KOLOSIA 4 - Akthar Trongirhna (BSI)

¹ Akpu eio, ringramma nannihtukho Akpu am tih a romma nannih naichieita chimma mahche thra a ampieive.

Matheihna

² Ngennah inngainoh a, mapaaksoh inruuia doua amve;

³ Khrista vaa anthup trongta kansonnatu akthratrong rella Ringpu in innkhaar kanimhoongnatu kannih turelkho kaningenpive, churella keiin simma amsang,

⁴ keiin kitrongtuphu veia mahchuta seenga kitrongnatu keingenpive.

⁵ Akthra laita theih ahuuina a apaaltongah am eitinga singa seh loonve.

⁶ Nannih nantrong nanlata malungsia machih nanga matuive. Chunna nannih in mairella khatloh nanimsang ume nanromchek natu.

Achena Saambaan

⁷ Taikhikas in keirella khalmo nanisonpei; mahmii i keiin kirilvol unaosa, mahche malot aja routloh mii mahche Akpu kuungah keisoh roijuihjou mii.

⁸ Mairella nankuunga amahta kamthlahpei, chunna nannih in kannih rella nanromnatu mahche nannih nanrilta nanimsohnatu,

⁹ amah leh nankaara malot aja che rilvolna unao Onesimus soh inruuia kamthlahpei. Onna aksuuk naamte anmah in nankuungah ansontu.

¹⁰ Keisoh simma amjou Aristarkas khatkho Barnabas vaa unaosuuk Mark in nannihta saambaan nanimlan, amahrella nanimtheihna ah nanphahchepei, amah inta nangkuungah thlengle lousoongve,

¹¹ mahche Jisu tih a an ong Justus inkho nannihta saambaan nanimlan. Avuntan ankaara Ringpu kurung huunna turel keisoh tlohkhaljouvah anmahningei, anmah in keita kanboh ang.

¹² Nannih nankaara Jisu Khrista vaa roijuih Epaphras in saambaan nanimlan, nannih in mapungpha a nanngirhnatu che Ringpu vaa amdon naamte mapung maphanatu amah in lai amrella ril luut a nannih turel angen.

¹³ Alamva amah in nannih turel Laodisia mahche Hirapolis ah am mii turel tranga thlou atloh tih a keiin sakhi kimlan.

¹⁴ Rilvolna maipa Luke mahche Demas in saambaan nanimlan.

¹⁵ Laodisia ah am unao ankuungah nanphah in anboom khakla ta saambaan kamlanei.

¹⁶ Mah trongjihthuun i nankaara nanphahche, Laodisia ah am khakla akho mapaave, mahche Laodisia tingna trongjihthuun kha nannih inkho paave.

¹⁷ Arkhippas akuungakho sonve, “Nangin Akpu nata niphah routlohkha namthlungnatu roomro.”

¹⁸ Amah saambaan i Paul kikuttak in kimjih. Thirhang kankhit angkha kantheihve. Malungsi in nannihta nanimruui veiso.