KALATIA 6 - Akthar Trongirhna (BSI)

Nanlah Nansam Inroonjouve

¹ Unaoeio, mii khat in chimnoh lamma sehta suurchoule, li ah am nannih in ril innnemsoh inruuia oinang miita veikhat malengve. Nitak luungkho namdoinoh natu cheksilro.

² Khatleh khatin nanlah nansamma injoomve, nga tloh a Khrsita vaa trongsuurta mathlungve.

³ Alamva jakhatnoh luungah mii khat in keiva mii khat veisang ta madonle, amah atak anroua insimnasa.

⁴ Chuta miirel in atak anroua chaang in anso, chunohleva amah atak anrouta ralla athoina veitu.

⁵ Alamva miirel in atak ataktu potrik aroontu.

⁶ Tukhat in trong ita matheih levah amtheihmii khasoh akthra naamte chuum jajouso.

⁷ Insimnanohve, Ringpu vah manuih phunoh, alamva mii khat in avorh nujuih a mahkhata inlenga aphahtu.

⁸ Tukhat in amah aruungtalta vorhle, aruungin avorhpot akmaang khata aluhtu, chuta tukhat in liting vorhle Li tingna ache amnoh chaankha aluhtu.

⁹ Inih in akthra tloh ah kmongnohrei, alamva inih inta iril inlengnoh levah athratna lai athlengin mahkha inluhtu.

¹⁰ Ohchunna inih in tancha iphahlai, mii naamte kuunga che amlot taploikuungah thloia akthra tlohrei.

Achenatu Veia Chaak Khatkho Saambaan

¹¹ Anve kikuttak in jihmuh anrol in nankuunga kimjih,

¹² Mah i ruungah thra a mamuh akdi tukhat in nannihta nanvun tannatu naninamtu. Khrista vaa thingkharh rella anmahsoh anchunnohnatu.

¹³ Alamva avun aktan anmahluung inkho trongsuurta majuihnoh ei; chuta nannih nanruungah paarthra phahnatu nannihta nanvunta tan anmah in andit.

¹⁴ Chuta inih Akpu Jisu Khrsita vaa thingkharh khop noh a kei turella paarthratna jakhatkho amnoh, mahchunna keichungah tukleiram i anmah in amithlahpei che keivah tuleiramma amsang.

¹⁵ Alamva avuntan tannoh in jakhatkho akanana amnoh, chuta akthar kutseem khare.

¹⁶ Amahlam ita majuih a akseh mii che Ringpu amii Israel anchungah leh oi khatkho rilvoltheih am veiso.

¹⁷ Peknata tukhat inkho keita kamlahnohchou; alamva Jisu rella kei kiruungchunga daakmun khalmo roonna ammang.

¹⁸ Unaoeio, Akpu Jisu Khrista vaa malungsi in nannih nanlita inruuipiso. Amen.