LUKE 4 - Akthar Trongirhna (BSI)

Jisu ta Amdoi

¹ Cheva Jisu in Li Akseeng sip a Jordon nata anlengche nijan sopli phah a raprilla seitan in amdoikha adoulai Li in Jisu ta anruuipi.

² Seitan in amahta nijan sopli raprilla amdoi, mahsuunga amah in jakhatkho saanoh iinnoh; che aknichu antang in Jisu avon traamsa.

³ Seitan in amahta ason, “Nangin Ringpu Asa kupa chele, lungta tol veiro ta jathang malanro.”

⁴ Che Jisu in akuunga amsang, “Mah i injih a amsa, tol ruin mii in ringnohtu.”

⁵ Mahche seitan in amahta ankaang khat a aphurhche kaksuunga Jisu ta tukleiramvaa kurung huunna anaamteta ammuhpei,

⁶ mahche seitan in Jisu ta ason, “Keiin nangkuunga akchek amneh anaamte khatkho anmahvaa akchek amneh apumte i nangkuunga kamlan uche; alamva mah i keikuunga kamsilkir peiang, keiin kikdit tukhat kuunga mah i kamlantu.

⁷ Chunna nangin keita intolhtlep a kamthruun chele anaamte i nang nita veitu.”

⁸ Mahchunna Jisu in akuunga amsang, “Mah i injih a am, nangin Akpu nangvaa Ringpu ta namthruun tupot, che Akpu amahruta rou tlohro.”

⁹ Cheva amah in Jisu ta Jerusalem a sehpia Ringpu mathruunna thlaam akooinep a amngirhche Jisu ta ason, “Nangin Ringpu vaa Asa kupa chele onnata injaamro;

¹⁰ alamva mah i injih a am, ‘Nangta nakdomnatu Akpu amah in nangturel amah ringroita jathang amlantu,’

¹¹ mahche nikehkha lunga inchuk a atlik noh natu anmah in nangta ankut a nankontuei.”

¹² Mahchunna Jisu in akuunga amsang, “Nangin Akpu nangvaa Ringpu ta chaang annohro.”

¹³ Seitan in amdoitupot naamte amdoiche veikhat taancha lai aphahnohmiil Jisu ta mah a sehsa.

Jisu in Kalili a Thlou Amthron

¹⁴ Mahche Jisu in Li vaa akli a Kalili a inlengsa. Che mah khanna kooia am ram apumtea Jisu rella akming inthangta amiphorpei.

¹⁵ Che Jisu in anmah sinakok a amtheih ei, mii naamtein amahta paar amithratpei.

Najareth ah Jisu ta Indah ei

¹⁶ Jisu in anliinna amun Najareth phah a amah in thlengsa; che amah in anono a mii amtheih khananga anmahta matheihnatu sinakok a sehsa.

¹⁷ Mahche ringraan Isaiah nirikta Jisu kuunga amilanpei, che amah in nirikta mahoonga mahtrong anjih ita aktuuk,

¹⁸ “Akpu vaa Li keichunga am, churella amah in inranriing ankuunga Akthra Trong kraannatu keikuunga thao keipoih ang. Mananga ansuur miita mathlahnatu che mitcho eita veikhat mamuh ajanatu, nanga ak ameita mathlahnatu,

¹⁹ Akpu in inihta inijana chupta sonna madangnatu keita kamthlah ang.”

²⁰ Che amahta amjoom ankuunga nirikta amlanche inboksa; che sinakok a ak am naammte in amahkuunga minna an anpei.

²¹ Mahchunna Jisu in ankuunga son amthronpei, “Mi in mahtrong nantheih in ringjih a anjih trongi nankuunga tlungsa.”

²² Che anmah naamtein amahturel akthra trongsei, che Jisu anarnata anthruh malungsi trongkhanna salungkhoua anson, “Mahmii i Joseph asa kupa nohme?”

