MADANGNA 21 - Akthar Trongirhna (BSI)

Akthar Ringram Khatkho Akthar Thalei

¹ Chevah akthar ringram khatkho akthar thalei keiin kimuhpei; alamva matsahna ringram khatkho thaleikha maangsa, mahche tuiiboom veikhat inlenga amnoh usa.

² Che Ringpu ningnata akseeng khuuboom, akthar Jerusalem in amsal turella inliing changri nanga ringramnata trum keiin kimuhpei:

³ mahche phompii tingnata roolhou in onga asonta keiin kitheihpei, “Anro, Ringpu in a amna amunkha miisoh inruuijousa. Amah in amahmii eisoh inruuia amjoutu, che anmah in amahmii vei tuei, che Ringpu ataktal in anmahsoh inruuijou tuei;

⁴ mahche amah in amah amii ruithli tlata anuultuei, kthi veikhat amnoh usa, che sinthruui nohle trap che kna a inkou veikhat inlenga amnoh usa; alamva matsahna poot anaamte aralpei.”

⁵ Phompii chungah inbok a am amah in ason, “Anro, keiin poot anaamteta akthar kimveipei.” Che amah in ason, “Mah i majihro, alamva mahtrongi akchim khatkho malotphu.”

⁶ Che amah in keita keison, “Mah i chesa! Keivah Alpha khatkho Omeka ang, kulkung khatkho kulreelsang. Tuii akraalmii kuungah akring doptuinata khangvaalla kimlantu.

⁷ Raal akchek mii khanna aphah tuphukha changtu, che keiin amah Ringpu veitung khatkho amah in kei kisakupa veitu.

⁸ Chuta intritrangei, amlotnoh miiei seengnoh miiei, miithat miisunnei, leili amthruunei, mii masimna trong aktrongei oinang mii anchuumva meiboom chungah mei leh salphar soh kaangkha; mah i innih tihpi kthi khasa.”

Akthar Jerusalem

⁹ Achena lahna natna rii sirih in sip kam sirih akchoi ringroi sirih ankaarna khat in thlenga keikuungah tronga keitih ang, “Tiingvaro, sadamte vaa akmei thareikha keiin nammuhtang.”

¹⁰ Cheva amah in keita Li ah kliin khatkho inkaang muul khat amaa ah keiphurh anga akseeng khuuboom Jerusalem ta Ringpu tingnata ringramma trumta kammuh ang.

¹¹ Mah khanna Ringpu vaa paarthra am, mah akvaarkha amanchaal lung, akseeng lungriilnang;

¹² Khuuboom vaa anrol thong somleinih am mahche thong inrolrel khanna ringroi somleinih ammei mahche thong inrolrel khanna Israel jaatih somlei innihvaa anming ammei.

¹³ Khuuboom amna nisuuktonga thong inthum, akhitonga thong inthum, akhutonga thong inthum mahche nitlaktonga thong inthum ammei.

¹⁴ Khuuboom vaa palkhanna innmun somlenih am. Innmun achung achungah Sadamte vaa raangroi somleinih anming ammei.

¹⁵ Che keikuungah aktrong miikhan khuuboom mahche mah khuboomvaa thong khatkho pal olnatu ra–ao sung inrolkhat amah kuungah am.

¹⁶ Khuboomkha akiing manli, mah adungleh aphei inrol intrim; che amah ra–ao sungah khuboomta kilomitar akpul innihche reija manli aolpei; mah adung, aphei che ankaangvah intrim.

¹⁷ Amah in palta aol in mii khat in mahchuvah ringroi khat in aol chaanga kiil reija soplilei manli suuk.

¹⁸ Khuuboom apaalkha jaspar lungin anseem, che khuuboom asuungkho liklinang akseeng ra–ao in anseem.

¹⁹ Khuuboom pal amunna amanchaal lungah amiliing matsahna amun in jaspar lung, innih tihpi in saphar inthumtihpi akate lung, manli tihpi in imeral lung,

²⁰ ranga tihpi in oniks lung, kuruk tihpi in karnelian lung, sirih tihpi in krisolit lung, kirit tihpi in beril lung, ku tihpi in topaj lung, som tihpi in krisophas lung, somleikhat tihpi in jasin lung, somleinih tihpi in amethis lung.

²¹ Che thong somleinihkha doilung somleinih in anseem, thongrel doilung khatkhat in anseem, mahche khuuboom lamva pitjangnang indang akseeng ra–ao in anseem.

²² Che khuuboom suunga mathruunna thlaam keiin muhnohsang, mahthlaam i Akchek amneh Akpu Ringpu che Sadamte in veisa.

²³ Che khuboomkha avaarnatu kini nohle thlakho darkaar amnohsa, alamva Ringpu vaa paarhtra in mah khanna vaarsa che Sadamte khanna amahtu mitton veisa.

²⁴ Mahche jaatboom anaam in amah akvaar khanna sehtuei; che thaleivaa kurungin amah paarthrata asuungah khanna athlentu,

²⁵ Che mah thong eichuva tiknikho suunna inkhaarnohtu–che mah khanna khulouh khak amnohtu;

²⁶ anmah in mahsuunga jatboomei paarthra khatkho injahna anthlengtu.

²⁷ Chuta mahsuunga akseengnoh mii nohle intritna thlou nohle aklaalthou aktlohmii in luutnoh tuei, chuta Sadamte chaanvaa nirik ah akming injihkhop in luut uningei.