LUKE 10 - Akthar Trongirhna (BSI)Jisu in Mii Sopsrihta Amthlah 1 Mahchuche aknua Akpu in aktlei sopsrihta phom thunna ansehnasam khuupiirel mahche amun jikchah a anmahta mii innih innih a amthlah ei. 2 Mahche Jisu in ankuunga asonei, “Lou luhnatuva tam am, chuta akluhtu miiva tamnoh; churella lou luhnatu thloutloh mii amthlahnatu lou Akpu kuunga ngenve. 3 Nannih in sehve; anve, uiiramuii ankaar a sadamte nanga keiin nannihta kamthlah peichou. 4 Skhao thong maruuinohve, thong mahche kehkhraang jakhatkho phurhnohve; che lamma tukhatkho mathruunnohve. 5 Nannih in nanluutna inn khanna matsah a, ‘Mah innkhanna leh oi am veiso!’ ta sonve. 6 Mahche ohkhanna leh oi vaa asa kupata amle, nannih leh oi kha anmah anchunga amtu; chuta amnohle, mahchu nankuunga inlengtu. 7 Mah innkhanna nga amve, che anmah in nanimlankha saa inna amve, alamva thlou aktlohmii in amahtu atlohman phah i matikcha; inn inkhatnata inn inkhat a inlennohve. 8 Nannih in khuupii khat a nanluutlai anmah in nannihta ja a nanilou eile, anmah in nanmaikunga nanidoonkha saave; 9 mah khanna ak am mii kna ksaeita mathrat eive, che ankuunga sonve, ‘Ringpu vaa kurung huunna nankuunga innaisa.’ 10 Chuta nannih in khuupii khat a nanluutlai anmah inta nanijanoh a nanilounoh eile, lamkhanna seh a sonve, 11 Nannih khuupiina uphul kankeh a akmaarta nannihta naniandah veia kannuulpei; chuta nannih in mah i romve, mahchuta Ringpu vaa kurung huunna nankuunga innaisa. 12 Keiin nankuunga kisonchou, mahni chunna mah khuupii chunga Sodom in ralla rilvolna veitu.” Amlotnoh Khuupiiei ( Met 11:20–24 ) 13 “O Khorijin, nangkuungva lahnasa ah! O Bethsaida, nangkuungva lahnasa a! alamva akchek amneh thlou nankuunga atlohkha Tair leh Sidon nah tlohleva, anmah in mahlaia bulaa puunrei mahche meivut a inbok a ril anthleng tupotta. 14 Chuta pichaar atlohlai nannih nanchunga Tair leh Sidon in ralla rilvolna veitu. 15 Mahche Kaparnaum nango, nangva ringram phah a nakdom ume? Nangta repnanga nakthlaktu. 16 “Nannih nantrongta aktheih mii in kei kitrongta antheihpei, che nannihta nanijanoh mii khanna keita keijanohsei, che keita keijanoh miikhan keita kamthlah Akpu amahta janohsei.” Mii Sopsrih in Inleng 17 Mii sopsrih khan roomthok a inlengsei, che anson, “Akpu, nang nikminga khousaar inkho kannih kanthlanga ammei!” 18 Mahchunna Jisu in ankuunga asonei, “Khu inthla in marvaannata tlananga Seitan in tla kimuh. 19 Anve, muruul mahche nachal anchunga nanchilhnatu khatkho nannih jeknaei antuuita nancheknatu keiin nannihta akchek amneh kamlanchou; che jakhat inkho nannihta nanimsok tlohnohtu. 20 Chuta oh inna nannih in roomthok tlohnohve, mah chuvah li in nanthlanga am, chuta nannih in roomthokve mah chuvah nannih nanming ringramma injih a amtusa.” Jisu in Aroomthok ( Met 11:25–27 ; 13:16–17 ) 21 Mah pungtal achunna Jisu in Li Akseenga aroomthok a ason, “Ringram khatkho thaleiva Akpu, Pa o, nangta kampaakche, alamva mah naamte i aksing mahche akloutheih ankuungnata mathup a nisihche nao ankuunga namdangpei; oi, Pa, alamva mah i nangin namdon malungsi thlouta veisa. 