LUKE 22 - Akthar Trongirhna (BSI)

Jisu Thatnatu Inruk a Ansil

¹ Ipekva laalna Ujouhoong, chol jaonoh Tol buhdoonna aknichu innnaisa.

² Akthloi thiimpu leh ringjih lulok eiin Jisu ta khatloh a ithat umeta amijon; alamva anmah in miita antrihrelna.

Jisu Jurhnatu Judas in Aja

³ Cheva somlei innih ankaarna inkhat Iskariot akuunga Seitan in luutsa;

⁴ chunna amah in akthloi thiimpu khatkho phrangki ankuunga seh a Jisu ta anmah kuunga khatloh a kamlan umeta antelpiei.

⁵ Ohchunna anmah in anroomthoksa, cheva amahkuunga baobeh amilannatu injasei.

⁶ Nga tloh a amah in ajapei, miitam amnohlai Jisu ta ankuunga amlannatu taancha ajonpei.

Jisu in Laalna Buhdoon Saaknatu Amchaang

⁷ Chol jaonoh Tol Buhdoon aknikha thlengsa, mahnia laalna buhdoon sadamte ankattupot.

⁸ Chunna Jisu in Pitar leh John ta sonna amthlah ei, “Nannih in seh choulaia laalna buhdoon saaknatu inihturel thlouraang tlohve.”

⁹ Amahkuunga anson, “Mahchu ramma thlouraang namtlohja ungme?”

¹⁰ Chunna amah in ankuunga asonei, “Anve, nannih in khuuboomma nanluutlai, mii khat in tuiipul tonga seh nantuukpitu; amah in aluutna innkhanna juih a luutve,

¹¹ che innputa sonve, ‘Lulok in nangta nakson, “Miitlungna khumkha khosame, kei kiroisoh laalna buhdoon ramma kansaak ume?” ’

¹² Mahchunna thra thlouraang atlohche achungnung khum anrol inkhat amah in nanimmuhtu; mahchunna thlouraang tlohve.”

¹³ Che anmah in seh a, Jisu in ankuunga asonkhata antuukpei; mahche ohkhanna anmah in laalna buhdoonta thlouraang antlohpei.

Akpu vaa Buhdoon

¹⁴ Laichu aphah in amah in tebor a inboksa, che raangroi eikho amahsoh inbokjousei.

¹⁵ Amah in ankuunga asonei, “keiin klah kphahnoh amaa a mah laalna buhdoon i nannihsoh khalmo kisaakja hangsa;

¹⁶ alamva keiin nankuunga kitihchou Ringpu vaa kurung huunna a mah i amthlung nohmiil keiva mah i saanoh usang.”

¹⁷ Che Jisu in kamta loua Ringpu ampaakche ason, “Mah i loua nankaar a insemve;

¹⁸ alamva keiin nankuunga kitihchou, Ringpu kurung huunna athlengnohmiil keiva ngangli atuii innoh usang.”

¹⁹ Che amah in tolta loua, Ringpu ampaakche mahchuta anmah kuunga malanna asonei, “Mah i nannih turel kamlan kei kiruungsa. Nannih in keita nantheihnatu mah i tlohve.”

²⁰ Mahchunanga saa ancheche kamta loua ason, “Mah kammi nannih turel tla kei kithii a akthar trongirhnasa.”

²¹ Chuta anve keita kamlansam miiva akut tebor a keisoh asihjou.

²² Alamva Ringpu in amdon nujuih a miivaa Asa kupa in sehsa; chuta amahta amlan miikhava aleh a lahnasa a!

²³ Anmah ankaar a tunang in mah i atloh umeta anmahsengta inrui amithronpei.

Akliin Veina Turel Trong Inkharh

²⁴ Anmah ankaar a tunang in akliinrem umeta anmahseengta trong inkharhtlamsei.

²⁵ Chunna anmahta asonei, “Jental kurung in miichunga ankil maphonga akpu veia paallei; che miichunga akchek amneh in kannihva miinaamtetu anpaiungta amidang.

