LUKE 24 - Akthar Trongirhna (BSI)

Jisu in Veikhat Ring

¹ Chuta kouhtu matsahrem akni juktiing inranga, anmah in thlouraang antloh amrimtui pootta phurh a rusuunna sehsei.

² Che rusuun akhaar lungta inphonga am antuuk,

³ chuta anmah in asuunga anluut in Jisu aruungta tuuknohsei.

⁴ Mah churella anmah in inhalla an amsuunga, anve, intle inluut silh a kupa innih ngir anmuh;

⁵ anmah in intriseia ankhup in, kupa innih in ankuunga anson, “Akthi kaarna kiringta jarelna nanjonme?

⁶ Amah in Kalili a amlai khatloh a nanisonme intheihve,

⁷ mah chuvah miivah Asa kupata alehchel ankut a amilanche amithlutu, mahche nithum tihpia ringtu.”

⁸ Chunna amah trongchuta intheihsei.

⁹ Che anmah in rusuunnata inlenga mah naamte chuta somleikhat leh aktleikuunga ansonpei.

¹⁰ Pek mah kumei eichuva Makadalini Meri, Joanna, Jems anu Meri, mahche aktlei kumei eisoh inruuia mahchuta raangroi ankuunga antongpei;

¹¹ chuta mah trongchu ankuung avah apupu trongta anlohpei, anmahta malotnohsei.

¹² Chuta Pitar in inthoua rusuun phah a tlaanna sehsa; che inkhup a an in, innaal puunta injarh a am, mahchunoh a aktlei jakhatkho muhnohsa.

Immaus ah Seh

¹³ Mah aknital chunna anmah ankaarna mii innih in khuuming Immaus ah seh ei, mahchu Jerusalem nata mel sirihvak inla,

¹⁴ anmah in aksuukthlou naamte kharelna khatleh khat trongsei.

¹⁵ Che anmah in tronga intella ansehsuunga, Jisu atak in ankuunga innaia anmahsoh sehjousa.

¹⁶ Chuta amahta anromnoh natu anmah anmitta ammangei.

¹⁷ Che Jisu in anmahta asonei, “Nannih in seh malamma khatleh khat trongchou i jarelname?” Chunna amahta ancheknohseia ngirtlinga amsei.

¹⁸ Che anmah innih ankaarna akming Kleopas in amahkuunga amsang, “Minka suunga aksuuk ei i jakhatkho romnoh nanga rapkhei veia, Jerusalem ak ankhoptu thlengscheme?”

¹⁹ Cheva anmahta aruiei, “Jaknang thlouta suuksame?” Chunna anmah in anson, “Ringpu mahche mii naamte maikuunga thlouvah khatkho tronga akchek amneh ringraan vei Najrethna Jisu relna,

²⁰ khatloh a inihvaa akthloi thiimpu leh inipuui ei in amahta thatnatu maraal mathlaak a amithlu tameh.

²¹ Amahva Israel ta akthloktu miitalsa ta imtuur peita, mah naamte aksuuk i mi insoh nijanthum aphahpei.

²² Inih ikaarna kumei arouin juktiing inrangdor a rusuunna seh eia, ralladom inihta salungkhouna inimveipei.

²³ Amah aruungta tuuknohsei, anmah anhamuh a ringroi in Jisu vah ringsa ta asonta kannihting inlenga knisonung.

²⁴ Kannih kankaarna arouin rusuunna seh eia, kumei in anson khananga antuukpei; chuta amah atakva muhnohsei.”

²⁵ Mahchunna Jisu in anmahta asonei, “Ah kmong miieio, ringraan in ason anaamteta nanrilla malot tapchoukhame!

²⁶ Khrista in anaamte klah knang athotu mahche amah paarthra a luutnoh ume?”

²⁷ Amah atakrelna ringjih naamte in asonkha Moses nirik ah mahche ringraan annaamte antrongta anmah kuunga minna amtheih ei.

²⁸ Che anmah in ansehnasam khuukha anailai, amah in ankuungnata ralbeb a sehsa;

²⁹ chuta amahta khaamma anson, “Kannihsoh amjouro, alamva khulouhram veisa, che khalmo thilsa.” Chunna Jisu in anmasoh amjounatu inlengsa.

³⁰ Amah in tebor a anmahsoh anboklai, amah in tol loua doi amlan, che mahchuta khoia, anmahta amlannei.

³¹ Cheva anmah in inthrangseia amahta rom akchekpei; cheva ankuungnata maangsa.

³² Anmah in khatleh khat insonsei, “Lamma ringjihta inihkuunga inimtheihlai iril khalmoa kaangnohme?”

³³ Mahche anmah in pungtal achunna inthoua Jerusalem a inlengsei, mahchunna aroi somleikhat leh aktleisoh amjou antuukpei.

³⁴ Che anmahta ansonei, “Taktak a Akpu in ringsa, Simon kuunga ammuhpei!”

³⁵ Chunna lamma aksuukthlou, amah in tol khoia amah atakta khatloh a amromeime tihrelna antongpei.

Jisu in Atakta Aroi Ankuunga Ammuh

³⁶ Mah ita ansonlaia, Jisu ataktal ankaar a ngirsa.

³⁷ Chuta anmah in intria kukthlata imuhpeita amidonpei.

³⁸ Che Jisu in ankuunga asonei, “Nannih in jarella inlao sachoume, che jarella nanrilla amahnoh namidon peime?

³⁹ Kei kikutleh kikehta keianve, keisang, keiromve; keipalve mahche keianve; alamva keita nanmuh angi oinanga kukthlava aruung khatkho aruh amnoh.”

⁴⁰ Mahchuta asonlai ankuunga amah akut leh akehta ammuh ei.

⁴¹ Anmah in malotnoh a, roomthoknoh a che salungkhoua an amsuunga, ankuunga asonei, “Onna isaaktuphu nansihme?”

⁴² Innsuunche nga akirta akuunga amilanpei.

⁴³ Che mahchuta loua anmaikunga asaakpei.

⁴⁴ Mahchuche ankuunga asonei, “Keiin nannihsoh kiamjoulai mah kitrongi nankuunga kisonpeichou, mah chuvah kei turelna Moses trongsuura injih, mahche leila ah inijh naamte amthlungtu tla.”

⁴⁵ Chunna ringjihta rom ancheknatu anmah anrilta amhoongpei

⁴⁶ Mahchuche Jisu in ankuunga asonei, “Mah chuvah Khrista in klah knang aphahche nithum tihpia thinata ringtu,

⁴⁷ che rilthleng khatkho alehnata ip rella Jerusalem nata mathronna jatboom apumtea mah ita keiminga inraantu.

⁴⁸ Mah naamte i nannih in sakhichou.

⁴⁹ Che anve, Pa atrongchetta nankuunga kamthlah peichou; chuta achungtonga tuuita puun nanga nansilh nohmiil khuuboomma amve.”

Jisu ta Ringramma Ahan

⁵⁰ Cheva Jisu in anmahta Bethani phah a asehpiei, che akut domma anmahta doi amlanei.

⁵¹ Anmahta doi amlansuunga, ankuungnata achunga ahanpei.

⁵² Che anmah in roomthok a Jerusalem a inlengsei.

⁵³ Che anmah in Ringpu mathruunna thlaamma injomma Ringpu ta mapaak a amsei.