LUKE 5 - Akthar Trongirhna (BSI)

Jisu in Matsahrem Aroi Aongna

¹ Miitam in Ringpu trong anrungeihnatu Jisu ta anlompei, amah in Kenesaret tuiiram apaalla ngirra amsa.

² Amah in tuiiram apaalla muli innih am amuh, chuta ngaman in muulnata trumma anmah torota chaamma ammei.

³ Amah in muli innih kaarna inkhat mah chuvah Simon vaa mulikha tuiipaal nata ste heithourota ason, chunna Jisu in inbok a muli asuungnata miitam amtheih ei.

⁴ Amah in trong anngeihsoh Simon ta ason, “Nga nisuurnatu nang torokha athuukna a deenro.”

⁵ Mahchunna Simon in amsang, “Akpu, kannih in khulouhthlang ngaman insuullung, chuta jakhatkho mannohsung, chuta nangin nison nujuih a keiin dentang.”

⁶ Chunna anmah in ohchunna andeen in, ngapoong inkhat anbahpei; mahcunna anmah toro inthritsa.

⁷ Muli aktleia anmahsoh nga akmanjou in thlenga majoomnatu ankut jaap a an ong. Chunna anmah in thlenga muli innih sipkenga nga anthun in tuiisuunga inphuumsamsei.

⁸ Chunna Simon Pitar in mahchuta amuh in akehkungah intolh a ason, “Akpu, kei kuungnata sehrosa, alamva keiva alehchel miiang.”

⁹ Alamva anmah in anman ngakhanna amahkho che amahsoh inruuia annaamtea salungkhousei.

¹⁰ Simon soh inruuia Jebedi asa kupa Jems mahche John inkho salungkhousei. Mahchunna Jisu in Simon ta ason, “Intrinohro, ipeknata mathronna nangin mii aksuur vei uche.”

¹¹ Cheva anmah in tuiipaalla muli innihta an ilche, anaamte mathlah a Jisu aknuta anjuihpei.

Jisu in Kupakhat Amthrat

¹² Chunna nga tloh a Jisu in khuuboom inkhat a a amlai, reichi in amlom kupakhat in Jisu ta amuh a akhup a antolhche angen, “Akpu o, nangin nija veile, keita namseeng chektung.”

¹³ Cheva Jisu in akut jamma amahta palla ason, “Keiin kijapei, nangin seeng veirosa.” Kak hang achunna reichi in amahta amahpei.

¹⁴ Mahchunna Jisu in amahta akchet tronga ason, “Tukhat ningkho sonnohro; chuta seh a thiimpu ta mamuhro, nang nitakta amseeng rella seh a Moses in trongthuun amlan nujuih a ankuunga sakhi aveinatu inkatphu inkhat katro.”

¹⁵ Chuta Jisu rella trong ral ralla amphorh chuche arungai leh annatna mathratnatu miitam pul pulla thlengei.

¹⁶ Chuta amah atakva rapriltonga inpella angen.

Jisu in Apangnem thi Mii khat Amthrat

¹⁷ Nikhatnia Jisu in miita amtheih laia Kalili na, Judia na mahche khuu khuunata khatkho Jerusalem nata anthleng in Pharisi leh trongsuur lulok in akuunga inbok a amsei; akna mathratnatu Akpu vaa tuui amahkuunga am.

¹⁸ Mahche anve, apangnem thia akna miikhatta raanga matolh a anthlen, amahta Jisu amaikuunga sihnatu ansuul,

¹⁹ chuta mii tammalla amahta asuunga hongpinatu upai amnohsa; chunna anmah in innbunga kalseia, innbungta keak a raangsoh Jisu amaikuung talla anthlakpei.

²⁰ Anmah in amilotta amuh in asonei, “Kupa nang nilehta ki ip peiche.”

²¹ Mahchunna lulok khatkho Pharisi in arat arat a madonna anson, “Ringpu ta usitnoh a aktrong mii i tume? Ringpu noh a tunang in aleh ip achekme?”

²² Chunna anmah in arat arat a amidonchuta aromma ankuunga amsangei, “Nanrilla nga tloh a namidonkha jarelname?

²³ ‘Nang nilehta ki ip peiche’ ta sonle chunohleh ‘Inthoua sehro’ ta sonni jaknangin aklaime?”

²⁴ Chunna miivaa Asa kupa in tukleiram a aleh ipnatu amtik amta nanromnatu Jisu in apangnem thimiita ason, “Keiin nangta kisonche, inthouro, raangkha choia nang inna inlengrosa.”

²⁵ Mahche amah in kak hanga anmaikuung nata anthohche raangta choia Ringpu ta mapaak a inna inlengsa.

²⁶ Chuuna annaam salungkhousei mahche Ringpu ta amipaakpei, khatkho antak a intri suukseia antihpei, “Inih in alehluung thlouta mi in imuhpei.”

Jisu in Levi ta Aong

²⁷ Mah naamte i aknua Jisu in inthruh a roi anthraina phrangki thlaamma anbok Levi an ong roithrai miikhatta amuh a akuunga ason, “Keita keijuihro.”

²⁸ Chunna amah in anaamte mathlahkir a anthohche Jisu aknuta ajuihpei.

²⁹ Chunna Levi in Jisu turella inna buh adoonnatu amchaang; chunna amah in buh saakpinau anbokpijou roithrai khatkho aktlei mii khalmo tammei.

³⁰ Mahche Pharisi leh anmah Ringjih lulok eiin Jisu aroi anchunga arat rat a inso a ankuunga asonpei, “Nannih in roithrai leh alehchel miisoh jarella nansaak nan iinjoume?”

³¹ Mahchunna Jisu in ankuunga amsangei, “Aruung thramii turelva daktar kananoh, chuta akna mii tingva kana;

³² keiin akchimlamseh miita ak ong thlengnoh ang, chuta alehchel mii in ril anthlengnatu ak ong thlengang.”

Buhel Relna Anrui

³³ Chunna anmah in Jisu ta anson, “John aroi in injomma buh anhel, Pharisi inkho mahchunanga antloh, chuta nang niroi inva ansaak an iinning.”

³⁴ Mahchunna Jisu in ankuunga amsangei, “Changri in aruul apaisoh a amjoulai anmahta buh mahel achekume?

³⁵ Churella mainangjim akni thlengtu, che changrita ankuungnata aphurhche aknua anmah in buh anhel umang.”

³⁶ Chela Jisu in ankuunga pandam tloh a asonei, “Tukhat inkho akthrapuun akir anthritna a, amlui puunna louphohnoh ei; phoh eileva akthrata inthrittu, mahche akthar akirkhakho amluisoh asak inchunnohtu.

³⁷ Tukhat inkho amlui savun thonga akthar ngangli tuii louthaal noh ei, thaal eileva ngangli tuii aktharkha savun thongta amphuuktu, atuiikho intahtu; che savun thongkho maangtu.

³⁸ Chuta akthar savun thoonga anthaaltu tlasa.

³⁹ Mahche ngangli tuii amlui an iinche tukhat inkho akthar dinoh ei, alamva amlui in tui aral.”