KALATIA 4 - Akthar Trongirhna (BSI)

¹ Pek keiin mah ita kisonchou, lal akchunkhan nao aveilaisootva, taploikuungah ak am anaamte amah in akpu veislakho, amah in naichinata inthliinnoh;

² chuta apain nising akaknata aphahnohmiil apain amahta jok a asihna athlanga amah in am.

³ Mahchunanga inih in nao iveilai tukleiramvaa amuvei livaa naichi veia amme.

⁴ Chuta laita aphahkhem invah, kumei in apok, trongsuur athlanga Ringpu in Asa kupata amthlahpei;

⁵ mah i trongsuur athlanga am mii eita athloknatu relnasa, nga tloh a inih in injok asa iveinatu relnasa.

⁶ Alamva nannihvah asa kupa veisachou, Ringpu in Asa kupa vaa Li ta nanrilsuunga amthlahpei, Li in “Abba! Pa o tih a aong!”

⁷ Alamchuna Ringpu apaalla nangvah naichi inlenga veinohsache, chuta asa kupa veisache, che asa kupa taningchevah amah alal akchunkho veisache.

Kalatia mii Turella Paul in Aril Amluut

⁸ Amaa leithingah nannih in Ringpu nanromnohlai, nannihtu anono louamche amlui hoongah Ringpu noh a naichi ah inkhit a louamchou;

⁹ chuta pekva Ringpu nanromnatu nannih in thlengsachou, che Ringpu inkho nanirompei chela khatloh a marnopting mahche thaleina hoong litingah veikhat inlengla mangchoume, naichi nanveiche veikhatla naichi nanveija mangme

¹⁰ Nannih in kini, thla, manjangnuram mahche kumthla eita malot majuih a ngaak a thlengchou!

¹¹ Keiin nannih turella kitloh kikhal i sul veisamtame intrisang.

¹² Unaoeio, kinoolchou, nannihkho keinanga veive, alamva keikho nannih nanga veisang. Nannih in keiningah chimnoh tlohnohchou;

¹³ nannih in nanrom mahkha kei kiruungin marnoprella matsah a nankuunga akthra trongta kiraanpei;

¹⁴ mahche kei kiruungvaa ahoongi nannihtinga chaang anna veislakho, nannih in keita usitnoh mahche keiandah talva nohchou, chuta Ringpu vaa ringroi nanga, Khrista Jisu kuungah keita nanrounoh ang.

¹⁵ Nankuungah nanrilpelkha khaveisame? Alamvah keiin sakhi kimlanchou, mahchuvah vei ajaleva, nanmitta kholla keikuungah namilan utang.

¹⁶ Mahchu nankuunga akchimta kison in nannihta naniandah veisangme?

¹⁷ Anmah in nannih turel khalmo athratnatu antloh, chuta akthravah nohsa, anmah in nangta kankuung nata maje andit, mahchuvah nangin anmah turel khalmo athratna nitlohtu.

¹⁸ Alamva athratna thloutloh turella ril luut i keiin nannihsoh kiamlai khop noh a tlohvah thra.

¹⁹ Keitu andih naoeio, nanrilta Khrista ahoong mathlaak a anseemnoh miilvah keiin nannih turel naopoksam anuin klahnanga keiin klahsang.

²⁰ Pek keiin nannihsoh amjoua kei kiroolhouta kithlengpeita kimdon; alamvah nannih rella kiril inhalsang.

Hagar leh Sarah Tingnata Tamphu

²¹ Trongsuur athlangah ak amja nannih i keisonve, trongsuuur in asonkha theihnoh choume?

²² Alamva mah i injihsa mah chuvah Abraham asa kupa innih kaara, khat in naichi kumeivaa asa mahche khatin thlaang thlaang kumeivaa asa.

²³ Chuta naichi kumeivaa asa kupakha ruung nujuih a pok, che thlaang thlaang kumeivaa asa kupain trongchet apaalla pok.

²⁴ Pek maita malak a asonnasa: mah chuvah amah kumei innih i trongirhna innihta mathieh a asonna ahoong, inkhat in naichi aveinatu asa apokei; amah kumeichuvah Hakar khasa.

²⁵ Pek Hakar i Arab ah am Sinai Muulsa; amah kumei in pekna Jerusalem tu pandamsa, alamvah amah kumei in asaeisoh naichi veia ammei.

²⁶ Chuta achungtong am Jerusalem vah thlaang thlaangsa, amah kumei innihvah inih inaamtetu inusei.

²⁷ Alamva mah i injih a am, “Roomthokro, o asa poknoh, khung kumeio, nipuuknatu ongro, nao akroinoh nango, alamva akmaangming akphah ansa in amisal am ansanata ralla tammei.”

²⁸ Unaoeio, pek inihvah Aisaak nanga trongchetvaa asasame.

²⁹ Chuta lai achunna ruung nujuih a pok amah in Li nijuih a pok amahta chut a amnang, pekkho mah i suukmang.

³⁰ Chuta ringjih in kha asonme? “Naichi kumeileh asa kupata manomve, alamva kumei khavaa asa kupain thlaang thlaang kumeivaa asa kupasoh lalchunjou janohtu.”

³¹ Chunna unaoeio, inihvah naichi asanohme chuta thlaang thlaang kumeivaa asasame.