MADANGNA 2 - Akthar Trongirhna (BSI)

Ephesia ah Trong Araan

¹ Ephesia ah am khakla vaa ringroi kuungah majihro: Akchang kut ah arsi sirih akchoi, ra–ao mitton taarna akeh sirih akaara sehloon khavaa atrong mah i.

² “Nang nithlou, nitloh nikhaal mahche nangin nidouchek i keiin kirom, che nangin khatloh a thranoh mii eita loutho cheknohcheme chuta antak anrouinva raangroi sungta insonsei chuta raangroivah veinoh ei, anmahta nangin chaang niannei che anmahvah chimnoh a aktrong miisei tih a niktuukpei;

³ nangin keiming rella klah knang nitho mahche nidou, che nitak ah kmon amnohcheta kirom.

⁴ Chuta mah ivah keiin nangta nandahsang, mahchuvah nikuungah am matsahna rilvolkha nimthlahpei.

⁵ Chunna nangin ramma khatloh a inriil angme intheihro, nangin nirilthlenga matsah nitlohthlou khata tlohro, chunohlevah, keiin nikuungah thlengtung mahche nang nirilta thlengnohchele nang mitton taarna akehkha mah amun khannata kilohtu.

⁶ Chuta mah i nang nitak a am, mah chuvah keiinkho kintirh Nikolai ah am amah in antlohthloukha nanginkho intirhche.

⁷ Li in khakla ankuungah asonkha tunangkhat in arungeihnatu amkuur am miikhan rungaiso. Akchek mii khata Ringpu vaa paradais ah am akringthing asaaknatu kamlantu.”

Smarna ah Trong Araan

⁸ “Smarna ah am khakla vaa ringroi kuungah majihro: Mah i ‘Athihche akring, matsah mahche achena akvei amah atrong oh i!

⁹ “ ‘Nangin trihkhop a klah knang niphah mahche nang innranriing chekha keiin kirom (chuta nangvah kdoonche) che anmah antak invah Judiung antih chuta Judi vanoh ei, chuta Seitan vaa sinakok veia mii loonna antrongta keiin kirom

¹⁰ Nangin klah knang niphahsam kharella intrinohro. Anve, nannihta chaang naniannatu nankaarna mii steva seitan in simma nanithun sampei, che nannih in nijansom trihkhop a klah knang nanphahtu. Thinata akringvaa boorpii kamlan uchou.

¹¹ Li in khakla ankuungah asonkha tunangkhat in arungeihnatu amkuur am miikhan rungaiso. Akchek mii khata innih tihpi kithi in masok masik tlohnohtu.’ ”

Perkamum ah Trong Araan

¹² “Perkamum ah am khakla vaa ringroi kuungah majihro: Veichanga aha innih ngeih chemsei akchoivaa atrong mah i.

¹³ “ ‘Nangin ram amcheme nanthrungna kiromche, mahkhan Seitan aphompii am; nangin keimingta chet a namtuh mahche Seitan in anthrungna nannih nankaara keiin malot aja keitu sakhi akvei Antipas ta anthatnikha phah ah keiin kamlotkha nannih in indahnohchou.

¹⁴ Chuta Israelsa anmaikuungah keh masuihna amvei Balaam in Balak ta leili ah ankat pootta asaaknatu mahche kumei kupa inlaalthlou tlohnatu Balaam in amtheihta chet a amtuh eikha nangkuungah ammei, mairella keiin nangkuungah kandahna ste am.

¹⁵ Mahchunanga Nikolai aknu akjuih in amitheihta chet a amtuh mii nankuungah ammei.

¹⁶ Churella nang niril thlengro, chunohleva keiin ankuungah intha thlengtung, che kibaona chemseiin anmahta raal kantlohpi tuei.

¹⁷ Li in khakla ankuungah asonkha tunangkhat in arungeihnatu amkuur am miikhan rungaiso. Akchek khata mathup a asih matsah steta asaaknatu kimlantu, mahche achunga aktharming inijh lung inngoukhat amah kuungah kamlantu, mah mingchu akphahmii khanoh a tukhat inkho romnoh ei.’ ”

Thatria ah Trong Araan

¹⁸ “Thatria ah am khakla vaa ringroi kuungah majihro: Meibom nanga intruung amit am, mahche meia insoorche pithrainang akeh majaa am Ringpu Asa kupa vaa atrong mah i.

¹⁹ “ ‘Keiin nang nithlou, nang rilvol, nangin nimlot, niroutloh, nidouchek kirom, juktoolna nithlouin matsahna nitlohchungah aral.

²⁰ Chuta atak anroua keivah trongphoong kumeiangta inson Jejebel ta nangin nimjarella nangkuungah kindahna ste am. Kei roijuih eita amah kumei in kumei kupa chimnoh hoongah inchun khatkho leilia inkat inthiimna pootta ansaaknatu matheih a anmahta masimna a asehpiei.

²¹ Amah in kumei kupa chimnoh hoongnata aril thlengnatu lai kimlan chuta amah in arilthleng indah.

²² Anro, amahta mi innata ihnachungah kilontu, che anmah anthlounata anril thlengnoh eileva, amahsoh inruuia miimei miimasal laalthlou aktloh eita trihkhop klah kanangah kithlaaktuei;

²³ che amah asaeita kithattuei. Mahche malungleh rilta akjonkha keisang tihkha khakla annaamte in anromtu. Che matikcha nanthlou nujuih a keiin nannihta mii khatkhat kamlan uchou.

²⁴ Chuta Thatria ah am aktlei tingna mah matheihna ita chet a amtuhnoh, mahchuche Seitan rella thuuk a akromnoh, nankuungah kisonchou, keiin nanchungah aktlei pootrik nanimphurh nohtung,

²⁵ Keiin kithleng nohmiil nankuungah amkha chet a matuhve.

²⁶ Raal akchek mii mahche achena phah a keithlou aktloh amahninga jaatboom anchungah paalnatu amah kuungah tuui kimlantu,

²⁷ che amah in mah thirsung khasoh inruuia anmah anchungah paaltu, beel anseemta koinanga, anmahta invuia kikhoihtuei, mah i keiin Pa kuungnata tuui kiphah khasa;

²⁸ che keiin amah kuungah thlavaarnu kimlantu.

²⁹ Li in khakla ankuungah asonkha tunangkhat in arungeihnatu amkuur am miikhan rungaiso.’ ”