MADANGNA 6 - Akthar Trongirhna (BSI)

Chum Sirih

¹ Ipek sadamte in chum sirih ankaar nata inkhat amhoonglaia keiin kimuhpei, che akring kutseemsa manli ankaarna inkhat in keklei tla ahounanga, “Thlengro!” tih a ason keiin kitheihpei.

² Che anro, keiin skol inngoukhat kimuh, mah skol akthouin phalkhat achoih, amah kuungah boorpiikhat amlan, che amah in raalchek raalchek a che raaltloh a seh.

³ Sadamte khanna innih tihpi chumta amhoonglaia, innih tihpi akring kutseem khanna “Thlengro!” tih a keisonta kitheih.

⁴ Mahche aktlei intle skolkhat inthruhsa, mah skol akthou kuungah thaleichungah leh–oita alohnatu amjapei, chunna anmah in khatleh khat inthat che amah kuungah chemsei anrolkhat amlanpei.

⁵ Sadamte khanna inthumtihpi chumta amhoonglaia, inthumtihpi akring kutseem in, “Thlengro!” tih a keison kitheihpei. Cheva anro, skolvom khat kammuh ang, skol akthou akut ah choi inkhat achoih;

⁶ akring kutseem manli ankaar nata roolhou khat kitheihpei, “Nikhat kutlang manli suuk a saruk inthum, che nikhat kutlang manli suuk a niim thaoleh ngangli atuii saruk khat mamaang nohro!”

⁷ Sadamte khanna manli tihpi chumta amhoonglaia, manli tihpi akring kutseem khanna “Thlengro!” tih a keison roolhou kitheih.

⁸ Mahchu keiin kimuh, che anro, intham skol akthou akmingvah Kithi antih che Ringpu in aknuta ajuih; mahche thaleita manlisuung inkhatchunga chemseiin buhchaal in, kna ksa in, kithi in, mahche thaleina raprilsa eiin anthatnatu ankuungah tuui amlanpei.

⁹ Samdamte khanna ranga tihpi chumta amhoonglai, Ringpu trong rella mahche anmah in amilan sakhi kharella anthatpot ruungvaa li eita thiilkuung anuuia kimuhpei;

¹⁰ anmah in rool inkaang houa onga antih, “Akthloirem Akpu, akseeng mahche akchim, thaleichungah am anchungah nangin pichaar tloh a, jikcha soot a kannih kanthiivaa leiman thungnoh ucheme?”

¹¹ Cheva anmah khatkhatta inluutngou insuul amlannei anmahsoh roijuih veijouei mahche anmah unao eita tanga that anchenohmiil anmah in lai kakva inngai umangei.

¹² Sadamte khanna kuruk tihpi chumta amhoonglai keiin kimuh, anro, aktrang runaangnu thousa; kini in putsi vomnanga vomsa, che thla ril in thii nanga in aangsa,

¹³ che aktrang thli in araanlai phalbina thotthei akminnoh trilnanga, marvaanna arsi in thaleichung tlasei;

¹⁴ injuul niriknanga marvaankho kak hanga injuulla maangsa, che muul naamte mahche tuiikoiram naamte anmah anmah anphomnata alohkirpei.

¹⁵ Cheva thaleina kurungin che akliin eiin, raalmii aklok eiin, akdoon eiin, aktrang eiin, miinaam naichi mahche thlaang thlaang eiin khursuungah mahche muul lungkaara inthupsei,

¹⁶ anmah in muullei mahche lungpii eita onga antih, “Kannih kanchungah tlavesa che phompii chungah anbok amah maikungnata, mahche sadamte in amlunghaang khannata kanimthuprosa;

¹⁷ alamva anmah in amilung inhaangna akliin aknikha thlengsa, che amah amaikuungah tunang in ngir achekume?”