LUKE 2 - Akthar Trongirhna (BSI)

Jisu in Apokna

¹ Lai achunna nga tloh suuksa tukleiram apumte miipok tenveta Akastas Keisaar tingna jathang thlengsa.

² Kurini in Siria vaa rampuui aveilai miipokteen i matsahremsa.

³ Mahche mii naamtein anmah anmah ankhuboomma anming amijihnatu mii naamte in sehsei.

⁴ Mahche Joseph kho Kalili vaa Najareth khuuboom nata Judia vaa Bethlehem antih Devit khuuboom phah a hangsa, alamva amahvah Devit sakhei che innsuungvei.

⁵ Amahsoh trong amiromche nao anpooi Meri soh inruuia ming amijihnatu sehsa,

⁶ mah khanna an amlai, nao apoknatu anising tangsa.

⁷ Che amah in matsahrem asa kupa inkhat apokpei, mahche naota puunna thlomma siilthlai saakna bukuunga amtolhpei, alamva miitlungna inna anmahtu aphom amnohsa.

Sadamkem Khatkho Ringroiei

⁸ Cheva ram achunna Sadamkem arouin raprilla rik a anmah Sadamlomta khulouh a anngaak.

⁹ Mahche Akpu vaa ringroi inkhat in anmaikunga indangsa, che Akpu vaa paarthra in anmahta inhiilla amvaar in intrisei.

¹⁰ Cheva ringroi in ankuunga asonei, “Iintrinohve, alamva anve miinaamtetu veia khalmo roomthokna athra trong keiin nankuunga kithlenchou;

¹¹ alamva mi in Devit vaa khuuboomma nannihtu Nanikal Akpu poksa amahvah Khrista Akpu sa.

¹² Mahche nannih turel daangva maisa, dalduh a anthlom naokhat siilthlai saakna bukuunga intlolh a am nantuuktu.”

¹³ Mahche ngasuuksa, ringroi ruul in Ringpu mapaak a anson.

¹⁴ “Inkaangrem veia Ringpu ta paar mathrat, che thaleichunga Akpu ta mapel miikaar aleh oi am veisa!”

¹⁵ Mahche nga intlohsa, ringroi in anmah kuungnata ringramma ankalsoh sadamkem in khatleh khat insonsei, “Inih in ipek Bethlehem a seh a Akpu in inikuunga inimrom aksuuk trongi seh a anrei.”

¹⁶ Cheva anmah in inthademma seh a Meri leh Joseph che siilthlai saakna bukuunga amitolh naochukho antuukpei.

¹⁷ Cheva anmah in ohchuta anmuhlai, naorella ansonkha ankuunga anson trongsoh inkeih a amirompei;

¹⁸ Mahche sadamkem in anson trongta aktheih in salungkhousei.

¹⁹ Chuta Meri in arilsuunga aratrat madonna anson naamte i arilsuunga asih.

²⁰ Mahche sadamkem ankuunga ansonta aktheih mahche akmuh naamtein inlengseia mahchurel Ringpu ta paar amithrat che amipaak.

Jisu Thlathlou

²¹ Cheva avun tannatu akni nirit atangin, nao anpooinoh maa a anu akpoomsuung amlai ringroi in akming atholnanga amah akming Jisu an ongpei.

Jisu ta Mathruunna Thlaamma Ankat

²² Mahche Moses trongsuur nujuih a anmah in amiseeng natu lai athlengin, amahta Akpu kuunga doonnatu Jerusalem a anthlenpei.

²³ (Akpu trongsuura injih nanga, “Naopoom amhoong matsah akpok kupa relta Akpu kuunga Akseengta in ongtu.”)

²⁴ Mahche Akpu trongsuur in ason nujuih a “Rapril ukthru inkhat nohle khuinu ate innih” inkatphu veia doonnatu.

²⁵ Mahche anve, akming Simeon mii khat Jerusalem a louam, amahvah Israel vaa akthra aktlanta loungaak akchimlamseh mahche Ringpu ta chet a amdon mii, mahche Li Akseeng in amahchunga am.

