LUKE 8 - Akthar Trongirhna (BSI)

Jisu Aknu Akjuih Kumei

¹ Mahchuche aknua amah in khuuboom khuuboomma che khuu khuua Ringpu vaa kurung huunna Akthra Trongta raanna sehsei; che aroi somlei nihkho amahsoh inruuijousei.

² Mahche thranoh li in akluut che kumei arou aknaeita amthrat ei, khatkho amahkuung nata khousaar sirih in anthruhna Meri Makadalili,

³ che Herot vaa ataploikuunga thlou amrel Khuja akmei Joana leh Susana, aktlei kumei jikcha in anmah andoon ankhaal mathruh a amijoom.

Chivorh Pandam

⁴ Mahchuche khuupii jikchanata miitam in Jisu kuunga anthleng in, anmah kuunga pandam malanna asonei.

⁵ Chi akloon mii in amah chita avorhnatu sehsa; che amah in chi avorh in chi arouin lamkomma a tlasa, che mahchu keh akho anchilhpei, marvaanna va inkho ansaakpei.

⁶ Mahche chi arouin lungkaara tlasa; che mahchu amoongin leipii amnohrel chaarsa.

⁷ Mahche arouin kuling kaara tla, che kuling in mahchusoh jouta amoongche ahippei.

⁸ Aktleiva akthra leipiia tla a che mahchu moonga akrah suruk reija inrah. Tronglam i asonsuunga Jisu in onga ason, “Tunangkhat in rungeihnatu amkuur am miikhan rungaiso.”

Pandam Artha

⁹ Chunna Jisu aroi in amahkuunga anrui, “Mah pandam iva artha jangsame?”

¹⁰ Mahchunna Jisu in asonei, “Ringram huunnavaa anthuptrong romnatu nankuunga kamlanchou; chuta aktlei ankuung avah anmah in muh a anmuhnoh natu, che rungaia anlohtheihnoh natu pandam veia kison.”

Chivorh Pandamta Invuia Matheihna

¹¹ “Pandam chuva maisa: Chi i Ringpu atrongsa.

¹² Lamkom na in arungai miisei; mahchunna seitan in thlenga antak in malot a inkal anphahnoh natu anril suungnata trongkha sut a aloh ei.

¹³ Lung achungnava anmah in anrungeih in trongchu roomthok a anlouloh, chuta akjung thuuk a athlaknohrel lai kakruta amilot che madoi athlenglai anril inleng anmahkhasei.

¹⁴ Kuling kaarna khava anmah in antheihche, anmahtu annono anhoong anva laltu rilla roomthok in achek a thra marahna janoh.

¹⁵ Mahche akthra leipiina khava akseeng leh akthra anril in trongkha anrungeih che chetkenga choia andoutheih a thra inrah anmahkhasei.”

Meiser Luktoonga Makhum

¹⁶ “Tukhat inkho meiser ataarche luktoong makhumnoh ei, chunohle ihnathuuia sihnoh ei, chuta akluut mii in akvaar khata anmuhnatu meiser taarna achunga anthong.

¹⁷ Alamva indang cheknohtuta inthup a amtu jakhatkho amnoh, che inromnoh tuta inthup a amtu jakhatkho amnohtu.

¹⁸ Churelna nannih in jaknang hoonga nantheihme cheksilve; alamva ak am mii kuungah ralla kamlantu, che ak amnoh mii kuungnata amah in ste asihkhaphao klohtu.”

Jisu Anu Khatkho Anaoei

¹⁹ Mahche Jisu anuleh anao eiin amahta inmuhpinatu amahkuunga anthlenglai, mii tammal khanna amahkuunga luut a inmuhpi cheknohsei.

²⁰ Mahche Jisu anuleh anao eiin amahta inmuhpinatu apaalla ngaak a amsei.

²¹ Chuta Jisu in ankuung asonei, “Ringpu trongta nantheihche athlou veia aktloh anmahta kei kinu che kinaosei.”

Jisu in Khusuur Thliraang Akhaam

²² Nikhatnia Jisu leh aroi in mulia chuungsei che ankuunga asonei, “Inih in tuiiram araalla inkahrei.” Mahchunna anmah in muli anthohsuunga Jisu vah insa. Che tuiiramma khuleh thli karaangsa. Cheva tuii aklek a anmah in thihnaringna a tlasamsei.

²³ Anmah in mulita thoua anseh in amahva insa: Cheva tuiiramma khuleh thli tranga karaangsa, chunna mulisuunga tuii sipsamma thihnaringna anphahpei.

²⁴ Cheva anmah in Jisu ta mathoua anson, “Jisu, Jisu, kannih thisamsung!” Mahchunna Jisu in inthoua thlileh tuiisolh amthronta akhaam in annih a inngaia inneemsa.

²⁵ Mahche Jisu in ankuunga asonei, “Nannih in namilot khosame?” Chunna anmah in trihkho trih a salungkhoukho khouva khatleh khat insonsei, “Thlileh tuii inkhoh amah atrongta amijuih Jisu i tumeio?”

Jisu in Khousaar chuung Miikhatta Amthrat

²⁶ Chunna Kalili soh maingat a am Kerasenis khuuboomma anmah in tlungsei.

²⁷ Mahche Jisu in tuiipaalla anthruhlai, khousaar chuung mii khat khuuboom nata inthruh a Jisu soh intuuksa; alamva amah in khalmo sot a puunreikho silhnoh inn akho amnoh, chuta rusuunkaara am.

