LUKE 17 - Akthar Trongirhna (BSI)

Aleh

¹ Amah in aroita asonei, “Madoi tinga nanithlaknatu inlitnoh a thranoh tlohmii thlengtu tla; chuta mah kharella akthleng miikha lahnasa a!

² Amah in andihnao inkhatta aleh ah amthlaak angutva arukinga buhsukna lung inkhat mathoia tuiiboomma nanthlak in amah turelva ralla akthratna veitu.

³ Nantak nanroua cheksilve; nan uh nannao in alehthlou tlohle, amahta chaakve, che amah inta aril thlengle, amahta ipve;

⁴ Che amah in nikhatnia nikuunga veisrih alehthlou tlohle, mahchunna nikuunga veisrih inlenga kei kiril kithlengpeita naksonle amahta ipve.”

Malot

⁵ Raangroi in Akpu ta anson, “Kannih in kamilot i ralla kamilotnatu thlou kanitlohro.”

⁶ Akpu in asonei, “Nannih in intrammutal malotchoule, nannih in mah thotthing ita ‘Nang nikjung inlongbulh a tuiiboomma moongrota’ nanson in nantrong amjuihtu.

Roijuih Khatva Athlou

⁷ “Nannih nankaar a tunangkhat in amah roijuih in loukhoi seh nohle sadamkem asehnata athlengin ‘Intha thlenga buh nisaaknatu mah tebor kuung in inbokro’ ta nanson peime?

⁸ Mahchu ngut a nangin amahta ‘Buh kisaaknatu thlouraang tlohrosa, nitak intlen inseemma keiin buhsa kichenohmiil rou keitlohro; keiin kisaakche aknua nangin nisaak ni iin umangta’ sonnohrei choume?

⁹ Innpuin jathang malanna roijuih in rou atloh kharelna amahta ampaakrei peime?

¹⁰ Nannih inkho chunanga tlohve, nankuunga anson naamte nannih in nantlohlai sonve, ‘Kannihva matik chanoh roijuih ung; kannih in kantlohtupot kanthloukha kantloh uning.’ ”

Jisu in Mii Somta Amthrat

¹¹ Jerusalem lamtonga aseh in Samaria leh Kalili akaar a amah in phaova sehsa.

¹² Che amah in khuu inkhat a aluut in, reichi kop kupa som in inlabep a ngirra amahsoh intuuksei

¹³ cheva anmah in anhou inkaanga onga anson, “Akpu Jisu, kannihta kanirilvolro.”

¹⁴ Anmahta amuh in asonei, “Nannih in seh choulaia nantakta thiimpu ankuunga mamuh eive.” Anmah in ansehsuunga antakchu seengsei.

¹⁵ Cheva anmah ankaarna inkhat in anatna thra sang ta aromin, inlenga, ahoutranga onga Ringpu ta ampaak;

¹⁶ che Jisu akehkungah akhup a antolhche, amahta ampaak. Amah atakva Samaria na mii.

¹⁷ Mahchunna Jisu in ason, “Mii somta kamseengnoh choume? Kuvah ramche seime?

¹⁸ Mah rapkheina mii inoh a Ringpu ta inlenga mapaaknatu tukhatkho amnohseime?”

¹⁹ Che amahkuunga ason, “Inthoua nilamting sehrosa; nangin namlot kharella nangta namthratpei.”

Akthlengsam Kurung Huunna

²⁰ Ringpu vaa kurung huunnakha tik a thleng umeta Pharisi in anrui, amah in amsangei, “Ringpu vaa kurung huunna i daang eisoh inruuia thlengnohtu;

²¹ chunohle anmah in ansontu, ‘Anve, onna amsa!’ nohle ‘Mah khanna amsa!’ alamva anve, Ringpu kurung huunna i nannih nankaar a amsa.”

²² Che aroi ankuunga asonei, “Miivaa Asa kupa akniei ankaar nata inkhat nannih in khalmo nanmuh jahangna laichu thlengtu, che nannih in ohchu muhnoh uchou.

²³ Che anmah in nankuunga nanisontu, ‘Mah khanna anve!’ nohle ‘Onna anve!’ Sehkho sehnohve, aknukho juihnohve.

²⁴ Alamva marvaanna inkhattonga khu anthla in aktlei inkhattonga kvaar nanga miivaa Asa kupa aknikha ochunanga veitu.

²⁵ Chuta amah in matsah a klah knang khalmo aphahtu tla che mah ringnatluun in amahta indahtuei.

²⁶ Noah laia suuk khananga, miiva Asa kupa aknikho mahchunanga veitu.

²⁷ Noah in mulipii asuunga luutnatu aknichu aphahnohmiil, anmah in saa iinna, changvaanga mahche anmahta chang mavaanga inpea ammei, mahcheva tuiiliin thlenga annaamteta ammaangkhemei.

²⁸ Chunanga Lot laia suuk khananga, anmah in saa iinna, lei a juura, che inn lou tloh a ammei,

²⁹ chuta Lot in Sodom nata anthruh aknia marvaannata mei leh meirui inkah a anmah naamteta ammaangei–

³⁰ chunna miiva Asa kupata amdangni achunna mahchunanga veitu.

³¹ Mahni achunna tunangkhat innchunga am in innsuunga am pootta alohnatu trumnoh eiso, che louva ak am amah inkho mahchunanga inna inlengnoh eiso.

³² Lot akmeita intheihve.

³³ Tunangkhat in amah achaanta ankalnatu jonle mahchu maangtu, chuta tunangkhat in amah achaanta maangle mahchu amringtu.

³⁴ Keiin nankuunga kisonpeichou, mahni khulouh a kukthol inkhat a mii innih amtuei; inkhatta aphurhtu che aktlei inkhatva amahtu.

³⁵ Kumei innih in buh sukjoua amtuei; inkhatta aphurhtu che aktlei inkhatva amahtu.”

³⁶ “Mii innih in loupuk ah amtuei; miikhatva alohtu aktlei khatva amahtu”

³⁷ Anmah in akuunga anson, “Ram ame, Akpu?” Amah in asonei, “Akthi ruung amna amunkhanna barmupii in inlomtuei.”