LUKE 9 - Akthar Trongirhna (BSI)

Aroi Somleinihta Amthlah

¹ Aknu achunna Jisu in aroi somleinihta aongche, khousaar naamteta cheknatu mahche natna satna naamteta mathratnatu tuui ankuunga amlanei,

² Cheva anmahta Ringpu kurung huunnata anraannatu mahche akna aksaeita mathratnatu amthlah ei.

³ Che ankuunga asonei, “Rapkheitla nansehnatu sungrolh slakho, thong slakho, tol slakho baobeh slakho, jakhatkho phurhnohve, inluut innih phurnohve.

⁴ Che nannih in nanluutna innkhanna tlungve, che mah khannata inthruhkho inthruhnohve.

⁵ Che tunangkhat in nannihta nanisoongnoh eile, khuuboom khannata nannih in nanthruh laia nannih nanchunga sakhi aveinatu nankehna uphulta mathiimma mahve.”

⁶ Cheva anmah in khuu khuua seh a Akthra Trong anraan mahche akna amithratei.

Herot in Anhalna

⁷ Chunna Herot ramngaak in aksuukthlou naamte i atheih in khalmo inhalsa, alamva arouin John ta akthi ankaar nata kiringsa ta anson,

⁸ arouin Elaijah ta indangsa, che aktlei in ringraan amlui ankaar nata ringsa ta anson.

⁹ Herot in ason, “Keiin John akang kitanpei, chuta keiin amah relna oinangtrong ktheih mii i tusame?” Churel Jisu ta amuhnatu ajon.

Mii Akpul Rangata Amsaak

¹⁰ Chunna raangroi in anlenglai anmah in antloh ankhal thlouta Jisu kuung atongpei. Cheva Jisu in anmahta phurh a Bethsaida antih khuuboom khat a ajea anthleipei.

¹¹ Chunna miitam in mahchuta anromma amah aknu anjuihpei; che Jisu in anmahta thratea lousoonga Ringram huunna relna trong mahche natna thra akdi anmahta amthrat ei.

¹² Pek kini atlaktum somleinih in Jisu kuunga thlenga anson, “Miitam ei i mahvel inna kooi a am khuu khuu leh khuuboomma ansaak an iin antuuknatu mahche anriknatu mathlah eirosa; alamva inih in mii amnohna achikna a amsame.”

¹³ Chuta Jisu in ankuunga asonei, “Nannih in anmah kuunga saakphu malaneive.” Anmah in anson, “Inih in seh a mii naamte turel ansaakphu leinoh maleva, ikuunga tol atum ranga leh nga innihnata ralla amnohsa.”

¹⁴ Alamva anmahva kupa akpul rangavak ei. Jisu in aroikuunga asonei, “Anmahta mii sopnga sopnga loom veia mabok eive.”

¹⁵ Che nga tloh a anmah naamteta amibokpei.

¹⁶ Mahchunna Jisu in tol atum ranga leh nga innihta louva ringram intouva a anche doi malanna mahchuta khoia miitam ankuunga ansemnatu aroita amlanei.

¹⁷ Che anmah naamtein saa a anvon invahsei. Che anlei akirkaar luktoong somleinih anchunpei.

Jisu Relna Pitar in Amdang

¹⁸ Ipek nga tloh a suuksa mah chuvah Jisu in akroua angenlaia aroi in amahsoh inruuijouei; che anmahta aruiei “Keita mii in tume kantih angme?”

¹⁹ Che anmah in amisang, “Aklup John, chuta arouin Elaijah, che aktlei in ringraan amlui ankaarna inkhatta ringsa ta nansonei.”

²⁰ Che Jisu in asonei, “Chuta nannih inva keita tume nantih angme?” Che Pitar in amsang, “Ringpu vaa Khrista khache.”

Jisu in Klah knang Aphahsam che Athihsamrel Trong

²¹ Chuta mah i tukhat kuungakho antongnoh natu tranga asonei,

²² “Miivaa Asa kupa in klah knang khalmo aphahtu tla, anparuul ei in, akthloi thiimpu mahche ringjih lulok eiin amahta indah a anthattu, che nithum tihpia amah in ringtu.”

²³ Mahche Jisu in mii naamteta ansonei, “Tukhat in kiknu keijuihtang tihle, atak akrouin janohsoh akni aknileh thingkharhta loua kiknu keijuihso.

²⁴ Alamva tukhat in amah achaanta ankaljale maangtu, che tukhat in kei turella amah ali maangle, amah in inkal aphahtu.

²⁵ Alamva mii inkhat in tukleiram apumte aphahche ataktal maang nohle tum veile amahtu achuungna jangamsame?

²⁶ Alamva tunangkhat in keirella mahche keitrong rella injak phahle, miivaa Asa kupa in Apa leh Akseeng ringroivaa paarthra a athlenglai injak aphahtu.

²⁷ Chuta keiin nankuunga taktak a kisonchou, onna angirmii arouva Ringram huunna anmuhnohmiil kthita matemnoh usei.”

Jisu Ameel Amthlei

²⁸ Ipek mahtrong ita asonche nijan nirit aknua Jisu in ataksoh inruui Pitar, John mahche Jems ta phurh a ngennatu muulla kalsei.

²⁹ Che amah in angensuunga, Jisu vaa ameel amthleipei apuunreikho inngousa intlekho intlesa.

³⁰ Che anve, mii innih in Jisu soh trongei, anmahchuva Moses leh Elaijah ei,

³¹ Anmah in paarthrata mamuh a Jerusalem mapung amiphahnatu Jisu in asehnasam rella trongei.

³² Pek Pitar leh amahsoh anruuipiva an ihmua mitchusei, anmah in inthranga an anlai Jisu vaa paarthra che amahsoh ngirjou mii innihta anmuhpei.

