MADANGNA 11 - Akthar Trongirhna (BSI)

Sakhi Innih

¹ Cheva keiningah ram olna sungnang inkhat keipekang che ringroi khanna ngirra keisonang, “Inthouro, che Ringpu mathruunna thlaam mahche thiilkuungkha olro che thiilkuung khanna amthruun mii eikha teenro,

² Chuta mathruunna thlaampaal khavah olnoh a mahro, alamva mahkha aktlei jaatboom ankuungah kimlanpei, anmh in akseeng khuboomta thla soplilei innih ankeh ah anchilhna veitu.

³ Che kei sakhi akvei innihtingah tuui kimlanpei, anmah in putsi silh a nijan akpulkhat che reija innihlei sopruk trong anphoongpei.”

⁴ Anmahchuvah thaleivaa Akpu amaikuungah chorphol thing akuung innih akngir chorphol akuung innihche mitton innih taarna akeh khasa.

⁵ Tukhat in anmahta masok masik eileva, anmah anbaonata mei inthruh a anmah jeknaeita meia ahaalkhem tuei; tukhat in anmahta masok masik eile, nga tloh a anmahta athattuei.

⁶ Anmah in trong anphoonglaia khu masuurnohnatu marvaan khanna anmah ankuungah antuui am, thii ma–olnatu tuiichungah anmah antuui am, che anmah in andit antlohja laia tlohnatu natna rii jikchasoh thaleita maratnatu anmah antuui am.

⁷ Che anmah ringtukna thaminta malan ancheche adongna amnoh khurnata inthruhsei anmah anchungah raal atlohtuei, anmah in raal achektuei che athattuei,

⁸ antak akthi anruungta khalmo kliin khuuboom intlaap lamma intolh a tla amtuei, mah khuuboom kha anruk mingvah Sodom mahche Ijip tih a an ong, mah amunkhanna inih Akputa thingkharh ah anthat.

⁹ Alamva miiei tingnata, jatih ei tingnata, trongei tingnata, jatboomei tingnata akthlengei in anmah akthi anruungeita nijan inthum tangkhai anmit intlelit a an antu che anmah akthi anruungta rusuunna phuum indah ei,

¹⁰ thaleichungah am mii in anmah rella anroomthoktuei khatkho tlantuei, che anmah in khatleh khat poot inpetuei, alamva anmahta khalmo amlah amnangei.

¹¹ Chuta nijanthum che tangkhai aknua Ringpu tingna akring akphukha anmah kuungah luutsa che anmah ankeh in ngirsei, khatkho anmahta akmuhmii in khalmo intritna suuksei.

¹² Cheva “Maiphah hangve” tih a ringramtingna roolhou khat anmah kuungah thleng antheihpei. Che anmah jeknaei in anmahta anmuhpei.

¹³ Che mah pungtal chunna runaangnu tranga thousa, chunna khuboomkha somsuunga inkhat inpilsa; che runaangnu thoukhanna mii akpul sirih athatpei, thinoh a ak am in khalmo intriseia ringramma Ringpu ta paar amithratpei.

¹⁴ Innih tihpi lahnakha chesa; anro, inthumtihpi lahnakha intha thlengsa.

Sirih Tihpi Pik ul

¹⁵ Mahche sirih tihpi ringroi in amah pik ulta atumpei, che ringramna rolhou in inkaanga onga anson, “Tukleiramma kurung huunnakha inih Akpu mahche Khrista vaa kurung huunna veisa, che amah in ache amnoh a paaltu.”

¹⁶ Mahche Ringpu maikuungah anmah phompii ah anbok anparuul sopnilei manli in anmai inluk a Ringpu ta mathruunna,

¹⁷ ansonpei, “Akchek amneh Akpu Ringpu, nangta kannih in kamipaakche, nangvah pekkho, akche akho mahche akthlengsam akho akvei nangningche mahche nangtingna aktrang tuuita loua paal namthronpei.

¹⁸ Jatboom in inhaangsei, chuta nangin trihkhop a nimlung inhaangkha thlengsa khatkho aktleita nangin pichaar nitlohnatu laikha thlengsa, alamva nang roijuih ringraan eita; akseengeita, nang nikmingta trih a ak ong, andih khatkho anroleita khaan namlannatu che tukleiram ammaanngei anmahta mamaangnatu laikha thlengsa.”

¹⁹ Cheva Ringramma Ringpu vaa mathruunna thlaamkha inhoongsa, che amah trongirhna pheichepkha amah mathruunna thlaamsuungah kimuhpei; ohkhanna lit litta khu inthla, roolhou, khu inrihou, runaangnu thou, mahche khurah tranga tlasa.