LUKE 1 - Akthar Trongirhna (BSI)

Trong Mathronna

¹ Amthron lainata anmit tak in anmuh mahche trongta rou aktlohmii, in ikuunga amilankha aknujuih a,

² inih ikaar a atlungkirche thlouvaa amramma mii aktam in thamin maveia kut ansunna turella,

³ O, amtik liin Thiophilas nangin nitam akchim thaminta rom ajanatu,

⁴ keikho matsahna thloulam anaamte nikuunga thratu ta madonna kimjih.

Aklup John Poktuta Matsah a Inson

⁵ Judia kurung Herot achup a Abijah loomvaa ruul veia, akming Jekhariah an ontunangkhat thiimpu inkhat am. Che amah akmeiva Aaron sakheina. Che amah akmingva Elijabeth.

⁶ Che anmah innih in Akpu vaa trongthuun mahche pichaar naamte akchimnoh amnoh a seh a Ringpu maikunga akchimlamseh veiei.

⁷ Chuta ansa amnoh, alamva Elijabeth va khungsa. Che anmah innih ankumkho tamsei.

⁸ Chunna nga tloh a amah in aloom ruul aknujuih a Ringpu maikuunga thiimpu thlouta atlohlai,

⁹ thiimpu phom kastam nujuih a Akpu thlaamsuunga luut a mekruk haal akuunga tlasa.

¹⁰ Che mekruk ahaallaia mii naamte apaalla ngenna ammei.

¹¹ Mahchunna Akpu vaa ringroi inkhat in mekruk ahaalna mun akchangtonga ngirra amahta ammuhpei.

¹² Chunna Jekhariah in mahchuta amuhlai inhalsa, cheva tak a intri suuksa.

¹³ Mahchunna ringroi in akuunga ason, “Intrinohro, Jekhariah, alamva nangin ningenkha atheihpei, chunna nang nikmei Elijabeth in asa kupa inkhat apoktu, che amah akming John niongtu.

¹⁴ Chunna tlan mahche khalmo roomthok nangtu veitu. Che amah nipok in mii aktam anroomthoktu.

¹⁵ Alamva amah in Akpu amit anna liintu, tuiibuhkho iinnohtu. Che anu vonsuung nata mathronna Li Akseeng in siptu.

¹⁶ Chunna Israel asa aktamta amah in anmah Ringpu kuunga amlengtuei.

¹⁷ Che anpa amilungta ansakuung che trongson amjuihnoh miita akchim lousingah amlengnatu Akpu turel amchaang miita thlouraang amtlohnatu, Akpu ninga Elijah vah li leh aktranga sehtu.”

¹⁸ Mahchunna Jekhariah in ringroita ason, “Mahchu keiin khatloh a kiromume? Alamva keivah tarsang, che kikmeikho akum tamsa.”

¹⁹ Chunna ringroi in akuunga amsang, “Ringpu amaia akngir Kabriel keisang che nangsoh trongnatu mahche akthra trongi nikuunga thlennatu keita kamthlah ang.

²⁰ Che anro, thlou naamte i asuuknohsot mahnichu phah a nangva trong suuknoh uche, alamva akthlengsam laia aktlungsam kison trongta nangin malotnohche.”

²¹ Nga tloh a asonlaia mii eiin Jekhariah ta apaalla gaak a amsei. Che amah in mathruunna thlaamma sotmal a am invah anmah in salungkhousei.

²² Mahchuche amah in anthruh inva ankuunga trong cheknohsa. Cheva amah in mathruunna thlaamsuungah ahamuhta amuhpeita anmah in anrompei. Cheva amah in ankuunga trongtheihnoh sang ta daang atloh ei.

²³ Cheva amah in rou atlohna thlou amcheche inna inlengsa.

²⁴ Mahni khannata chuche aknua akmei Elijabeth nao inpooisa che mah i sonna amah atak in thla ranga inthupsa.

