KOLOSIA 1 - Akthar Trongirhna (BSI)

¹ Ringpu in amdon nujuih a Khrista Jisu vaa raangroi Paul mahche iuhnao Timothi,

² Kolosia ah am Khrista ting akseeng mii mahche malot aja unaoei nankuung: Inih Pa Ringpu tingna malungsi khatkho leh oi nankuungah am veiso.

Mapaakna Malan Rella Ngen

³ Nannih turel kanngen kanngenna ah inih Akpu Jisu Khrista vaa Apa Ringpu ta lai amrel kmipaak,

⁴ alamva nannih in Khrista Jisu ta namilot mahche akseeng mii naamteta nanrilvolkha kantheihpei,

⁵ alamva nannih turel ringrammah asih matuur kharelna. Oirella akthratrong akchimkha matsah a nantheihpei.

⁶ Mah chuvah nankuungah thlengsa, mah i tak a tukleiram apumtea akrah inrah che moong nanga nannih in Ringpu vaa malungsi akchimta kantheih chuche mi innata nankaar akho am veisa,

⁷ mah i nanringvol roijuih Epaphras aningnata nanrompei. Amahvah inih ingut a Khrista ting malot aja rou aktloh miisa.

⁸ Li ah nannih in nanringvolkha kannih tingkho namirompei.

⁹ Oirella mah ita itheihni khannata nannih in livaa khiial mahche bahapthla anaamtesoh inruuia amah in amdonta asihnatu nannih turella ngen inngainoh ung,

¹⁰ akthra turella akrah inrah a che Ringpu khiial tingna hanralla porh mahche amahta khalmo mapella Akpu vaa matikcha chaanna nansehnatu.

¹¹ Alamva amah paarhtra che achek amneh nujuih a tuui anaamtesoh nannihta nanimtrang veiso, alamva mah i nannih in nandoutrang natu mahche roomthok a nanthotrang natu,

¹² akvaar khanna akseeng mii inkho chuum aphahnatu inihta inija inih Pa ta mapaakrei.

¹³ Anthim in ichungah paalla am khannata amah in inikalche amah arilvol Asa kupa vaa kurung huunna tingah inihta inimlanpei,

¹⁴ che inih ilehta amahningah in ip iphah a amah kuungah inthlokho iphahpei.

Mii khat Veia Khrista vaa Athlou

¹⁵ Amahva muh icheknoh Ringpu aniimma inseem bilam naamte kaarnata matsahrem akpokhasa;

¹⁶ alamva amahvah ringramma khatkho thaleia ak am aseem naamte suunga muh ichek khatkho muh icheknoh anaamte, phompii, nohle akthloi veia akpaalei, nohle aklok veia akpaalei, nohle akchek amneh ei slakho anaamte amah apaalla che amah turella aseemkirpei.

¹⁷ Bilam naamte amaa a amahvah rouamsa, che anaamte amah kuungah amkirei

¹⁸ Amahva ruungtu tihvah khaklatu akangsa, chunna bilam naamte ankaara amah in matsahrem veisa.

¹⁹ Alamva Ringpu vaa ahoongta amahningah sip a ammi Ringpu in apelna,

²⁰ che amah in thingkharh apaalla leh oi inimphah peia thalei nohle ringramma am mii naamte amah apaalla inimcham peia inimtuuktu.

²¹ Mahche nannihvah, amaa laikhat ah thranohthlou jikcha tloh a rapkheimii mahche irilla amahta andah mii veichoukha,

²² pekva nannihta amah amaikuungah seenga imraal amnohluunga nanimlannatu atak aruungin athih apaalla machamma Ringpu soh inimtuukpei,

²³ nannih inta malot khanna inngainoh a inchek amnoh a che chetkenga amchouleva, nantheihche ringram athlanga, aseempot anaamteting araanche akthratrongin amtuurna khanna nannih inta aktleiting inlenno choulevah mah i vei aja mah churella keiin routloh mii hukveisang.

Khakla vaa Roijuih khat Veia Paul Athlou

²⁴ Pek keiin nannih turella klah knang jikcha kiphahrella kiroomthok ang, che khakla akvei Khrista vaa aruung turella klah knang akvaatta keiin kimchepei,

²⁵ Ringpu trong anaamteta nankuungah maromnatu nannih turella keikuungah amlan akseengthlou nujuih a keiin rou aktloh hukveisang,

²⁶ chup jikchanata khatkho ringnatluun jikchanata mathup a asih trongta pekvah amah akseeng mii ankuungah amdangpei.

²⁷ Ringpu in achar Jental ankaara anthuptrong amlan paarhtra i jikchah phah a doonkhaal angmeta amromja, mahchuvah paarhtravah matuurna nankaara am Khrista khasa.

²⁸ Lousing naamte in mii naamteta chaak a che matheih a iraan, mah i Khrista ningah mii naamteta mapungpha a imlannatu relna.

²⁹ Alamva oirella tranga inchek ang, che kei kichungah amah in tranga kamsoh nujuih aril luut a kitloh kikhal.