LUKE 11 - Akthar Trongirhna (BSI)

Khatloh a Nanngenume Tihrella Jisu in Amtheihna

¹ Jisu in amunkhat a ngenna anngeihlai, aroi ankaarna khat in amahkuunga ason, “Akpu, John in aroita amtheih nanga, kannihkho ngennatu kanimtheihro.”

² Chunna ankuunga asonei, “Nannih in nanngenlai,” ngata sonve: “Pa, nang nikming akseeng veiso. Nang kurung huunna tlungchu veiso.

³ Kannih in nikhat nikhattu kanvahna saakphu aknirel kanimlanro.

⁴ Kannih kanlehta kani ipro, alamva kannih inkho kanleiman antool eita kan ip; mahche kannihta madoi tinga kanimthlak nohro, chuta thranoh tingnata kanikalro.”

⁵ Che anmahta asonei, “Nannih nankaar a apaikhat in khulouh janjaia seh a, ‘Ruullo, tol atum inthumru nakputang;

⁶ alamva rapkheina kiruul inkhat keikuunga tlunga, amahta kamlannatu jakhatkho amnohsang’ ta nison in;

⁷ amah in inn asuungnata, ‘Kei kilahnatu keivotnohro, ipek inn inkhaarsa, che kisaeisoh kukthoolla insung; keiin inthoua jakhatkho namlan cheknoh usang’ ta amsang ume?

⁸ Keiin nannihta kisonchou, amah in aruultak aveiphao inthoua akuunga malan indah, chuta amah in inleng inlenga angen rella amah in inthoua amahtu darkaarta amlantu.

⁹ Mahche keiin nannihta kisonchou, ngenve, mahche nankuunga nanimlantu, jonve, mahche nannih in natuuktu; innkhaar beengve, nannihta nanimhoongtu.

¹⁰ Alamva akngen miirel in anphah, akjon miirel in aktuuk, mahche innkhaar akchum miirelta amhoongtu.

¹¹ Nannih nankaar a jaknang apa in Asa kupa in tol anihta lung amlan ume;

¹² chunoh a amah in aartui anihta ruulsok amlan ume?

¹³ Nannih in leikha akthranoh veichoulakho, nansa kuungva akthra kutthol amlan theihchoule, ringramma am Pa kuunga akngen mii kuungah jikcha ralthloia Li Akseengta nanimlan usa!”

Jisu Khatkho Biljebul

¹⁴ Ipek Jisu in trong theinoh khousaar chuungta amnom; khousaar in anthruhlai, trong theinoh miikha trong theihsa, chunna mii in salungkhousei.

¹⁵ Chuta anmah mii arouin ason, “Amah in khousaarvaa kurung Biljebul apaalla khousaarta amnom”

¹⁶ mahche aktlei mii in amahta chaang anna ringramnata daang inkhat amahkuung nata anjon.

¹⁷ Chuta anmah anrilchuta aromma ankuunga asonei, “Ringram kurung huunna anaamte in antaksuunga inthrek baak atlak in maangna suuk, che taploikuung inkhat in taploikuung suunga inthrek baak atlak in klah ah tlaei.

¹⁸ Mahche seitan ankaar a inthrek baak tlale amah kurung huunna in khatloh a paal tueime? Alamva keiin Biljebul apaalla khousaar amnomta nansonnang.

¹⁹ Mahche keiin Biljabul apaalla khousaarta manom angle, nansakupa invah tunang anpaalla anmahta aminom ume? Alamchunna anmah in nannihtu pichaartloh vei tuei.

²⁰ Chuta keiin Ringpu akut majung apaalla khousaarta amnom veiangle, ringram kurung huunna i nankuunga thlengsa.

²¹ Aktrang mii in raal kutlai puunrei thratea silh a, innta alougaak in apoot achei maangnoh a am.

²² Chuta mahchung ralla aktrang thlenga amahta chekle, amah in atrangpina kutlai puunrei anaamteta ansuttu, che ansutpootta insemtuei.

²³ Keisoh anruuinoh amahkhan keita keiandah veisa, che keisoh inchunjounoh amah khanna akthek.”

Akthranoh Li in Veikhat Anlengna

²⁴ “Akseengnoh li in mii inkhatkuung nata anthruh in, anngeihnatu jonna tuii amnohna ram jikcha a sehloon tlamma am; che anngeihnatu jakhatkho aktuuknoh inva ason, ‘Keiin kanthruhna keiinn khanna inlengtang.’

²⁵ Che amah in athleng laia innchu athiirche thratea alamnaia innaalla asih aktuukpei.

²⁶ Cheva amah in seh a amahchung ralla akthranoh aktlei li sirihkho thlenna anluutche mahchunna amsei; chunna amah miikha matsahna ahoong chunga juktoolna ahoong in ralla thranoh veisa.”

Akchim Roomthok Aktlan

²⁷ Amah in trongi asonsuunga, miitam akaarnata kumei khat in ahoutranga onga akuunga ason, “Nangta nakpok kumeikha doiphah veisa, che nangin ni iin chuhkha doiphah veisa.”

