LUKE 7 - Akthar Trongirhna (BSI)

Rome na Phrangki Amah Roijuihta Jisu in Amthrat

¹ Amah in mii kuungah trong asonche aknua Kaparnaum a luutsa.

² Ipek raalmii reijapuuivaa roijuih inkhat in kna a thisamma am, amah roijuih in amah akputa khalmo klua aktlohmii.

³ Amah in Jisu ta atheih in Judi ei anparuulta amahkuunga mathlah a amah roijuihta thlenga amthratnatu atirh ei.

⁴ Amah in Jisu kuunga anthlengche amahta inruruh a ason, “Mahmii matikcha mii turel thlou nitloh in thratu,

⁵ alamva amah in inih jatihta arilvol, che inih sinakokta iniseem.”

⁶ Chunna Jisu in anmahsoh sehjousa. Chuta Jisu in inn khasoh khalmo anlahnolai raalmii reijapuui in amah aruulkhatta mathlah a Jisu kuunga amson, “Akpu, nitakta malahnohro, alamva Akpu in keiinna nithlengsam i keiva matik chanoh ang;

⁷ alamchunna keitalkho nikuunga thleng matik chanoh angta kamdon. Chuta trongruta son paningro, chunna kei roijuih in thratu.

⁸ Alamva keiluungkho akchek amneh khatvaa athlanga ammiiang, kei kithlanga raalmii ammei; in khat kuunga ‘Sehro’ ta kison in seh; mahche in khat kuunga ‘Varo’ ta kison in va, mahche ‘Mah i tlohro’ ta kison in atloh.

⁹ Mahchuta Jisu in atheih in salungkhousa, che amah aknu akjuih miitamta inheia asonei, ‘Keiin nankuunga kitihchou, Israel ankaar a oinang mii khatkho tuuknoh ang.’

¹⁰ Amah in amthlah mii in innkhanna anlenglai amah roijuihva thra a louamsa.”

Trulmeinu Asa Kupata Jisu in Amring

¹¹ Mahchu aknua Nain kuuboomma amah in sehsa, che amah aroi leh miitam in amasoh inruuia sehsei.

¹² Amah in khuboomvaa kolol anailai, anve, akthi miikhatta anpuih. Mah chuvah anu trulmeinu in apok asa kupa khalekruning, khuuboomna miitam in trulmeinusoh inruuia seh ei.

¹³ Akpu in trulmeinu chuta amuh in, arilvol hanga akuunga ason, “Trapnohro.”

¹⁴ Che amah in innaia avache ukuta apalpei, ukuta akpuui in ngirra amsei. Chunna amah in ason, “Intlango, keiin nikuunga kisonche, inthlouro.”

¹⁵ Cheva akthi mii in inthousa, mahche trongkho amthronpei. Cheva intlangsa chuta anukuunga amlanpei.

¹⁶ Miinaam in intri suuksei; che anmah in Ringpu ta paar mathrat a ason, “Akliin ringraan inkhat ikaar a inthruhsa!” che “Ringpu in amah amiita thlenga a anpei!”

¹⁷ Amahrella antong trongi Judia apumtea mahche mahvella inhiilla am ramboom anaamtea inthek a sehsa.

Aklup John tingna Trong Akraanei

¹⁸ Mah naamte i John aroi in akuunga ansonpei.

¹⁹ Mahchunna John in aroi innihta onga Akpu kuunga mathlah a amsonei, “Akthleng samkha nang sacheme, chunoh a kannih in aktleita kan an umangme?”

²⁰ Mahche mii in Akpu kuunga anthlenglai anmah in anson, “Tui aklup John in kannihta nikuunga kanimthlah a kanimruiung, ‘Akthleng samkha nang sacheme, chunoh a kannih in aktleita kan an umangme?’ ”

²¹ Mah pungtal achunna Jisu in akna aksa jikcha, rii natna jikcha mahche thranoh li in luut jikchata amthratei, che amah in mitcho jikcha muh amphah ei.

²² Chunna Jisu in ankuunga amsangei, “Nannih in nantheih khatkho nanmuh anaamtekha John kuunga seh a sonve: mitcho in anmit muh anphahpei, kehtlik in seh anchekpei, reichi kop in tlengsei, amkuur akpang eiin antheihpei, akthita amringei, aran anriing ankuunga akthra trongta raanna rungaia theih amphahpei.

²³ Tunangkhat keita keivatnohmii khavah doiphah veisa.”

²⁴ John vaa trongraan ei in anlengnua, John relna miitam kuunga Jisu in son amthronpei: “Nannih in raprilla jangta ak an sehchoume? Thli in aklok raphaltame?

