MADANGNA 3 - Akthar Trongirhna (BSI)

Sardis ah Trong Araan

¹ “Che Sardis ah am khakla vaa ringroi kuungah majihro: ‘Ringpu vaa Li sirih mahche arsi am amahvaa atrongi. “ ‘Keiin nang nithloueita kirom; nang ring mangcheta nikmingvah am, chuta nangvah thisache.

² Inthourosa, che thisamma am anmahta matrangeiro, alamva kei Ringpu amit anna nang nithloukha mapungpha veia tuuknoh ang.

³ Nangin jangta niphahme mahche nitheihme tihkha intheihro, mahchu ngaak a majuih a niril thlengro. Nanginta inthounoh cheleva keiin inrunanga nikuungah thlengtung, keiin jaknang pungkhanna nikuungah thlengtungme romnoh uche.

⁴ Chuta anmah anpuun anreita ambuurnoh mii steva anming Sardis nanga nang nitaveia ammei, anmahva matikcha taningeivah anmah in puunngou silh a keisoh sehjou tu ung.

⁵ Raal akchek mii kuungah keiin inngou puunrei kimsilhtu, che amah akming akring niriknata mamuhnohtung; che keiin amah akmingta pa amaikuungah khatkho amah ringroi anmaikuungah kiphoongtu.

⁶ Li in khakla ankuungah asonkha tunangkhat in arungeihnatu amkuur am miikhan rungaiso.’ ”

Philadelphia ah Trong Araan

⁷ “Che Philadelphia ah am khakla vaa ringroi kuungah majihro: ‘Akseeng khat, akchim khat, Devit vaa chapi akchoi, amhoongchek tukhat inkho mahoongnoh tupot amah in asontrong oh i.

⁸ “ ‘Keiin nithlou eikha kirom. Anro, tukhat inkho khaar acheknoh inhoonga thongkhat nang nimaikuungah kisih nang nituui steta amning tih a kirom, che nangin keitrongta ngaak a sehche mahche keimingta indahnohche.

⁹ Anro, Seitan vaa Sinakok mii eita keiin kiseemtuei, antak in Judiung antihche Judi vanoh ei, chuta amichinthi a aktrong anmahta nangkuungah kamththleng tuei, che nang nikehkuungah amithruuntu, che keiin nangta kirilvolche tihkha anmah kuungah kimromtuei.

¹⁰ Alamva keitrongta nangin doutranga ngaak a sehtaning cheva tukleiram apumte thaleichungah akthlengsam chaang anna pung khannata keiin nangta kikemuche.

¹¹ Kei intha a thlengusang; tukhat in khonang boorpiita namma naklohnohnatu, nangin nisihkhata chet a matuhro.

¹² Raalchek amahkhata kei Ringpu akseeng thlaamvaa kukchokhat kimveitu, che amah in tikniakho ohkhannata inthruhnohtu, mahche kei Ringpu vaa akming, kei Ringpu tingna ringramnata trum akthar Jerusalem, tihva kei Ringpu vaa khuuboom akming che kei kikming akthar amah kuungah kimjihtu.

¹³ Li in khakla ankuungah asonkha tunangkhat in arungeihnatu amkuur am miikhan rungaiso.’ ”

Laodisia ah Trong Araan

¹⁴ “Laodisia ah am khakla vaa ringroi kuungah majihro: ‘Amen antih, malot aja mahche akchim sakhi, Ringpu kutseem suunga matsahrem amahvaa atrong oh i.

¹⁵ “ ‘Keiin nang nithloueita kirom: Nangvah daikho dainohche mahche insaakho insaanohche. Nangin dai nohle insa niveinatu keiin kikditche!

¹⁶ Chunna, nangva lumphuunche, daikho dairemnohche insaakho insaa remnohche nangi kibaonata kamsah uche.

¹⁷ Alamva nangin nison, keiva doonsang, tlansang, kivaatna jakhatkho amnohsang; chuta nangvah kireipak sihsang, rilvolnasang, inransang, kimit chosang mahche athlaisang tih i nitak in romnohche.

¹⁸ Alamchunna nangin meia insoorche ra–ao keiningnata nikleinatu nangta kikchaakche. Mah chuvah nangin nidoonnatu kimtheihche, anngou puunrei nisilhnatu che puunrei silhnoh a niamkha indanga injak niphahnoh natu khatkho nangin nimuhnatu nimit a thao teiro.

¹⁹ Keiin kirilvol miita kikchaak che kiraan; chunna niril maluutro mahche niril thlengro.

²⁰ Anro, thongah ngirra kichum; tukhat in kei kiroolhouta theih a inn khata mahoongle, keiin amah kuungah luuttung keiin amahsoh kisaakjoutu che amah in keisoh asaakjoutu.

²¹ Keiinkho raalchek a keipaso inruuia amah phompii ah inbokjou khnanga, tukhat raal akchek miikha keisoh inruuia kei phompii ah inbokjounatu kimjatu.

²² Li in khakla ankuunga asonkha tunangkhat in arungeihnatu amkuur am miikhan rungaiso.’ ”