²⁵ “Mah chuvah miikaara keiin injak kikoknatu kichunga Akpu in keianna aknikhanna keita nga tloh a kamsuuk peiang.”

Jisu Poksam Matsah a Inson

²⁶ Chunnata thla kuruk antang in Najareth antih Kalili vaa khuuboom phah a Ringpu kuungnata Kabriel ringroita amthlahpei

²⁷ Devit innsuung Joseph an ong kupa inkhatta trong amromche akseeng rungaa kuunga thlengsa, che rungaak akmingvah Meri.

²⁸ Che amah in akuunga thlenga ason, “Doiphah veiro, malungsi akphah rungaak o, Akpu in nangta nanruuipi.”

²⁹ Chuta mah asontrong chunna amah in khalmo inchoisa, kamthruunni jaknangta kamthruunna vei satame ta arilsuunga amdonpei.

³⁰ Mahchunna ringroi in akuunga ason, “Intrinohro Meri, alamva nangin Ringpu akuungnata malungsi niphahpei.

³¹ Che anro, nangin nao inpooia nisakupa inkhat nipoktu. Mahche amah akmingva Jisu niongtu.

³² Amah in amtik liintu che ankaangremva Ringpu Asa kupa niongtu. Mahche Akpu Ringpu in amahkuunga apa Devit vaa anbokna amlantu.

³³ Che amah in Jakob atute chunga ache amnoh a paaltu. Che amah kurung huunnavaa ache amnohtu.”

³⁴ Mahchunna Meri in ringroi kuunga ason, “Keiva kamsalkho amnohmangta mahchu khatloh a vei ume?”

³⁵ Mahchunna ringroin akuunga ason, “Akseeng Li in nangkuunga trumtu, che Akthloiremvaa tuui in nangkuunga aniim thla a thlou atlohtu; churella nipoksam akseengi Ringpu vaa Asa kupa niongtu.

³⁶ Mahche anro nang sakhei Elijabeth khungkha atartinga asa kupa inkhat inpooia ipek thla kuruk aphahpei.

³⁷ Alamva Ringpu nata anthruh trong naamte veinoh amnoh.”

³⁸ Mahchunna Meri in ason, “Anro, Akpu rou aktloh kumei keikuunga nangin nison nujuih a keikuunga suuk veiso.” Cheva ringroi in amahkuung nata amahpei.

Meri in Elijabeth ta Seh a Aphah

³⁹ Chunnata Meri in inthoua rapthing ram Judia khuuboom inkhat a intha sehsa.

⁴⁰ Mahche amah in Jekhariah inna luut a Elijabeth ta saambaan amlanpei.

⁴¹ Chunna nga tloh a Elijabeth in Meri va saambaanta atheihlai avonsuungna naoin inthomsa. Che Elijabeth kho Li Akseeng in sipsa.

⁴² Mahche amah in tranga in ongsa, “Kumei ankaar a nangva doiphah veisache. Chunna nivon suungna naoi doiphah veisa.

⁴³ Mainangi keininga khatloh vei ume? Keitu Akpu anuin kikuunga athlengi?

⁴⁴ Mah chuvah anro, nang saambaan ahou kimkuur in atheihlai, kivon suungna naoin khalmo roomthok a inthomsa.

⁴⁵ Chunna amlot kumeikha doiphah veisa. Alamva Akpu tingnata keikuuunga asonkha tlungusa.”

⁴⁶ Mahchunna Meri in ason, “Kei kiril in Akpu ta kampaakpei.

⁴⁷ Mahche kei kikli in keikal Akpu Ringpu akuunga aroomthoksa.

⁴⁸ Alamva Akpu nangta rou aktloh ah marnop kumei ahoongta nihun anpei. Alamva anro, ipeknata mathronna ringnatluun anaamte in keita doiphah vei ta kan ong usang.

⁴⁹ Alamva akchek amneh khanna keikuunga akliinthlou atlohpei, che Akpu amah akmingva akseengsa.

⁵⁰ Che amahta aktrih miiva ringnatluun rel Akpu arilvol am.