²³ Mahchunna Jisu in ankuunga asonei, “Inlitnoh a mah tronglammi huuina a nannih in keikuunga nansontung, maipa nitakta mathratro, Kaparnaum a nitloh naamte kantheihkha niram akho tlohro!”

²⁴ Che asonei, “Keiin nankuunga tak a kisonchou, ringraan ta amah ramboomna mii in janoh ei.

²⁵ Chuta taktak a keiin kisonchou, Elaijah amlaia kum inthum thla kuruk marvaan inkhaar a ram apumte khalmo buhchaal asuuklai Israel a trulmeinu tam traam anphah.

²⁶ Chuta Elaijah ta tukhat kuungkho mathlahnoh, Elaijah ta Sidon ramma am Jarephat a trulmeinu akuung khop ah amthlaning.

²⁷ Ringraan Elsa in a amlai Israel a reichi kop tam ammei; chuta Siria na Naman noh a tukhatkho maseengnoh.”

²⁸ Mahchuta antheih in sinakok a am anaam in khalmo amilung inhaangsei.

²⁹ Che anmah in inthoua Akpu ta khuuboom nata amithruhpei, che amahta antrenna khat ah amilatnatu khuuboom muul abunga antuulpei.

³⁰ Chuta amahvah ankaar nata inlit a sehsa.

Thranoh Li Luut Kupakhat

³¹ Chunna Jisu in Kalili va khuuboom Kaparnaum a jungsa. Che sabat nia Jisu in amtheih ei;

³² che amah in amtheih khanna salungkhousei. Alamva amah atrongkha akchek amnehsoh inruuia trong.

³³ Mahche sinakok a akseengnoh khousaar li akchuung mii khat am; amah in ahou suuk a ongsa,

³⁴ “He! Najareth na Jisu, nangin kannihta jangthohtang nitihme? Nangin kannihta kanimmaang thlengcheme? Nangi tucheme kiromche, Akseeng Ringpu khache.”

³⁵ Chunna Jisu in amahta saalla ason, “Rimta amro, che amahkuung nata inthruhro!” Che khousaar in amah ningnata inthruhsa, amah atakva jakhatkho masoknoh

³⁶ Mahchunna mii naamte in salungkhou seia khatleh khat insonsei, “Mahtrongi jangsme? Alamva achek amnehsoh inruuia amah in akseengnoh luutta aktrang jathang amlanche inthruhsei.”

³⁷ Mahche kooi a ak am ram naamtea amah in atlohthlouta antongpei.

Jisu in Miitam Amthrat

³⁸ Jisu in sinakok mah a Simon inna luutsa, mahlai Simon api tranga atlunna am, amahta amthratnatu Jisu kuunga angen.

³⁹ Mahchunna Jisu in akuunga angirhche atlunkhata asaal; cheva atlun in amahta amahpei; cheva amah in kak hanga inthoua anmahta rou atloh ei.

⁴⁰ Pekva kni atlak in mii naamte kuunga am natna satna jikcha amahkuunga anthlen; amahta inkhat khat a anchunga akut sih a amthrat ei.

⁴¹ Mahchuche Jisu vah Ringpu vaa Asa kupata anhou tranga ong onga inthruhsei. Che Jisu in anmahta khaamma matrongnohsei, alamva Jisu vah Khrista ta anmah in anrompei.

Jisu in Sinakok ah Trong Araan

⁴² Chunnata kini avaarin Jisu in inthruh a achikna amunna sehsa. Che miitam in amahta jon jonna akuunga thlengsei, ankuungnata asehnohnatu amahta ankhaamnatu innsuulsei.

⁴³ Chuta amah in ankuunga asonei, “Keiin Ringpu vaa kurung huunna akthra trongta aktlei khuuboom akho kiraantu tlasa; alamva mairella keita kamthla ang.”

⁴⁴ Che nga tloh a amah in Kalili vaa Sinakok jikcha a seh trong araanpei.