JOHN 9 - Akthar Trongirhna (BSI)

Amit Choa Pok Miikhatta Jisu in Amthrat

¹ Amah in nga tloh a asehlai, amit choa pok mii khat amuh.

² Chunna aroi in akuunga anrui, “Lulok, mahmii kupa in amit choa pok i tunangvaa aleh relname, chunohle anu apa eime?”

³ Jisu in amsang, “Mahkha atak in alehthlou atloh relna khonoh nohle anu apa khonoh, chuta Ringpu thlouta amahkuunga amdangna turelnasa.

⁴ Keita kamthlah amah athlouta kini amlaia itlohtu tlasa; khulouh veisle tukhat inkho thloutloh cheknohtu.

⁵ Keiin tukleiramma kiamlai sootva, keiin tukleiramtu akvaarsang.”

⁶ Mahchuta asonche, tukleia machilla philchop amnoiche philchuta amit ah ateipei,

⁷ amahta ason, “Seh a, Silom pukhri a chaamro” (Silom arthava Mathlah). Chunna amah in seh a achaampei, che amit muh a inlengsa.

⁸ Matsah avah doh a aksaa miita amit muh akchek inva anthringpi in ansonpei, “Mahmii i inbok doh a aksaa mii khanohme?”

⁹ Arouin anson, “Mahmii khasa” aktlei in ansonla, “Amahnoh, asak inloning” Amah in ason, “Kei i mahmii khasang.”

¹⁰ Anmah in akuunga anson, “Chule nang nimit khatloh a meenga nimuhchek peime?”

¹¹ Amah in amsang, “Jisu ta an ong mii khanna philchop manoia kimit keiteiche keisonang, ‘Silom a seh a chaamro’; chunna keiin seh a kchaam inva kimit muh kichekpei.”

¹² Amahta anson, “Amahvah ram amme?” Amah in asonei, “Romnohsang.”

Mahmii Kupa Amthrat Khata Pharisi in Minna Ansuii

¹³ Anmah in mitcho khata Pharisi ankuunga anthlenpei.

¹⁴ Jisu in philchop balla amit ammuhna aknikha sabatni veisa.

¹⁵ Amah amitkha khatloh amuhmeta Pharisi inkho anruila. Ankuunga asonei, “Amah in kimitchunga philchop abal, mahchuta keiin kchaam in muh kichekpei.”

¹⁶ Pharisi arouin anson, “Mahmii i Ringpu tingnanoh, alamva amah in sabat ngaaknoh.” Chuta aktlei in anson, “Alehchel mii in oinang daang khatloh a atlohchek ume?” Anmah ankaar a inthrek inbaakna veisa.

¹⁷ Chunna anmah in mitchota veikhat ansonla, “Amah in nimit nammuh taningva amahturel nangin jangnisonjame?” Amah in ason, “Amahvah ringraan inkhat.”

¹⁸ Amit muh akphah miikha anu apa ta Judi in an ongnohsoot, amahvah amitcho chuta amuhpeita anmah in malotnoh lusei,

¹⁹ cheva anmah in anu apa ta anrui, “Amah i nansakupa khanohme, amit choa pokta nanson khanohme? Chuleva khatloh amah in muh achekpeime?”

²⁰ Amah anu apa in amisangpei, “Amah i kansakupa, amit choa pokta kanrom;

²¹ chuta amah in khatloh a ipek amit amuhme, che tunang in amah amitta ammuhme romnoh ung, amah atak changsa atak in atak turel asontu, amahta ruive.”

²² Amah anu apa in Judi ta antrih rella mah i anson, alamva tunangkhat in Akpu ta Khrista ta phoongleva; amahta sinakok nata aminomtu ta Judi in matsah a anjana am.

²³ Churella anu apa in anson, “Amah atak changsa, atakta ruive.”

²⁴ Chela anmah in amitcho miita veinih inlenga onga anson, “Ringpu ta mapaakro; mahmii i alehchel miita kanrom.”

²⁵ Amah in amsang, “Amah i alehchel miime chelnohme keiin romnohsang; keiin kiromva, kimit choangta ipekva muh kichekpei.”

²⁶ Amahkuunga anson, “Amah in nangkuunga kha atlohme. Khatloh a nang nimitta amhoongme?”

²⁷ Amah in amsangei, “Keiin nankuunga kisonpeichou, che nannih in keirungainoh sachou. Chela nannih in jarella veikhat nanrungeihja mangme? Nannihkho amah aroi nanveja taksame?”

²⁸ Cheva amahta thikrak a saalla antipei, “Amah aroiva nangche, chuta kannihva Moses aroiung.

²⁹ Ringpu in Moses kuunga trongsa ta kanrom, chuta mah kupa iva ramnata thlengme romnoh ung.”

³⁰ Mahmii in amsang, “Amah in ramnata thlengme tihkho romnohchou, chuta kimitva amhoongpei. Mah i jarella salungkhouna veime.

³¹ Inih in irom mah chuvah Ringpu in alehchel miita rungainoh, chuta tunangkhat Ringpu ta injah a amthruun mii veile che amah in amdonkhata tlohle mahmii khata Ringpu in arungeih.

³² Tukleiram amthron lainata tukhat amit choa pokta amuhpeita anson lou theihnoh mangme.

³³ Mahmii inta Ringpu tingnanoh leva, jakhatkho tloh cheknohtu.”

³⁴ Amahkuunga amisang, “Nangva aleh in inlep a pokche, chela nangin kannihta kanimtheihla mangche?” Cheva amahta aminompei.

Li a Mitcho

³⁵ Amahta aminompeita Jisu in atheihpei, cheva amahta antuukpia akuunga ason, “Nangin miivaa Asa kupata namlotme?”

³⁶ Amah in amsang, “Lulok, mahmiikha tume, keiin kamlotnatu?”

³⁷ Jisu in ason, “Nangin amahta nimuhpei, nangkuunga aktrongi amah khasang.”

³⁸ Chunna amah in ason, “Akpu, keiin kamlot,” cheva amah in Jisu ta amthruunpei.

³⁹ Jisu in ason, “Akmuhnoh mii in anmuhnatu che akmuh mii in mitcho anveinatu, tukleiramta pichaar tlohnatu keiin thlengsang.”

⁴⁰ Jisu komma innaia am Pharisi arouin mahchuta antheihpei, cheva amahkuunga anson, “Mahchu kannihkho mitcho sungme?”

⁴¹ Jisu in ankuunga asonei, “Nannih inta mitchobeng chouleva, nanleh amnoh uta; ipek nannih in nanson, ‘Kannih in kanmuh,’ chuta nannih nanlehva nantaksoh am.”