²⁵ Chuche nannih in jangta nan annatu sehchoume? Anneem puun aksilh miikhattame? Anve, khalmo thra inliinga puunrei silh a tlanna akpaal anmahvah kurung kool a amsei.

²⁶ Churella nannih in jangta ak an sehchoume? Ringraan inkhattame? Oi, keiin nankuunga kisonpeichou, amahvaa ringraan inkhatchung akralsa.

²⁷ Mah i amah turella injihsa, ‘Anve kei trongraanta nanmaikuunga kamthlah, amah in nannih nanmaa a nanlam amchaangtu.’

²⁸ Keiin nankuunga kisonchou kumei in anpokaar a John ta ralla anrol tukhatkho amnoh; chulata Ringpu vaa kurung huuunna avah andihrem amah in inrolrem veitu.”

²⁹ (Mahchuta aktheih mii naamte khatkho roithraiei in aklup John phah a Ringpu ta amichimpei;

³⁰ Chuta Pharisi mahche ukil ei invah aklup John kha phah a anmah atak turella Ringpu in amdonkha indahsei.)

³¹ “Chunna mah ringnatluun na mii ita keiin jaknangsoh kamlak ume, che anmah in khonang seime?

³² Anmahva keithiilla inbok a khatleh khat ong nao khanangsei, kannih in nannih turella pasi kantumta, nannih in laamnoh sachou; kannih in tinta kantlohta, nannih in trapnoh sachou.

³³ Alamva aklup John in tolkho saanoh a, ngangli tuiikho iinnoh a thlengsa; nannih in ‘Amahta khousaar amrui’ ta nanson.

³⁴ Miivaa Asa kupa in saa iinna thlengsa; che nannih in nanson, ‘Anve, avonpii liin mahche tuiibuh ak iin, roithrai mii mahche alehchel miivaa anpai.’

³⁵ Chuta amah asa ei in lousingta amichimpei.”

Jisu in Pharisi Simon Inna

³⁶ Pharisi ankaarna inkhat in Jisu ta buh asaakpinatu ason, amah in Pharisi inna seh a tebor a inboksa.

³⁷ Cheva anve, khuuboomna alehchel kumei inkhat in Pharisi inna Jisu in buh asaaknatu inbok a amsa ta aromma, amah in inteina thao inthaal lungbeel inkhat athlenpei.

³⁸ Jisu akehkuung aknungtong angirhche trap a, akthlia Jisu akehta machor amthronpei, mahchuta amah asamma anuulpei, che Jisu akehta machoh a, thao ateipei.

³⁹ Mahchun Jisu ta akouh Pharisi in ohchuta amuhlai arilsuunga amidonpei, “Mahmii inta ringraan inkhat veile, amahta akpal i tume, amah kumei i alehchel mii ta arom uta.”

⁴⁰ Mahchunna Jisu in akuunga amsang, “Simon, keiin nangkuunga jangmekhat kisontu am.” Chunna amah in amsang, “Lulok, mahchu jangsme?”

⁴¹ “Tunangkhat baobeh ampu mii khatnata baobeh akpu mii innih ammei; mii inkhat in dinari reija ranga intoolsa, che aktleikhat in sopnga intoolsa.

⁴² Anmah in ansiincheknoh khanna ammah innihta a ip ei. Pek tunang jaknangmii khata amah in ralla aringvol ume?”

⁴³ Simon in amsang, “Keiin kamdonva, amahta ak ip khata thloia amah in aringvoltu.” Jisu in akuunga ason, “Nangin chimma pichaar nitlohpei.”

⁴⁴ Mahchunna Jisu in kumeitonga inheia Simon ta ason, “Amah kumei i nimuhme? Keiin nang inna luutsang, kikeh chaamnatu tuii kamlannohche, chuta amah kumei in akthlia kikeh machor a asam in keinuulpei.

⁴⁵ Nangin keita kimchoh nohche, chuta onna kiluutnata amah in kikeh machoh inngainoh.

⁴⁶ Ngang in kikanga thao keiteinohche, chuta amah inva kikeh a thao keiteiang.

⁴⁷ Churella keiin nangta kisonche, keiin amahvaa aleh jikchata ki ippei; alamva amah in keita khalmo aril kamvollang. Aleh steta in ip mii khanna steta aril involning.”

⁴⁸ Mahche Jisu in kumeita ason, “Nang nileh anaamte ki ip peiche.”

⁴⁹ Chunna Jisu soh saaknatu inbokpijou mii in anmahseeng ankaar a trong amithronpei, “Alehchel mii rounakho ip akchek amah i tunang meio?”

⁵⁰ Mahche Jisu in kumeita ason, “Nangin namlotrella nangta nakkalpei; leh oia sehrosa.”