²⁶ Chuta nannih nankaar avah mahchu suuknohso; inkhattinga nannih nankaar a akliinrem amah in aksiinrem veiso, che lulok in routloh veiso.

²⁷ Tebor a anbokkha tunang in akliinme, nohle rou aktloh khareme? Tebor a anbok khanohme? Chuta keiva nankaar a routloh mii inkhat hukveisang.

²⁸ “Keita chaang keianna a nannihva keisoh inpot amnoh a amjouchou;

²⁹ Pa in kurung huunna inkhat keikuunga amsilnanga, mahchunanga nankuung akho kamsil uchou,

³⁰ nannih in kei kurung huunna a kei tebor a nansaak nan iintu mahche phompii ah inbok a Israel jatih somlei innihta pichaar nantlohtu.”

Pitar in Andahsam Jisu in Matsah Aphoong

³¹ “Simon, Simon, anro, seitan in nangta kehu nanga nakloknatu anihpei,

³² chuta nangin namlotta amaangnohnatu nangturel kingenpei, che nangin keikuunga veikhat nanlenglai, niuhnaota anril matrangeiro.”

³³ Chunna Pitar in amahta ason, “Akpu, keiva nangsoh sim akho kisehjounatu mahche nangsoh thikho kithihjounatu thlouraang chesang.”

³⁴ “Pitar keiin nikuunga kisonche, nangin keita nakromnoh angta veithum nandahnohmiil mi in aarkhong in inkhuungnohtu.”

Skhao, Thong Khatkho Chemsei

³⁵ Mahche Jisu in akuunga asonei, “Keiin nannihta skhao nohle thong nohle kehkhraang jaonoh a kamthlah choukha nanvaatna amchoume?” Anmah in anson, “Jakhatkho vatnoh ung?”

³⁶ Jisu in anmahta asonei, “Chuta pekva, skhao ak am amah in phurhso, mahchunanga thongkho phurhso; tukhat in chemsei amnohle anluut juura chemsei leiso.

³⁷ Alamva keiin nankuunga kitihchou, mah chuvah mah ringjih i keininga amthlungtu tla, ‘Amahta alehchel eisoh inteensa; alamva keirella injihkha tlungsa.’

³⁸ Chunna anmah in anson, ‘Akpu, anro, onna chemsei innih am.’ Mahchunna ankuunga asonni, ‘Mah i chanasa.’ ”

Jisu in Chorophol Muulchunga Angen

³⁹ Amah in inthruh a amahtu anono veia Chorophol Muulla sehsa; che aroi in anjuihpei.

⁴⁰ Jisu in amunchunna athlengin ankuunga asonei, “Nannih in madoia nantlaknoh natu ngenve.”

⁴¹ Lung veikhat iloon in asehchaanga aklah khanna amah in ankuungnata insenga akhuk makamma angen,

⁴² “Pa o, nangin nimdon veileva, mah kam i kikuung nata lourosa; chulata keiin kamdon veinoh a nangin namdonchu veiso.”

⁴³ Cheva ringramna ringroi inkhat in amahkuunga indangsa, amahta amtrangpei.

⁴⁴ Che Jisu in aril lahmalla ralla tranga angen. Che amah akthlankha thiitlang nanga tukleia tla.

⁴⁵ Amah in angennata inthoua, aroi ankuunga athlengin anmahva klahmal seia inna louam antuukei,

⁴⁶ chunna ankuunga asonei, “Jarelna inchoume? Madoia nantlaknoh natu inthloua ngenve.”

Jisu ta Ansuur

⁴⁷ Amah in tronga amsuunga, mii tamsoh Judas an ong somleinih ankaarna inkhat in anmahta chinga thlengsei. Che Jisu ta amchohnatu akuunga innaisa;

⁴⁸ chuta Jisu in amahta ason, “Judas nangin miivaa Asa kupata machoh a nijurhpeime?”

