MADANGNA 16 - Akthar Trongirhna (BSI)

Ringpu in Amlung Anhaangna Kam

¹ Chuche mathruunna thlaamnata roolhou khatin ringroi sirih ankuungah anson keiin kitheihpei, “Nannih in sehve, mahche Ringpu in inhaanga asaona kam sirih kha thaleichungah bunve.”

² Chunna matsahna ringroi khanna seh a amah kamta thaleichungah abunpei, mahche saraangvaa daak am khatkho amah leilita amthruunmii anchungha thranoh intritna che intirhsa paan suuksa.

³ Innih tihpi ringroi in amah kamta tuiiboom suungah abunpei, cheva tuiikha akthi mii inkhatvaa athiinangasa, tuiiboom suunga ak am akringpot naamte thisei.

⁴ Inthumtihpi ringroi in amah kamta avaatingah che doptinga aleipei. Cheva mahchu thii in olsei.

⁵ Mahche avaana ringroi in ason keiin kitheihpei, “Nangva akchim pichaar aktlohche, nangva ipek akvei, akveiche khatkho akveisamkha nangche, Akseeng inkhatruningche.

⁶ Alamva mii in akseengei mahche ringraanei anthiita amithlaak khatkho nangin anmah kuungah thii an iinnatu namlannei; alamva anmah in ohkha phah a matikchaei.”

⁷ Che thiilkuung nata aktlei roolhou khat oinanga kitheih, “Oi, Akchekrem Akpu Ringpu, Nang pichaar tlohvah seeng mahche chim.”

⁸ Manli tihpi ringroi khanna amah akamta kinichungah abunpei, mah khanna mii eita kini insa in ankaangnatu kinichungah tuui amlanpei.

⁹ Aktrang kini insaa khanna mii in kaangsei, che klah knang natna rii akphah anchungah tuui am Ringpu akmingta anmah in phool antloh, anmah in anril thlengnoh ei che amahta paar mathratnoh ei.

¹⁰ Ranga tihpi ringroi khanna amah kamta saraangvaa phompiichung abunpei, cheva saraang kurung huunnakha inthimsa; mii in kna thonoh a anmah amileita an eipei,

¹¹ anmah in annat ansatrella khatkho anpaan rella ringramna Ringpu ta phool tloh a trongsei. Che anmah anthlou khannata anril thlengnoh ei.

¹² Kuruk tihpi ringroi khanna amah kamta Euphratis ah abunpei, che kulkung tongnata akthleng kurung turella lam thlouraang tlohnatu amah avaana tuiikha kangsa.

¹³ Cheva ruulpiinu munuh abaonata, mah sa abao khannata mahche chimnoh ringram abaonata uiitroknang chimnoh li inthum inthruhta keiin kimuh;

¹⁴ alamva anmahva thranoh rappu aklisei, anmah in daang jikcha amipaang, anmah in tukleiram pumtetu kurungeita Akchek amneh Ringpu vaa akliinta ralla machunnatu sehsei.

¹⁵ “(Anro, keiin inrunanga thlengsang! Inthranga che puunrei silh a am amahkha doiphah veisa, mahchuvah amah in athlaia sehnohtu che indangkho indangnohtu!”)

¹⁶ Che anmah in anmahta Hibru tronga Armakedon antih amunna anmahta annaamma amichunpei.

¹⁷ Sirih tihpi ringroi in amah kamta thli ah aleipei, che mathruunna thlaamnata roolhou khat phompii nata inthruh a atihpei, “Mah i chesa!”

¹⁸ Chunna kini inthla jikcha, ahou jikcha, khu inri jikcha che aktrang runaangnu thousa, mainang aktrang runaangnu thou i thaleichungah mi in phah anringsuunga oichah aktrang runaangnu lousuuk nohmang.

¹⁹ Kliin khuboomta inthum suuk a akhoihpei, che ramboomei, khuuboom eita inpilsei, che amah in inhaanga asaona tuiibuh chaplakha kliin Babilon kuungah amlannatu Ringpu in amahta intheihsa.

²⁰ Tuiikoiram naamte atlaankirpei, tukhat inkho muul inkhatluungkho tuuk cheknohsei.

²¹ Ser reijavak rik khurah in marvaannata miichungah tlasei, khurah khanna miita khalmo ammaangrella mii in Ringpu ta phool antloh phah a mah klah knangkha khalmo trihkhopna vei.