LUKE 18 - Akthar Trongirhna (BSI)

Trulmeinu leh Pichaar Aktlohvaa Pandam

¹ Anmah in lai amrel anngennatu mahche anril inlengnoh natu ta ankuunga pandam khat malanna asonei.

² “Khuuboom inkhat a Ringpu ta trihnohluung mahche miita injahnohluung pichaartloh mii khat am;

³ che mah khuuboom chunna trulmeinu inkhatkho am, amah in pichaartloh akuunga injomma thlenga ason, ‘Keita jekna mii i achunga akchim pichaar tlohro.’

⁴ Mahchu kakva amah in indahmang; chuta aknua arilsuunga akroua insonsa, ‘Keiin Ringpu ta trihnoh sanglakho mahche miita injahnoh sanglakho,

⁵ trulmeinu in keita keichut keichut a amtaningva, keiin amahturel akchim pichaar tlohtasang, chunohleva inleng inlenga keita keivot usang.’ ”

⁶ Akpu in ason, “Akchimlamseh noh pichaar aktlohmii in jangta asonme rungaive.

⁷ Chunna amahkuunga juktiing khulouh trap a ason, Ringpu in amah turella acharche mii turelva pichaar tlohnoh ume? Anmah in trap a ansonta rungainoh a amthil ume?

⁸ Keiin nannihta kitihchou, anmah turel inthademma amah in pichaar atlohtuei. Chulata, miivaa Asa kupa in athlenglai, amah in thaleichunga malot mii aktuuk ume?”

Pharisi leh Roithrai Miivaa Pandam

⁹ Antak anrouta akchimlamseh ungta malot aksih mahche aktleita usitnoh a madon ankuunga amah in pandam ita asonei.

¹⁰ “Mii innih in anngennatu mathruunna thlaamma hangei, inkhatva Pharisi che aktlei khatva roithrai mii.

¹¹ Pharisi in ngirra anroua nga tloh a angen, ‘Ringpu, kampaakche keiva mii aktlei nangnoh ang, mii masimna, karaam, chimnoh aktloh, miimei miisa laal aktloh miinoh ang nohle roithrai anmah nangnoh ang.

¹² Keiva kouh inkhat suunga buh veinih kihel, keiin kphahpot somsuunga inkhat kamlan.’

¹³ Chuta roithrai miikhan klahbeb a ngirra, ringramtinga amit meenga han anluung cheknoh, chuta alukhe beenga, angen, ‘Ringpu, alehchel keita niril kamvolro!’

¹⁴ Keiin nannihta kitihchou, mah chuvah mahmii in aktleichungle atakta machimma inna inlengsa; alamva tunangkhat in anroua atakta amliinjale inruruh kamveitu, chuta tunangkhat in anroua atakta inruruh veile amahta kamliintu.”

Jisu in Naoeita Doi Amlan

¹⁵ Anmah in andih naoeita Jisu in apalnatu akuunga anthlen; mahchuta aroi in anmuhlai nao anthlenta ansaal.

¹⁶ Chuta Jisu in anmahta akuunga onga, asonei, “Andih naoei in keikuunga thlengeiso, anmahta khaamnohve; alamva Ringpu kurung huunnavah andihnao nangjim antasa.

¹⁷ Atak a nannihta kisonchou, andihnao inkhatnanga Ringpu kurung huunnata aklounoh amah khanna tiknikho luutnohtu.”

Kdoon Mii

¹⁸ Rampuui inkhat in amahta arui, “Akthra Lulok, ache amnoh chaan phahnatu keiin jangkitlohtu tlame?”

¹⁹ Mahchunna Jisu in akuunga ason, “Jarelna keita akthrata nak ong angme? Ringpu noh a tukhatkho akthra amno.

²⁰ Nangin trongthuun nirompei: ‘Miimei miimasal laalnohve, mii thatnohve, inrunohve, chimnoh a sakhi malannohve, nannu nanpata injahve.’ ”

²¹ Che amah in ason, “Anaamte ivah nao kiveilainata majuih a thlengsang.”

²² Mahchuta Jisu in atheih in, amahkuunga ason, “Nangin nitlohtu inkhat vaatmang. Nangin nidoon naamte juura inranriingta malaneiro, mahche ringramma nang nilal amtu; che thlenga kiknu keijuihro.”

²³ Chuta mahchuta atheih in aril lahsa, alamva amahvah khalmo kdoon mii.

²⁴ Jisu in amahta anna ason, “Akdoon mii in ringram huunna a anluut tupot i khalmo luua suuk!

²⁵ Alamva akdoon mii in ringram kurung huunna aluutchungva uuksa inkhat in kukthrimpoa phaova anthruh in ralla aklai.”

²⁶ Mahchuta aktheih ei in anson, “Chuleva tunang in inkal aphahchek ume?”

²⁷ Chuta amah in ason, “Miikuungva veinohtupot thloukha Ringpu kuungva veitu seengning.”

²⁸ Pitar in ason, “Anro, kannih in kan inn kanlou mathlah a niknu kanjuih peiche.”

²⁹ “Atatak a keiin kisonchou, tunangkhat in ringram huunna rella a inn nohle akmei nohle auh anao nohle anu apa nohle asaeita mathlah a,

³⁰ ipek lai in khalmo ralla mahche akthlengsam chup a ache amnoh ringna akphahnohtu tukhatkho amnoh.”

Jisu in Athihsam Relna Veithum tihpi Trong Ason

³¹ Mahcheva aroi somleinihta ajea asehpiche ankuunga asonei, “Anve, inih in Jerusalem a hangme, ringraanei in miivaa Asa kupa rella amijihkha tlungusa.

³² Alamva amahta Jental jaat ankuunga amilantu, mahche aminuihtu khatkho injakna veia aminangche atakchunga amichiltu,

³³ amahta sunga amirattu, anthattu, che nithum tihpia amah in veikhat ringtu.”

³⁴ Mahtrong chuta anmah in rom cheknohsei; mahchu ankuungnata mathup a asih, anmah in lou theihnohsei.

Doh a Aksaa Mitcho Inkhatta Jisu in Amthrat

³⁵ Amah in Jerikho annai in, mitcho inkhat in lamkomma inbok a dohnih a am;

³⁶ miitam in ansehhou chuta atheih in, mahchu jangthlou meta aruiei.

³⁷ Anmah in akuunga antih, “Najareth na Jisu in lamma seh.”

³⁸ Chunna amah in ongsa, “Devit vaa Asa kupa Jisu, keita niril kamvolro.”

³⁹ Amah amaa a akseh in rim amrota ansaal; chuta “Devitva Asa kupa, keita niril kamvolro!” ta amah in ral ralla ongsa.

⁴⁰ Cheva Jisu in ngirra miichuta amahkuunga anthlennatu jathang amlanei, akuunga annai in, amahta arui,

⁴¹ “Nang turella jangnamtlohja angme?” Amah in ason, “Akpu, kei kimit i kimuhjahang.”

⁴² Chunna Jisu in akuunga ason, “Nimitchu muhrosa; nangin namlot kharella nangta namthratpei.”

⁴³ Cheva kak hang amitchu muh achekpei mahche amah aknuta juih a Ringpu ta paar amthratpei; mii naamtein mahkhata anmuh in, Ringpu ta amipaakpei.