LUKE 21 - Akthar Trongirhna (BSI)

Trulmeinu in Baobeh Akat

¹ Jisu in intoua a kooia a anlai mathruunna thlaamma baobeh sihna thlaam a ankatta amuhpei;

² che inran trulmeinu inkhat in kuri apum innih akatta amuh.

³ Amah in ason, “Keiin atak a kitihchou, amah inran trulmeinu in anmah annaamte chunga tam akatpei;

⁴ alamva anmahva huuitanga maleia ansihnata loua ankat, chuta inran kumei inva amah in aringnatu asih apumteta akatpei.”

Mathruunna Thlaam Inpilsam Relna Jisu in Trong

⁵ Amanlu lunga anseem kathra thlaammi ian in jikchaphao iril ampelme che khalmo tlanna kuttholpoot ankatname ta aroi in Mathruunna Thlaam relna trongei,

⁶ mahchunna Jisu in ankuunga asonei, “Laikha thlengumang mah chuvah nannih in nanmuh poot ei i amah amun inna lung inkhat in inkhatchunga indolhnoh a inmahnoh a, apumte inpilkir umang.”

Klah knang Khatkho Chut

⁷ Mahche anmah in Jisu ta anrui, “Lulok o, mahchu tikna ume, mahche asuuktumma jaknang daang thlengume?”

⁸ Chunna amah in asonei, “Nannihta chimnoh a inhea naniseh pinanohtu cheksilve; alamva keiminga mii khalmo thlenga ‘Kei i amahsang!’ che ‘Lai innaisa!’ ta nanisontu. Mahlaia anmahta juihnohve.

⁹ Nannih in raalhou mahche raal amsuuk ahou nantheihlai, intrinohve; alamva mah i matsah a suuktutla, chuta achenava kak hanga thlengnohtu.”

¹⁰ Mahchuche ankuunga asonei, “Jaatboom inkhat in jaatboom inkhatchunga che kurung huunna inkhat in kurung huunna inkhatchunga raal suuktuei;

¹¹ aktrang runaangnu jikcha thoutu, ram aje ajea buhchaal che thitrang natna satna rii jikcha suuktu; khatkho trihkhopna vei mahche akliin daang jikcha ringramnata nanmuhtu.

¹² Chuta mah naamte i asuuknoh maa a nannihta suura nanichuttu, mahche sinakok a nanimlantu che simma nanithuntu, chuche kei kikming rella kurung khatkho rampuui ankuunga naniphurh tuei.

¹³ Mahlaichun nannih ringtukna thaminta nansonnatu laikha thlengsa.

¹⁴ Alamchunna mahlai khatloh a namisang umeta nanlah nanohtu matsah a nanril mangirhve;

¹⁵ alamva nannih jeknaei in nantrongta vat nohle indah ancheknoh natu nar khatkho lousing kamlan uchou.

¹⁶ Nannu nanpa in, nan ute ei in, nan uhte nannaoei in, che nanruul nanpailuung inkho nanilontuei, che mii arouva nanithattu;

¹⁷ kei kikming relna mii naamtein nannihta nantirh tuei.

¹⁸ Chuta nankangna sam akmol inkhatkho maangnohtu.

¹⁹ Nannih in nandoutrang khanna nanchaan inkal nanphahtu.”

Jerusalem Anpilsam Relna Jisu in Trong

²⁰ “Chuta Jerusalem ta raalmii in ankoi nanmuhlai, amaangnasam innaisa romve.

²¹ Mahlai Judia a ak am in muul muulla tlaaneiso, khuuboom suunga ak am in ohkhannata inthruh eiso, che ramboom apaalla ak am in innsuunga luutnoh eiso;

²² alamva anjih anaamteta atlungnatu athunglohna aknikha maisa.

²³ Mahni achunna naoson akroi anmah kuunga aleh a lahnasa a! Alamva thaleichunga khalmo klah knang suuktu mahche inhaanga asaokha mii anchunga tla usa;

²⁴ anmahta chemsei aha in athattuei, che arouin jaatboom naamte ankaar a phurh a pajatla a ansihtuei; Jental ei laikha atlungnohmiil, Jerusalem ta Jental in anchilhtu.”

Miivaa Asa kupa in Athlengsam

²⁵ “Kini, thla, mahche arsi a daang amtuei, chuche tuiiboomvaa aktrang amri khatkho tuiisolh ahouin thaleichungna jaatboom naamtein khalmo klah knang anphahtu che anlusip binta insaatuei,

²⁶ tukleiram a aksuukthlou khanna amidon in klahmalla mii in intrituei; alamva marvaanvaa atuui inloktu,

²⁷ mahchuche miivaa Asa kupa in tuuileh paarthrasoh inruuia sumphaia thleng anmah in anmuhtu.

²⁸ Pek mah ei ita suuk amthronlai, intouva anve, alamva nannihta nanithloknatu innnaisa.”

Thotthinga Pandam

²⁹ Che amah in pandam inkhat asonei, “Thotthing mahche thing anaamteta anve;

³⁰ Anmah in anbur suun amthronsoh, thralpiini naisa ta nantak in muh a nanrom.

³¹ Mahchunanga mah naamte i suuk nanmuhlai, Ringpu kurung huunna naisa ta nanrom.

³² Atak a keiin kisonchou, mah naamte i asuuknoh miilva, mah ringnatluun i maangnohtu.

³³ Marvaan mahche thaleiva maanga cheumang, chuta kei kitrongeiva tiknikho maangnoh luungtuei.”

Jih Trangnoh Janoh

³⁴ “Chunna saa iinna, tuiibuh inrui mahche mah ringna inna ril namiluut nanohtu cheksilve, mah aknichu chaang nanga kak hanga nantakchunga thlengtu;

³⁵ alamva mahchu thaleichung apumtea a am miinaamchunga thlengtu.

³⁶ Chuta anaamte nata inlit nancheknatu che miiva Asa kupa maikunga ngir nancheknatu lai amrel jihtranga ngenve.”

³⁷ Anirel amah in mathruunna thlaam a amtheih ei, chuta khulouh avah Chorophol Muulla rik.

³⁸ Juktiingrel inranga mathruunna thlaamma amah atrongta anrungeihnatu miinaam in thlengei.