⁴⁹ Jisu soh inruui aroi in aksuuksam khata anmuh in ason, “Akpu, kannih in chemseiah kantuk useime?”

⁵⁰ Cheva ankaarna inkhat in akthloi thiimpu vaa naichi amkuur akchangtonga apheklokpei.

⁵¹ Chuta Jisu in ason, “Mah i ajapei.” Cheva amah amkuurta palla amthratpei.

⁵² Cheva amahta aksuur akthleng akthloi thiimpuei mahche mathruunna thlaamvaa phrangkiei khatkho anparuul eita alousonei, “Inruraanta aksuursam nanga chemsei leh suungsoh inruuia thleng sachoume?

⁵³ Keiin anirel nannihsoh mathruunna thlaamma kiamlaia keisuurnoh choua. Chuta anthim tuui in apaallai, nannih in thlou nantlohnatu mah i nannih nanpungsa.”

Pitar in Jisu ta Indah

⁵⁴ Aknu achunna anmah in Jisu ta ansuurche kaia akthloi thiimpu innsuunga anthlenpei. Cheva Pitar in inlabeb a ajuih.

⁵⁵ Che anmah in innpaal alaia mei luh a anboklaia Pitar kho ankaar a inboksa.

⁵⁶ Cheva amah in meilenga anboklai, roijuih rungaak inkhat in amahta amuh a tlingta anche ason, “Mah kupa ikho amahsoh inruuijou mii.”

⁵⁷ Chuta amah in indah a ason, “Kumeio, amahta romnoh ang.”

⁵⁸ Kak amche mii aktleikhat in amahta amuh a ason, “Nangkho anmah ankaarnache.” Chuta Pitar in amsang, “Kupa o, keinoh ang.”

⁵⁹ Mahche pung inkhatvak aknua aktlei mii inkhat inla ason, “Taktak a mah kupa ikho amahsoh inruuijou miisa. Alamva amahva Kalili na mii.”

⁶⁰ Chuta Pitar in ason, “Kupa o, nangin nisonkha kei romnoh ang.” Che kak hanga atrong suunga aarkhongin inkhuungsa.

⁶¹ Mahchunna Akpu in inheia Pitar ta a anpei. Che mi inva arkhongin ankhuungnoh maa a nangin keita veithumkhek kandah ucheta akuunga Akpu in ason trongkha Pitar in intheihsa.

⁶² Chunna amah in apaaltongta inthruh a aril sok a trapsa.

Jisu ta Aminuih Khatkho Ankhon

⁶³ Chunna Jisu ta amtuh mii kupa in manuih a akhon.

⁶⁴ Che anmah in Jisu ta amit makaanga anrui, “Nangta tunang in nakkhonme? Kaniphoongro.”

⁶⁵ Che anmah aktam in thranoh trong achunga trongsei.

Jama Kuunga Jisu ta Anthlen

⁶⁶ Che ni avaarsoh miitamvaa anparuul mah chuvah akthloi thiimpu leh ringjih lulok in inchunsei, che anmah in Jisu ta anmah anparuul anchunna kaar a thlenna anson.

⁶⁷ “Nangi Khrista cheleva kanisonro.” Chuta Jisu in ankuunga asonei, “Keiin nankuunga nanison sanglakho nannih in malotnoh luung uchou.

⁶⁸ Mahche keiin nannihta nanirui sanglakho kamsangnoh uchou.

⁶⁹ Chuta peknata mathronna miivaa Asa kupa in Ringpu tuui akchanga inboktu.”

⁷⁰ Mahchunna anmah naamtein anson, “Chunohleva nangva Ringpu vaa asa kupa cheme?” Che Jisu in ankuunga asonei, “Keisangta nannih in nansonpei.”

⁷¹ Mahche anmah in anson, “Inih in sakhi veikhat ijonnatu darkaar ammangme? Alamva inih itak in anarnata trong itheihpei.”