MADANGNA 10 - Akthar Trongirhna (BSI)

Ringroi Khatkho Indih a Injuul Nirik

¹ Sumphai ah inlep aktlei akchek amneh ringroi khat ringramnata trum kimuh, amah akangchungah sarbong inkhang, amah akmeiivah kininang, che akeh in mei kukchonang.

² Amah akut ah injuul nirik andihkhat injarh a am mahche amah akchang akeh in tuiiboom chungah asihche akveitong akeh in tukleichung asih,

³ Che saruung in kraanghou aksangnanga ahousuuk a inraamsa; amah in tranga onga anraam in keklei sirih in anmah anhou amithruhpei.

⁴ Keklei sirih in anhou anringlai keiin majihtangta insuullang, chuta ringramna houkhat in keikuungah nga tloh keisonang, “Khu inri sirih in asonkha chum namro, chuta mah i majihvah majihnohro.”

⁵ Tuiiboom khatkho tukleichungah ngirra am keiin kimuh ringroi khanna akchang kutta ringramting akdompei.

⁶ Che ringram khatkho mahsuungah ak am poot anaamte, thalei khatkho mah asuungah ak am poot anaamte amah in aseem ache amoh a akring amahta sonna seita antlohpei, mahchuvah “Mahkha thilsa tih a isonna amnohtu.”

⁷ Chuta sirih tihpi ringroi in amah pik ulta atumnatu onga mahnichunna Ringpu in amah roijuih ringraan ankuungah sonna amdang khananga Ringpu vaa anthup trongkha amthlung usa.

⁸ Cheva ringramtingna trongla kitheih khanna keikuungah veikhat tronga keitih ang, “Sehro, tuiiboom mahche tukleia akngir ringroi akut ah injuul nirilkha louro.”

⁹ Ohchunna keiin ringroi kuungah seh a, nirik indih injuulkha kinihpei; amah in keita keisonang, “Mah i louva saaro; mah inna nang nivonta amkhahtu, chulata nang nibaoa khuuining nanga amthlumtu.”

¹⁰ Mahchu kbaoa khuuining nanga thlumsa, mahchuta kisakcheva kivonchu amkhahpei.

¹¹ Che ringroi in keita keitih ang, “Nangin veikhatla miiei turella, jaatboomei turella, trong chahchah irella mahche kurungei rella niphoongtu tlasa.”