²⁶ Che amah in Akpu Khrista ta amuhnoh miil akthi muhnohtung ta Li Akseeng apaalla amahkuunga amdangpei.

²⁷ Chunna Li in atak a chuunga amah in Ringpu mathruunna thlaamma luutsa; che trongsuurva kastam nujuih a Akpu turel tlohja atlohnatu anu apa in nao Jisu ta anhonpei.

²⁸ Amah in Jisu ta akutbaanga konna Ringpu ta mapaak a ason,

²⁹ “Akpu nangin nison nujuih a ipek nang roijuihta leh oi veia namthlah,

³⁰ Akpu nang chaanringkha kimit in kimuhpei,

³¹ alamva mii naamte anmaikuunga mahkha nangin thlouraang nitlohpei.

³² Jental ankuunga madangna turel akvaar mahche Akpu amii Israel jaatturel paarthra veisa.”

³³ Jisu anu apa in amahturel asontrongta antheih in salungkhousei;

³⁴ Mahche Semeon in anmahta doi malanna anu Meri ta ason, “Anro, naoi Israel ankaarna aktam in atlaakna arilta mahche anthohna turel, inruuia akjanoh daang aveinatu asihpei

³⁵ (mahche chemseiin nangtalva li a naksuntu), che mii aktam anrilla amidon naamteta amdangna turelnasa.”

³⁶ Aser jatihna Phanuel va asakumei Anna an ong ringraan kumei inkhat am, amah in amsalsoh kum sirih apaalche

³⁷ kum sopritlei manli chang trulmeinu kumei veisa. Amah in suun jaan buhella ngenna mathruunna thlaam mathlahnoh.

³⁸ Che mah pungtal chunna amah in thlenga Ringpu ta ampaak, mahche Jerusalem ta thloknatu ngaak a louam anaamtinga Akpu rella trongei.

Najareth ah Inleng

³⁹ Mahche Akpu trongsuur nujuih a thlou anaamte amipaangche anmah in Kalili ankhuuboom Najareth ah inlengsei.

⁴⁰ Mahchuche naoin inrolla trangkho trangsa, che lousingkho sipsa; Ringpu malungsikho achunga amsa.

Jisu Naoin Mathruunna Thlaamma

⁴¹ Ipekva Jisu anu apa in kum kumtu veia laalna buhdoon turel Jerusalem a seh ei.

⁴² Mahche Jisu in kum somleinih aphah in buhdoonna kastam nujuih a anmah in hangsei.

⁴³ Cheva buhdoonchu acheche anmah in inlengsei, Jisu vah Jerusalem a inmahsa. Anu apa in mahchu romnoh ei.

⁴⁴ Chuta Jisu vah ansehpijou aruul ankaar a jaota amidonna anmah in nikhat suuntla lam sehsei, cheva anmah uhnao leh ansehpi ankaar a amahta jon jonna amsei.

⁴⁵ Chuta amahta antuuknoh inva jonna Jerusalem phah a inlengsei.

⁴⁶ Cheva nithum aknua anmah in Jisu ta Ringpu mathruunna thlaam asuuunga lulok ei antrongta rungaia ankaar a trong ruia inbok a am antuukpei.

⁴⁷ Mahche arungai anamte in Jisu in atheih asing mahche anruita amsang naamte chunna salungkhousei.

⁴⁸ Cheva amahta anmuh in salungkhou seia anuin ason, “Kisa o, nangin kannihta nga nantloh ungi jarelname? Anro nipa leh keiin kanril lah a nangta kanjonche.”

⁴⁹ Mahchunna ankuunga asonei, “Nannih in keita nanjon angi jarelname? Keiva Pa inna amtupot talsang ta nannih in romnoh choume?”

⁵⁰ Amah in ankuunga asonna trongkha loutheinohsei.

⁵¹ Chunna anmahsoh inruuia Najareth ah inlengsei, cheva anmah in ansonta amjuihpei; anu inva anson naamte i arilsuunga chet a asih.

⁵² Che Jisu in ruunga mahche lousinga ahanral, mahche mii rilvol leh Ringpu malungsi atak am.