KALATIA 2 - Akthar Trongirhna (BSI)

Paul Khatkho Aktlei Raangroiei

¹ Mahchuche kum somlei manli aknua Barnabas soh Titas phurh a veikhat Jerusalem a hangsung.

² Keikuunga keiphoong nujuih a keiin seh ang, keiin Jental ankaara kiraan akthratrongkha amuvei mii kuungah kamromei, chunohleva keiin kitlaanni nohle kitlaankha sul vei aja.

³ Chuta keisoh inruuijoua Titas luungkho Kriik veislakho amahta avun tannatu jilla matlohnoh ang.

⁴ Jisu Khrista kuunga iammi ningtamta chimnoh amlot mii in inruk a jihnatu anthlengrel mah i suuk, mahchuta inihta naichi inimveinatu relna.

⁵ Kannih in kakrukho anmah anthlanga amnatu luutnoh ung, chunna akthra trongvaa akchimta nannih turella incheknoh a sihnatu.

⁶ Amuvei akchingeile anmahtu jangmekhat inthlin amnoh; Ringpu in keimii miimii manainoh, mahkhananga akchingmii eiin keikuunga jakhatkho anchuungna amnoh.

⁷ Inthleng ala, anvun tannoh mii turella akthratrongta keininga amsilpei tih a anmuhpei,

⁸ (alamva amah in avun tanna turella noon nathlou aktloh pichaar apaalla amtlohkha kei kipaal akho Jental ankuunga amlan.)

⁹ Keikuunga amlan malungsi i keikuunga amlanlai anmah in anromma kukcho veia ming akseh Jems, Keiphas mahche John in keiningah mahche Barnabas inruuipia akchangtongah akut kanimlanung, mahchuvah kannih in Jental mahche avuntan ankuunga sehnatu,

¹⁰ kannih in inranriingta intheih ungi anmah in kaniromung, mahtalta keiinkho kitlohja.

Paul in Pitar ta Antiok ah Asaal

¹¹ Chuta Keiphas in Antiok ah athlenglai amahta maileh mai intuukpi indah ang, alamva amah amraal amrelna.

¹² Alamva Jems kuungnata mii arou anthlengnoh maa a Pitar in Jental eisoh ansaak an iinjoupei; chuta anmah in anthleng laia amah in avun aktaneita trihrella akroua insengsa.

¹³ Che aktlei Judi arou inkho amahsoh ril seengnoh thlouta antloh, chunna anril seengnoh thlouta antlohkhanna Barnabas luungkho amiruuipei.

¹⁴ Chuta anmah in akthratrongta akchimrella intluunna ansehnoh kimuh in, anmah annaam anmaa a Keiphas ta kisonpei, “Nangin Judi khat niveiche Judi khat nanga ringnoh a Jental ei anhoonga niringche, khatloh a Jental eita Judiei nanga anringnatu niktak eime?”

Malot Apaalla Judi leh Jental eiin Inkal Anphah

¹⁵ Inih in ipok lainata Judime aleh am Jental khanohme,

¹⁶ mii khat i trongsuurvaa thlouin machimnoh chuta Jisu Khrista ta malot apaalla inimchimnatu inih inkho Khrista Jisu ta imlot, trongsuurvaa thlou vanoh, alamva trongsuurvaa thlouin tukhatkho machim cheknohtu.

¹⁷ Chuta Khrista in inimchimnatu insuulrei itaktal inkho aleh amsame tih a rommele, chuleva Khrista vah alehta rou aktlohsame? Mahchuvah tiknikho veinohso!

¹⁸ Alamva keiin kikthritche pootta veikhat seemsangle, kitak kanroua akchimta vanna akseh miisang tih a inromsang.

¹⁹ Alamva trongsuur apaalla keiin trongsuur ah thisang, mahchuvah keiin Ringpu kuunga kiringna turelna.

²⁰ Keiin Khrista soh inthlujousang keiin kiringi keinoh ang, chuta kitaksuunga Khrista in ring; mahche ipek keiin ruunga kiringi keita keirilvol mahche keirella ataktalta amlan Ringpu vaa Asa kupata kamlot apaalla keiin ringang.

²¹ Keiin Ringpu vaa malungsita louphennoh ang, alamva trongsuur apaalla machimna suukle, chuleva Khrista in thi i amram amnoh veisa.