MADANGNA 5 - Akthar Trongirhna (BSI)

Injuul Nirik Khatkho Sadamte

¹ Phompii chungah anbok amah akchangkut asuung khatkho aknungtonga injih chum sirih innam injuul nirikkhat keiin kimuh;

² mahchuche akraang ringroi inkhat in roolsuukta onga asonkha keiin kimuhpei, “Injuul nirik ita amhoongchek mahche mah chum sirih ita akhoihchek matikcha tunang amme?”

³ Ringramma nohle thaleichungah nohle thaleinuuia ak am tukhat inkho mah injuul nirikta mahoong nohle mahchuta an cheknoh ei,

⁴ che mah injuul nirikchuta amhoong nohle mah asuungta ak anchek matikcha tukhatkho intuuknoh khanna keiin trapsang.

⁵ Cheva anparuul ankaarna khat in keita keisonang, “Trapnohro; anro, Judah jaatna saruung, Devit vaa akjungin injuul nirikta che mah chum sirihta amhoongnatu raal achekpei.”

⁶ Che phompii khatkho akring kutseemsa manli ankaara mahche anparuul kaara, aki sirih leh amit sirih am anthatchenang sadamte inkhat ngir keiin kimuh. Anmah sirih chuvah Ringpu in thalei pumtea amthlah Ringpu vaa Li sirihsei;

⁷ sadamte in phompii ah anbok amah akchangtonga injuul nirikta amah in alohpei

⁸ che amah in injuul nirikkhata alohlaia akring kutseemsa manli khatkho anparuul sopnihlei manli in sadamte amaikuungah inriilsei, anmah khatkhat in snanta mahche akseeng mii in anngenna amrimtui haalna in sip ra–ao kameita anchoih

⁹ anmah in laa akthar tloh a antih, “Injuul nirikkhata aklou che mah chumta amhoong nangvah matikchache, alamva nangta nanthatpei mahche jaat, trong, mii khatkho jaatboom annaamte nata nang nithii in Ringpu turella mii eita nithlokpei,

¹⁰ che anmahta kannih Ringpu turella kurung huunna mahche thiimpu kmiveiei, che anmah in thaleichunga paaltuei.”

¹¹ Che keiin kimuh, mahche phompii, akring kutseem, che anparuul eita ihiilla am ringroi tam anrolhouta keiin kitheih. Anmahva teen icheknoh akpulchunga akpul che akpul reijachunga akpul reijaei,

¹² Anmah anroolhouin inkaanga anson, “Tuui, lal, lousing, anchek amneh, injah, khatkho doi paarthra akphah inthatche sadamtekha matikcha!”

¹³ Mahche ringramma, thaleichungah, thaleinuuiah, tuiiboom asuungah, che akring kutseemrel in mah ita anson keiin kitheihpei, “Phompii achungah anbok mahche sadamte kuungah doi, injah, paarhtra che ache amnoh akchek amneh am veiso.!”

¹⁴ Chunna akring kutseem manli in antih “Amen!” Cheva anparuul eiin intoltlep a amithruunpei.