²⁸ Chuta Jisu in ason, “Ringpu trongta rungaia mahchuta amjuih aksih miikha doiphah veisa.”

Salungkhouna Thlou Rella Annih

²⁹ Chunna miitam ahanral in amah in trong amthronpei, “Mah ringnatluun ivah thranoh ringnatluun veisa; mah ringnatluun in daang ajon, chuta Jonah kuunga aksuuk daangnoh a aktlei daang nanimlan nohtung.

³⁰ Alamva Jonah in Nineveh na mii ankuunga daang aveinanga, miivaa Asa kupa inkho mah ringnatluun inna veiusa.

³¹ Akhutingna kurungpii in pichaarnia mah ringnatluun na kupaeisoh inruuia inthoua anmahta amilaal tuei; alamva amah kumei in tukleiram achena akiingnata Solomon lousing arungeihnatu thlengsa, che anve, Solomon chung ralla anrol jamekhat onna am.

³² Nineveh na mii in pichaarnia mah ringnatluun isoh inruuia inthoua maita amilaaltu; alamva Jonah in trong araan khanna anmah anril anthlengpei, che anve, Jonah chunga ralla anrol jamekhat onna am.”

Ruungvaa Meiser

³³ “Meiser antaarche tukhat inkho mahchuta anthupna amunnohle luktoong athuuia sihnoh ei, chuta innsuunga akluut mii in mah akvaar khata anmuhnatu meiser taarna achunga anthong.

³⁴ Nang nitaktu meiserva nimitsa; nimitkhata thra seengle, nitak apumtekho thra akvaar in siptu, chuta nimitkhata thra seengnohle, nitak apumtekho inthim in siptu.

³⁵ Churella nangkuungah ak am akvaarkha anthimnoh natu insuulro.

³⁶ Nang nitak apumteta akvaar in siple, anthimna amun tlakna amnohle, meiser kvaar in nangkuunga nakleng nanga nitak apumte kvaar in siptu.”

Jisu in Pharisi leh Ringjih Lulok eita Amlaalei

³⁷ Amah in atrong suunga, Pharisi inkhat in amahta buh asaakpinatu inruruh a ason, che amah in seh a busaakna tebor a inboksa.

³⁸ Amah in buh asaaknoh maa a matsah a akut asilnoh invah Pharisi in amuh a salungkhousa.

³⁹ Mahchunna Akpu in akuunga ason, “Pharisi nannihvah buhkaan leh kamva apaaltonga thra nantlen, chuta nanril suungavah salokleh akthranoh in sipchou.

⁴⁰ Chuta kmong eio, apaaltonga thra a iniseem amah in asuungtongkho naniseem nohme?

⁴¹ Chuta asuunga ak am pootkha inltenve; che anve, bilam anaamte nannih turella seengkirsa.

⁴² “Chuta Pharisi nankuunga lahna veisachou a! Alamva nannih in rilvol ai, ruileh thingbur lungbur anaamteva somma inkat, che akchimleh Ringpu rilvolva thou sanohchou; aktleita thousanoh tlohnoh a mah anaamte i nantlohtu tla.

⁴³ Pharisi nankuunga lahna veisachou! Alamva Sinakok a akangveia inbokva nandit chela keithiil keithiilla mii in nannihta nanimthruunna naninjahkho nandit

⁴⁴ Nannihva lahna veisachou a! alamva nannihva mii in anmuhno rusuun nangsachou, mah amunkhata mii in romnoh a achungakho sehtlam loontlam ei.”

⁴⁵ Ukil khat in amakuunga amsang, “Lulok, mah nison i kannihta kanisaal peiche.”

⁴⁶ Amah in ason, “Ukil nannihkho lahna veisachou a! Alamva nannih in miita pootrikvah namiroon, nannih nantak invah pootrikha ste ajaangnatu nankutmajung inkhat inkho domnohchou.

⁴⁷ Nankuunga lahna veisachou! Alamva nanpa nanpuin anthat ringraan eita phuumnatu rusuun nanchoh.

⁴⁸ Chunna nannih in sakhi veisachou, nanpa nanpuvaa anthloukha nannih in nanjatlam; alamva anmahta anthatpei nannih in anmahtu rusuun nanseem.

⁴⁹ Alamchunna Ringpu alousingin ason, keiin ringraan leh raangroi eita kamthlahtuei, anmah arouta anmah in anthattu che arouta anchuttu,

⁵⁰ mahchu tukleiram amthron lainata ringraanei anthii tlakha mah ringnatluun chunginna atlakna ajanatu relna,

⁵¹ Akseeng munleh thiilkuung ankaar a akthi akmaang Abel vaa thiinata Jekhariah athii phah a.

⁵² Ukil nannihta lahna veisachou a! Alamva nannih in khiialvaa chapi nanlohpei; nantak invah luutnohchou, che akluut miikho nankhaampei.”

⁵³ Cheva ohkhannata amah in sehsa, chunna Pharisi leh ringjih lulok in amahkuunga intlon amithronpei, aktlei jikchakho atrongnatu anrokpei,

⁵⁴ alamva amah in trong amsoilai ansuurnatu amahta ruunga a amsei.