in Athihsam Relna Veithum tihpi Trong
( Met 20:17–19 ; Luk 18:31–34 )

32 Che Jerusalem a asehnatu, anmah in lamma louamsei, che Jisu va anmah anmaa a lousehsa; che anmah in salungkhousei, che akjuih eikho intrisei. Che veikhatla somleinihta inruuipia, akuunga jaknangthlou suuktume tihrella ankuunga son amthronpei.

33 Anmahta asonei, “Anve, inih in Jerusalem ting hangrasei; che miivaa Asa kupakha akthloi thiimpu leh ringjih lulok ankuunga amilantu, che anmah in amahta thatnatu amilaaltu, mahche Jental kuunga amilan usa;

34 che amahta amirattu, anthattu; mahchuche nithum aknua amah in veikhat ringtu.”


Jems leh John in Anngen
( Met 20:20–28 )

35 Jebedi asa kupa Jems leh John in akuunga thlenga anson, “Lulok, kannih in kanditpot nangta kamitlohja hangche.”

36 Che amah in ankuunga asonei, “Nannih turella jangthlouta namitlohja sangme?”

37 Che anmah in anson, “Nangin paarthra niveilaia, inkhat in nikchangtonga che inkhat in nikveitonga, inboknatu kanijaro.”

38 Chuta Jisu in ankuunga asonei, “Nannih in jangthlouta nanruiangme tihkho romnohchou, keiin ki iinna chapla a nannih in iin nanchek ume, nohle keiin tuii kinlupna khanna nannih in inlup nanchek ume?”

39 Che anmah in akuunga anson, “Kanchektu.” Che Jisu in ankuunga asonei, “Keiin ki iinna chapla a nannihkho nan iintu; che keiin kinlupna akhanna nannihkho inlup uchou;

40 chuta kikveitong nohle kikchangtong inbokva keiin kamlantu phunoh, chuta maiva anmah turelna machaangche a asih antasa.”

41 Che som in mahchuta antheih lai, Jems leh John ankuunga saal amithronpei.

42 Che Jisu in anmahta akuunga aongeiche atih ei, “Nannih in mahchu nanrom tukhat in Jental akpuchunga paaltangta paallei, che anmah akliin mii in akchek amneh thlou anchuunga antloh.

43 Chuta mahchu nankaar avah veinohtu; chuta tukhat in anrol aveijale nannih roijuih veitu,

44 che tukhat in nankaar a matsahremtang tihle nannaamtu roijuih roithaang veitu.

45 Alamva miivaa Asa kupa in amahta rou antlohnatu thlengnoh chuta amah in miita rou atlohnatu, che amah punsita malanna miita thloknatu thlengsa.”


Jisu in Mitcho Bartimias ta Amthrat
( Met 20:29–34 ; Luk 18:35–43 )

46 Che anmah in Jerikho a thlengsei, mahcheva miitam leh aroisoh inruuia Jerikho mathlah a ansehsuunga, Timias asa kupa Bartimias mitcho, doh a aksaa mii in lamkomma a inbok a am.

47 Che amah in Najareth na Jisu tih a atheih in, trap a ongsa che ason, “Davit vaa Asa kupa, Jisu, keita niril kamvolro!”

48 Che amah in rimta a amnatu ansaalpei; chuta ral ralla ongsa, “Devit vaa Asa kupa, keita niril kamlvolro!”

49 Che Jisu in inngaia ason, “Amahta ongve.” Che anmah in mitchota an ongpei; che akuunga anson, “Niril lahnohro; inthouro, amah in nangta nak onga am.”

50 Che apuunta alonche chongsa che Jisu kuunga thlengsa.

51 Che Jisu in akuunga ason, “Keiin nang turella jangnimtlohja angme?” Mitcho in akuunga ason, “Lulok, keiin kimuhjasa.”

52 Che Jisu in akuunga ason, “Sehrosa; nangin namlotrella nangta namthratpei.” Che kak hanga amah in amuhpei che lamma amahta ajuihveipei.

Tarao New Testament - Akthar Trongirhna

Copyright © 2017 by The Bible Society of India

Used by permission. All rights reserved worldwide.

Bible Society of India
Lean sinn:



Sanasan