22 Bilam naamte Pa in keikuunga namsilpei, che Pa noh a Asa kupakha tumeta tukhat inkho romnoh ei, nohle Asa kupa noh a Pa ta tukhat inkho romnoh ei che Asa kupa in achar miikhan amahta amdangnatu relna. 23 “Mahche aroi ankuunga inheia inruk a asonei, nannih in nanmuhta akmuh eiva doi akphahsei! 24 Alamva keiin kitihchou, ringraan leh kurung eiin nannih in nanmuhta anmuhja, chuta muhnoh ei, mahche nannih in nantheihta antheihjahang, chuta theihnohsei.” Akthra Samaria Miivaa Pandam 25 Mahche anve, ukil inkhat in inthoua Jisu ta chaang anna ason, “Lulok, ache amnoh ringna kphahnatu jangkitloh ume?” 26 Jisu in akuunga ason, “Trongsuura khatloh a injih a amme? Che katloh a nipaame?” 27 Amah in amsang, “Nangin Akpu Ringpu ta niril apumte, niruung ringna apumte, nikli apumte, mahche nimdon apumtea rilvolro, che nangin nanthringpita nitaknanga rilvol eiro.” 28 Mahchunna Jisu in akuunga ason, “Nangin khalmo chimma namsangpei khame, mahchu tlohro, che nangin ringuche.” 29 Chuta atak in akchim aveija hanga Jisu ta ason, “Keiin kinthringpi miichu tume?” 30 Jisu in amsang, “Mii inkhat in Jerusalem nata Jerikho phah a ajunglai, amah in inru inraan ankut a tlasa, amah apuunrei ansutche marat a akthi hoonga mah a sehsei. 31 Pek mah laitalla reipakthra veia thiimpu inkhat in amah lamtongkhan ajunglai; amahta amuh in akomtonga peella sehsa. 32 Mahchunanga Levi na mii khat inkho amun achunna athlengin, amahta amuh, aktleitonga peella sehlasa. 33 Chuta Samaria na mii khat in rapkheitla asehlai amah amnatonga thlengsa amahta amuh in aringvol hangsa, 34 cheva amahkuunga thlenga asoknata thaoleh ngangli tuii poih a athlompei, cheva amah atak sachunga amchuungche miitlungna inn khat ah aphurhpei che thratea asihpei. 35 Mahche akhuvar a amah in baobeh dinari innih thlenna miitlungna inn akpu ta malanna ason, ‘Amahta thratea anna rou tlohro; che amah relna nangin baobeh namluut anaamte keiin veikhat kithlenglai kamlengkir uche.’ 36 Anmah inthum ankaar a jaknangmii in inru inraan ankut ah aktlavaa anthringpi mii veime ta nangin nimdon sakhi khome?” 37 Amah in ason, “Amahta aringvol hanga rou aktloh miihkhasa.” Mahchunna Jisu in akuunga ason, “Nangin seh a mah khananga tlohro.” Jisu in Martha leh Meri ta Seh a Aphah 38 Anmah in nga tloh a ansehlai, amah in khuu inkhat a luutsa; cheva akming Martha an ong kumei khat in Jisu ta lousoonga amah inna amthlungpei. 39 Amah anaokumei Meri an ong inkhat am, amah in Akpu akehkungah inbok a amah atrongta arungeih. 40 Chuta Martha in routloh a khalmo innoksa; amah in Jisu kuuga thlenga ason, “Akpu o, kei kikroua routloh inchek angta kinaoin keimah i thousanoh cheme? Keita kamjoomnatu amahta sonro.” 41 Chuta Akpu in amsang, “Martha, Martha, nithlou tamrella inchoia lah sacheme; 42 thlou inkhatva darkaar. Amahkuung nata inlounoh tupot akthra chuumta amah in acharpei.” |
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
Bible Society of India