³³ Chunna anmah in Jisu kuungnata anthreklaia Pitar in Jisu ta ason, “Inih in onna iam thra; chunna thlaam inthum tlohrei, nangturel inkhat, Moses turel inkhat mahche Elaijah turel inkhat tlohrei” — amah in jangta asonme romnoh.

³⁴ Che amah in trongi asonsuunga, sumphai thlenga anmahta akhalpei; anmah in sumphai kaar a anluut in intrisei.

³⁵ Che sumphainata hou inkhat thlenga ason, “Mah i keiin kichar Kisa kupasa; amah in ason rungaive.”

³⁶ Che mahouchu atrongche, Jisu akrouta am anktuuk ningsa. Mahchunna anmah in rimta amsei, che mahlai anmuhkha tukhat kuungkho sonnoh ei.

Thranoh Li in Anruuipi Kupasa Khatta Jisu in Amthrat

³⁷ Che akhuvar a, anmah in muulnata antrumlai, mii tamsoh intuuksa.

³⁸ Che anve, miitam ankaar nata kupakhat in ongsa, “Lulok, kisa kupata anrota amthruun, alamva amah i keitu veia khalekru kpok kisa kupaning;

³⁹ anro, li inkhat in amahta suura asih, cheva amah in kak hanga ongsa; abaoa amchilkho inthruh a akchut, che khalmo masok a akuungnata mah indah a inthruhsa.

⁴⁰ Amahta aminomnatu nang niroita kisonei chuta manom cheknoh ei.”

⁴¹ Jisu in amsang, “Ah, malotnoh mahche inhe ringnatluun, keiin nannihsoh jikcha sot a amjouva kdou uchoume? Nisa kupakha onna thlenro.”

⁴² Amah in athlenglai, khousaar in amahta chutchit a amlah. Chuta Jisu in akseengnoh lita asaalche, kupasa khata amthratpei, che apakuunga naota amlanpei.

⁴³ Anmah naamtein Ringpu vaa achek amneh thlou khanna salungkhousei. Chunna Jisu in atlohthlou anaam khanna mii naamtein anhalsuunga aroita asonei,

Jisu in Athihsam Rella Veikhatla Asontrong

⁴⁴ “Mahtrongi namikuura thunve; alamva miivaa Asa kupata miikut a amilansampei.”

⁴⁵ Chuta mah asonni anmah in romnohsei, che anmah in ohchuta anlohtheihnoh natu mahche khiial antlaknoh natu anrilta amthup; cheva mairella anmah in akuunga akrui trihsei.

Tunang in Akliinrem Vei ume?

⁴⁶ Anmah akaar a tuin ralla akliinrem umeta trong inkharhkhirsei.

⁴⁷ Chuta Jisu in anmah anrilla trong inkharh a amidonchuta aromma andihnao inkhatta akuunga kaia asihche,

⁴⁸ asonei, “Tunangkhat in keiminga amah andihnao ita louchoule keita nanloh ang, che tunangkhat in keita keilou choule keita kamthlah amahta nanlohpei; alamva nannih nankaar a andihrem amah in akliinremtu.”

Tunangkhat in Nannihta Nanian dahnohleh Nanmiisa

⁴⁹ John in amsang, “Akpu, mii khat in nangminga khousaar amnomta kanmuh a kankhaam, alamva amahvah inihsoh inruuijou miinoh.”

⁵⁰ Chuta Jisu in ankuunga asonei, “Amahta khaamnohve; alamva nannihta nanijetnoh miikha nannih nanmiisa.”

Samaria Khuuna Mii in Jisu ta Lou Indah ei

⁵¹ Chunna Jisu ta anroulohnatu laikha anai in, atak in Jerusalem phah a asehnatu aril amngirhpei.

⁵² Mahche Jisu in amah amaa a mii aloumathlah natu atirh ei, Jisu turella thlouraang antlohnatu atirhmii khanna Samaria khuukhat a luutsei;

⁵³ chuta mah khanna mii in amahta loulounohsei, alamva atak in Jerusalm phah a asehnatu aril amngirhpei cheva anmah in Jisu ta loulounohsei.

⁵⁴ Amah aroi Jems leh John in mahchuta anmuh in anson, “Akpu, marvaan tingna mei mathlah a anmah in ankaangkhem naturel kansonnatu kanimtlohja cheme?”

⁵⁵ Chuta anmahta inheia asaalei.

⁵⁶ Cheva anmah in khuu inkhat a sehsei.

Jisu Aknu Akjuihja Mii

⁵⁷ Chunna anmah in lamma nga ansehlai, mii khat in akuunga ason, “Nangin niseh nilonna naamtea niknu kijuih uche.”

⁵⁸ Mahchunna Jisu in akuunga ason, “Uiiramuiivaa ankhur am, che marvaanna vakho anbu am; chuta miivaa Asa kupava akang asihna munkho amnoh.”

⁵⁹ Mahche aktlei in khat kuunga ason, “Kei kiknu keijuihro.” Chuta amah in ason, “Akpu, keiin matsah a kipata akphuum kisehnatu keijamanro.”

⁶⁰ Chuta amah in akuunga ason, “Akthi in antak anroua anphuumnatu akthita mah eiro; chuta nangva seh a Ringpu kurung huunnata raanro.”

⁶¹ Mahche aktleikhat in ason, “Akpu, keiin niknu kijuih uche; chuta keiinna ak am eita matsah a saammaan tangei.”

⁶² Jisu in akuunga ason, “Tunangkhat in akut a langkol amtuhche aknung inheia ak an mii in Ringpu kurung huunna turella amahvah matik chanoh mii.”