KALATIA 3 - Akthar Trongirhna (BSI)

Trongsuur nohle Malot

¹ Ah, kmong Kalatia miieio, akchimta namilotnoh natu tunang in nannihta nanioi peime?

² Oikhopta naniruitang: Nannih in trongsuurvaa athlouta nantloh rella Li ta nanphahme, chunoh a malotsoh inruuia rungaia Li ta nanphahme?

³ Nannih in maichah phah a kmong mangchoume? Li soh namithron joukha pek nannih in ruungah namiche peime?

⁴ Nannih in sulla klah knang nanthopeime? Tak a mahchu sul veisame?

⁵ Nannih kuungah Li nanimlan mahche nankaara salungkhouna thlou aktloh nannih in trongsuurta athlou veia nantloh relname chunoh a malotsoh inruuia nanrungeih relname?

⁶ Nga tloh a Abraham in “Ringpu ta amlotpei, che amahta akchimlamseh tih a ateenpei.”

⁷ Chunna amlot mii anmahta Abraham vaa asasei ta nannih in nanrom.

⁸ Jental in Ringpu ta amilot apaalla amchim peita ringjih in leithingah matsah a muh a, matsah a Abraham kuunga akthra trongta raanna ason, “Nang nipaalla jaatboom naamte in doi anphahtu.”

⁹ Chunna nga tloh a Ringpu amlot Abraham soh inruuia malot mii naamteta doi amlanei.

¹⁰ Alamvaa trongsuurvaa athlouta aktloh miirel phool athlangah ammei, alamva mah i injihsa, “Trongsuur nirik ah injih ah am naamte majuih a chet a ak amnoh miirel phool phahso.”

¹¹ Pekva mah i seengsa mah chuvah Ringpu maikuungah trongsuur in tukhatkho machimnoh; alamva “Akchimmii in trongsuur malot apaalla ringtuei.”

¹² Chuta trongsuurta malot tingnanoh, alamva “Mahkhata aktlohmii in mah khanna ringtuei.”

¹³ Khrista in inih turella phool phah veia trongsuurna phool khannata inithlokpei–alamva mah i injihsa, “Thingchunga anthoi miirel phool aphahpei.”

¹⁴ Mah chuvah Khrista Jisu apaalla Abraham adoita Jental anchunga thlengnatu, mahche inih in imlot apaalla Li vaa trongchetta iphahnatu relnasa.

Trongsuur Khatkho Trongchet

¹⁵ Unaoeio, mii in antrongna nanga keiin trongsang: mii khat in madonna angirhnakha tukhat inkho sul maveinoh, nohle mahchu daakkho daaknoh.

¹⁶ Pek Abraham leh amah atute eita trongchet amlan. Miitam rella asonnanga, “Atute ankuunga” tihnoh, chuta inkhatturella sonna, “Nang nitu” mii khat ah atihning, amahchuvah Khrista sa.

¹⁷ Keiin kitihnavah oire: kum reija manlilei sopthum aknua akthleng trongsuur i matsah a Ringpu in amchetche trongsuur khata sul maveinoh.

¹⁸ Alamva inphahtu phuta trongsuur nata veileva, mah i trongchet nata veinoh usa; chuta mah i Ringpu in Abraham kuunga trongchet atloh nujuih a amlanpei.

¹⁹ Chuleva trongsuurvah jarelnasame? Trongchet akphahmii ankuunga atute anthleng nohmiil chimnoh akseh miiei rella trongsuurta adaakpei; mah i khatleh khat macham matuukna thloui ringroi anpaalla suuksa.

²⁰ Pek machamma amtuuk amah i loomkhat innihna macham matuukna thlounoh, chuta Ringpu akrou athlouning.

Trongsuur In Amdon

²¹ Chuleva trongsuur i Ringpu vaa trongchetta jekna veime? Mahchuvah tiknikho suuknohso, alamva ringna amlanchek trongsuurta malanlevah, atatak a akchimlamseh i trongsuur apaalla vei tupotta.

²² Chuta Jisu Khrista ta malot apaalla trongcheta amlot mii kuungah malannatu ringjih in anaamteta aleh athlanga asihkirpei.

²³ Pek malotkha athlengnoh maa a, inihta trongsuur athlanga suura inisihpei, malotkhata amdang nohmiil mathupnoh a asih.

²⁴ Chunna Khrista in athlengnohmiil trongsuu in inihta inisel, mah ita malot apaalla inihta inimchimnatu.

²⁵ Chuta pekva malotkha athleng inva, inihta inisel athlanga amnohsame;

²⁶ alamva nannaamte in Jisu Khrista ta namilot apaalla Ringpu asa ei veisachou.

²⁷ Alamva Khrsista tingah inlup nannihvah khrista ta puunrei silhnaga nansilhpei.

²⁸ Onna Judi kho, Kriik kho, naichikho, thlaang thlangkho threknoh, kupakho kumeikho threknoh; alamva nannaam Khrista Jisu kuunga inkhat veisachou.

²⁹ Mahche nannih in Khrista vaa amii veisachoule, nannihvah Abraham vaa atutesachou, che trongchet nujuih a nannihvah lal akchun veisachou.