MADANGNA 15 - Akthar Trongirhna (BSI)

Ringroisoh Inruuia Achena Natna Rii

¹ Che ringramma kliin mahche salungkhouna aktlei aksuuksam daangkhat keiin kimuhpei, ringroi sirih natna rii sirih mahche achenakho veisa, alamva ohchunna Ringpu in inhaanga asaonakha achenasa.

² Che meisoh inpool likli nanga intle tuiiboomnang inkhat indang kimuhpei, che tunangkhat in saruung, amah leili che amah akmingvaa amahsingta raal akchek mahkha liklinang intle tuiiboom akomma Ringpu vaa snantata ankut ah choia ngirra ammei.

³ Che anmah in Ringpu roijuih Moses alaa khatkho Sadamte anlaata tloh a anson, “Nang nithloua li inkho liinnei mahche salungkhou nakho veiei, Akchek amnehrem Akpu Ringpu o! Nang nilamva anaamtea seeng mahche chim, chup chuptu kurungo!

⁴ Akpu o, tunang in nangmingta paar mathratnoh mahche trihnoh tueime? Alamva nangkhopta seeng ningche. Jaatboom naamtein thlenga nangta namthruuntuei alamva nang pichaar naamteta amdangpei.”

⁵ Mah i aknua keiin kianpei ringramma sakhi veia mathruunna thlaamkha inhoongsa,

⁶ mathruunna thlaamnata natna rii sirihsoh inruuia ringroi sirih in inthruhsei, anmah in akseeng intlepuun ansilh, anlukhe a ra–ao puun inraakei.

⁷ Che akring kutseemsa manli ankaara khat ringroi sirih ankuungah ache amnoh a ring Ringpu in inhaanga asaona in sip ra–ao vaa kam sirih kha amlanpei;

⁸ mahche mathruunna thlaamkha Ringpu vaa paarthtra nata che amah tuui nata meikhuin sipsa, mahche ringroi sirihva natna rii sirih kha achenohmiil, tunangkhat inkho mathruunna thlaam asuunga luut cheknoh ei.