⁵¹ Amah kutbaanga atrang ammuh, amah in amtuhta akrom ril in amah khanna thoiliin miita akthek kirpei.

⁵² Phompii ah akchek amneh mii eita atuulsunpei. Chunna marnop miita amliinpei.

⁵³ Aktraam miita akthra poot ah amah in amsippei, mahche doonkhaal miita aruuk a amthlahpei.

⁵⁴ Abraham leh ache amnoh amah arilvol antheihnatu,

⁵⁵ inih ipa ipu ankuunga asonnanga amahvaa roijuih Israel ta amjoompei.”

⁵⁶ Mahche Meri in thla inthumvak amahsoh inruuia amsa cheva inna inlengsa.

Aklup John Poksam Matsah a Ason

⁵⁷ Cheva Elijabeth in nao apoknatu thla antang in asa kupa inkhat apokpei.

⁵⁸ Mahche Akpu in amahkuunga ralthloia arilvol ammuhpei ta anthringpi mii in mahche amah sakhei in antheih lai amahsoh inruuia anroomthoksei.

⁵⁹ Mahche nga tloh a nijan kirit atangin naota avun tannatu anmah in thlengsei. Che anmah in apavaa akming nujuih a naota Jekhariah anthunsam,

⁶⁰ chuta anuin ason, “Nganoh, amah akming John iongtu.”

⁶¹ Mahche anmah in akuunga anson, “Nang sakhei ankaar a oinanga an ongming louamnoh.”

⁶² Mahche amahta jaknangming nithunjame ta nao apakuunga anromna daang tloh a anruipei.

⁶³ Mahchunna amah in amjihnatu intlaap inkhat anih a, “Amah akming John” ta amjihpei. Che annaamte in salungkhousei.

⁶⁴ Mahche kak hang abao inhoongsa, amlei injaksa che amah in Ringpu ta mapaak a trongsa.

⁶⁵ Cheva anmahsoh inhiilla ak am annaam in intri suuksei. Che anaamte i Judia ram muul pumtea inthangsa.

⁶⁶ Mahche naoi jangvei umeta aktheih annnaam in anrilsuunga ansihpei. Alamva Akpu kut in amahsoh inruuisa.

Jekhariah in Aphoong

⁶⁷ Cheva apa Jekhariah in Li Akseeng sip a phoonga ason,

⁶⁸ “Israel vaa Ringpu Akpu doiphah veiso, alamva amah in athlengche amah amiita thloknatu thlou atlohpei,

⁶⁹ mahche amah roijuih Devit innsuunga inih turella chaanring aki amthruhpei,

⁷⁰ leithingnata akseeng ringraanei annar a amson khananga,

⁷¹ inihta jekna mii mahche inihta inintirh ei ankutnata inikaltu;

⁷² inih ipa ipuei rilvoltheih trongchetta impaangnatu, mahche amah akseeng trongirhnata mapolhnoh a intheihnatu,

⁷³ inih iputhou Abraham kuunga trongchet atloh nujuih a,

⁷⁴ inihta jeknaei ankutnata inikalla intri amnoh a amahta routloh icheknatu,

⁷⁵ inih iringna chaan in sot a amah maikuunga kseenga mahche akchimlamseh veia iamnatu.

⁷⁶ Mahche nao nangva, Ankaangrem ringraan kiong uche; alamva nangin Akpu alam nimchaangnatu amah amaa a seh uche,

⁷⁷ amah amiivaa anlehta ipnatu chaanring akrah amlantu,

⁷⁸ inih Ringpu in inirilvol apaalla inthim leh akthi aniimma anbok miita amvaarnatu,

⁷⁹ anthimma anbok anchunga mahche akthivaa anniimma ak ammi anchunga amvaarnatu, inih ikehkaarta leh oi lamma inichingnatu relnasa.”

⁸⁰ Naoin li inkho liinsa, trangkho trangsa, mahche amah atakta Israel ankuunga ammuh nohmiil raprilla amsa.