²⁸ Amah in Jisu ta amuh in onga Jisu amaikuunga intlolh a ahou inkaanga ason, “Akthloirem Ringpu Asa kupa Jisu o, nangin keita jangtlohtang nitihme? Keiin nangta kamthruunche keita kamlahnohro.”

²⁹ Alamva Jisu in mahmii chunnata anthruhnatu akseengnoh lita jathang amlan. (Alamva seengnoh li in amahta lai amrel asuur; che mii in amahta seel seilakho, thirruia kaanseilakho che ahang masuur seilakho, amahta ankaannakha akpotkir mahche khousaar in amahta raprilla amnom.)

³⁰ Mahche Jisu in akuunga arui, “Nikming tume?” Chunna amah in ason, “Lejan” alamva khousaar tam in akuunga luut ei.

³¹ Khousaar in kannihta adong amnoh khur a kansehnatu jathang kanitlohnoh rota Jisu kuunga anngen.

³² Pek muulkaar a vokjaam khat anthlai saa ammei; che anmah in kannihta vokjaam ankaar a kanluutnatu kanijarota Jisu ta anngenpei. Mahchunna Jisu in anmahta ajapei.

³³ Cheva khousaar in mii chunnata inthruh a vokjaam kaar a anluutche tuiiramma hunpeia tuii luut a raangchatsei.

³⁴ Cheva vokjaam aksel in mah aksuuk khata anmuh in tlaanna khuuboomma khatkho ramboomma antongpei.

³⁵ Cheva mah aksuuk chuta ak an heihei inthruhsei, che anmah in Jisu kuunga thlengsei, khousaar in inthruh a amah miikhan puunreikho silh a invetnoh ramroom veia Jisu kuunga inbok a am anmuh in intrisei.

³⁶ Cheva khousaar asuur amahta khatloh a thrakhem meta akmuh mii in akthleng ankuunga antongpei.

³⁷ Cheva Kerasenis ramta kooi a ak am mii in anmah ankuungnata mah a asehnatu Jisu ta anson; alamva anmah in intri suuksei; cheva amah in muli chuunga inlengsa.

³⁸ Chunna khousaar in inthruh a amah mii khanna Jisu soh inruuitangta akuunga angen; chuta amahta mathlah a ason,

³⁹ “Nang ni inna inlengrosa, che Ringpu in nangturel jikcha phah akliinthlou naktlohme sonna madangro.” Chunna amahturel Jisu in jikcha phah akliinthlou atlohmeta khuuboom apumtea sonna amdangpei.

Jairas Asakumei Khatkho Jisu Apuunta Akpal Kumei

⁴⁰ Ipek Jisu in anlenglai miitam in amahta roomthok a anloulohpei, alamva annaam in amahta anloungaak.

⁴¹ Mah khanna akming Jairas an ong kupatkhat thlengsa, amahvaa sinakok akpuui mii; amah in Jisu akehkungah intolh a keiinna thlengrota angen,

⁴² alamva asakumei inkhatruning, kum somlei innihvak thisamma am. Jisu in athlenglai miitam in anlompei.

⁴³ Mahche tukhat inkho amithrat cheknoh kum somleinih thii luunga kna kumei khat in,

⁴⁴ Jisu kuunga thlenga, amah apuunpaarta apal; cheva amah athii luungchu kak hanga indoonsa.

⁴⁵ Mahchunna Jisu in ason, “Keita keipalkha tunangme?” Mii naamte in nakpalnoh ungta andah inva, Pitar in ason, “Akpu, miitam in nangta naklommei che nangkuunga inhommei!”

⁴⁶ Chuta Jisu in ason, “Tumekhat in keipallang; alamva kei kuungnata tuui inthruhsa, kirom.”

⁴⁷ Kumei khanna kei i inthup janoh tunaisang ta arompeia amah in inchuunna thlengsa, che amahkuunga intoltlep a jarella amahta kapalme mahche khatloh a kak hanga keita kamthrat angmeta miinaam anmaikuunga asonpei.

⁴⁸ Che Jisu in kumei akuung khanna ason, “Kisa kumeio, nangin namlot kharella nangta namthratpei; leh oia sehrosa.”

⁴⁹ Jisu in atrongsuung talla rampuui innata mii khat in thlenga a ason, “Nang nisa kumeikha thisa; Lulokta inlenga chutnoh rosa.”

⁵⁰ Chuta ohchuta Jisu in atheih in akuunga amsang, “Intrinohro, malotru malot paningro, amah in thratu.”

⁵¹ Inn achunna amah in athlenglai, Pitar, John, Jems inkhatkho naova apa leh anu noh a tukhatkho asuunga luutpinohsa.

⁵² Cheva amahturel miinaam in trapkho trapsei, che sinthruuisei; chuta amah in ason, “Trapnohve; alamva amahvah thinoh, chuta inning.”

⁵³ Amah naoi thisa anromma Jisu ta aminuihpei.

⁵⁴ Chuta Jisu in nao akutta matuh a aong, “Rungaak o, inthouro.”

⁵⁵ Mahchunna amah akli inlenga, kak hang ngirsa; che amahkuunga saakphu malanveta jathang amlanei.

⁵⁶ Cheva anu apa in salungkhousei; chuta mah aksuuk i tukhat ningkho sonnohveta Jisu in ankuunga aktrang jathang amnanei.