LUKE 15 - Akthar Trongirhna (BSI)

Akmaang Sadam

¹ Ipek roithrai khatkho alehchelei in amahkuunga innaisei.

² Cheva Pharisi khatkho ringjih lulok eiin inso a ansonpei, “Mahmii in alehchel eita louja a anmahsoh buh ansaakjou khame.”

³ Chunna mah pandam ita ankuunga asonei:

⁴ “Nannih nankaar a mii inkhatva sadam reija asihnata inkhat amaang in, raprilla sopkulei ku ta mah a akmaang khata aktuuk nohmiil akjonnohtu mii tunang amchoume?

⁵ Che mahchuta aktuuk in aroomthok a adaar a athongpei.

⁶ Amah inna athlengin, amah aruul apaita che anthringpi eita onga asonei, ‘Keisoh roomthok jourei, alamva kei sadam akmaangkha kiktuukpei.’

⁷ Chunanga keiin nankuunga kisonchou, oinang jimma rilthlengnoh kananoh mii sopkulei kunata alehchel mii inkhat in ril athlengrella ringram a roomthokna veitu.”

Akmaang Baobeh Apum

⁸ “Chunohle kumei khat in harngou apumsom asih, mahsuunga apumkhat maangle, amah in meiser taar a mahchuta aktuuk nohmiil inn thra thir a jonnohrei ume?

⁹ Mahchuta aktuuk in, amah aruul apaiei mahche anthringpi eita onga asonei, ‘Keisoh roomthok jourei, alamva keiin kammaang haarngou apumkha kiktuukpei.’

¹⁰ Chunanga keiin nankuunga kisonchou, oinang jimma rilthlenga alehchel mii inkhatrella Ringpu vaa ringroi anmaikuunga roomthokna veitu.”

Akmaang Asa kupa

¹¹ Mahche asonei, “Asa kupa innih doon mii khat am;

¹² anmah ankaarna maksi in apakuunga ason, ‘Pa o, nangin nidoon nikhaal suunga keiin kichangtu khaan kamlanrosa.’ Cheva amah alalchu anmah innih kuungah asempei.

¹³ Nikhat ninih aknua, asa kupa maksi in achangkhaan naamte amtlonche, khalmo klah rapkheitla khuuboom khat ah sehsa, ohkhanna akanana amnoh a adoon naamte ahuuinapei.

¹⁴ Amah in adoon naamte amthangkir cheva, mah ramboom achunna khalmo lahna buhchaal suuksa, che amah in avaatna thlengsa.

¹⁵ Cheva ramboom achunna am mii khat kuunga aringnatu luut a amsa, innpuin amahta louva vokthlai akpe akseltu amthlahpei.

¹⁶ Mahcheva vokthlai ansaakna a amahkho avon amvah jahangsa; tukhat inkho akuunga saakphu malannohsei.

¹⁷ Chuta atak akroua arilla insonsa, ‘Keipa in mii chahchah tam thlou matloh a amah roijuih in inleisolh a saa iin anphah, chuta keiin onna traamkrel, dongkrella amsang!

¹⁸ Keiin inthoua pakuunga sehtang, che pakuunga kisontu, “Pa o, keiin ringram mahche nangta jekna veia alehthlouta kitlohpei;

¹⁹ Kei i nisakupa angta ong matik chanoh sang; nangin thlou namtloh niroi ei inkhatnanga keita keiloua keihuuina rosa.” ’

²⁰ Cheva amah in inthoua apakuunga thlengsa. Chuta amah in intonga inlabeb a athlenglaia, apa in amuh a aringvol hangsa, cheva inthademma tlaanna amahta konna amchohpei.

²¹ Mahchunna Asa kupa in apakuunga ason, ‘Pa o, keiin ringram mahche nangta jekna veia alehthlou kitlohpei; Kei i nisakupa angta ong matik chanoh sang.’

²² Chuta amah apa in aroieita asonei, ‘Akthrarem puunrei intha thlenna, amahta masilhve; akut a kutsi maneihve, che akeh a kehkhraang machuungve;

²³ mahche siilte annou thlenna thatve mahchu saa a roomthok jourei;

²⁴ alamva amah kisakupa i thinata inlengsa; amah in maangcheta, inlenga kiktuukpei.’ Cheva anmah in roomthok amithronpei.

²⁵ “Ipek asa kupa anpa in louva am; amah in inntonga thlenga inn anailai, amah in laa hoileh laamhou atheihpei.

²⁶ Chunna roijuih ankaar nata inkhatta onga mahchu jarelna meta arui.

²⁷ Chunna amah in ason, ‘Nang ninaokha thlengsa, chunna nipa in ninao kupata nanoh saanoh a ringa aphahrelna siilte annouta athatpei.’

²⁸ Chunna amah in amlung inhaanga luut indahsa. Apa in inthruh a amahta amnem,

²⁹ chuta apakuunga amsang, ‘Anro, vachah soot kumsuunga nangta rou kitlohche, keiin nitrongson kamjuihnoh jakhatkho amnoh; kiruul kipai eisoh roomthok jounatu nikhatnikho siiltekhat rounakho kamlannohche.

³⁰ Chuta nisakupa in kochanoh miisoh inruuia nilal amthangche athlenglaiva, nangin amahturel siil annouta nithatpei!’

³¹ Mahchunna apa in akuunga ason, ‘Kisakupa o, nangva keisoh anirel amjoume, che keiin kisih anaamte i nangtaning.

³² Chunna inih in tlanna iroomthoktal tupotsa, alamva ninao iva thinata kiringsa, che maangnata iktuukpei.’ ”