JOHN 7 - Akthar Trongirhna (BSI)

Jisu leh Anaoei

¹ Maiche aknua Jisu in Kalili a sehsa; amah in Judia a sehnoh, alamva Judi in amahta anthatnatu anjon.

² Pek Judi ei Ramuk buhdoonnakha innaisa.

³ Chunna amah anao in akuunga anson, “Nangin nitlohthlou ei i niroi inkho anmuhnatu amah aphommi mah a Judia a sehrosa.

⁴ Alamva tukhat in amah atakta mii kuungah marom akdimii in inthup a atloh jakhatkho amnoh. Nangin mah ita nitlohche nitakta tukleiramma madangro.”

⁵ Alamva amah anaotak inkho amahta malotnoh mangei.

⁶ Jisu in anmahta asonei, “Keiturel lai ipek thlengnohmang, chuta nannihtu laiva aknirel onna am.

⁷ Tukleiram invah nannihta nantirh cheknoh ei, chuta amah inva keita kantirh alamva amah athlouva thranoh ta keiin sakhi kamlanrelna.

⁸ Nannihvah buhdoonna khanna sehve; keiva mah buhdoon khanna sehnohtung, alamva keiturel lai tlungnohmang.”

⁹ Mah ita asonche, atakvah Kalili a inmahsa.

Jisu in Ramuk Buhdoonna a

¹⁰ Maiche aknua amah anao in buhdoonna a ansehnua, amah atakho mii maromnoh a inruk a hangsa.

¹¹ Judi in amahta buhdoonna a jonna anson, “Mahmiikha ramchesame?”

¹² Miitam ankaar a amah relna chikchakta insosei. Arouin anson, “Amahvah akthra mii khame,” aktlei in anson, “Mahchunoh, amah in miita chimnoh a inhea aching.”

¹³ Chulata Judi ta antrih rella tukhat inkho amahrella indanga trongnohsei.

¹⁴ Buhdoonna laita ahanphah in Jisu in mathruunna thlaamma hanga amtheih ei.

¹⁵ Judi in salungkhoua anson, “Mahmii in tamnoh luunga atheih asingi khatloh a veime?”

¹⁶ Mahchunna Jisu in anmahta amsangei, “Keiin kamtheihchou i keitanoh, chuta keita kamthlahvaa ata;

¹⁷ tukhat in amah in amdonta atlohjale, amah in amtheihkha Ringpu tingname chunohle amah akroutu akchek amnehta trongme tihkha atak in aromtu.

¹⁸ Amah akroutu akchek amneh a trongle amah akroutu paarthrata ajon; chuta amahta amthlah akuungnata paarthrakha jonle mahkha akchim, amahkuunga chimnoh ansoi amnoh.

¹⁹ Moses in nankuunga trongthuun nanimlannoh peime? Chuta tukhat inkho trongthuunkha majuih nohchou. Nannih in keita jarelna keithat reita nanjonangme?”

²⁰ Mii in amisang, “Nangva khousaar chuungsache! Nangta tunang in nakthatreita nakjonme?”

²¹ Jisu in ankuunga amsangei, “Keiin thloukhat kitloh, mah thlou khanna nannih nannaamte in salungkhoua amchou.

²² Moses in nankuunga avun tannatu nanimlan (Mahkha Moses tingnanoh, chuta pa pu tingnasa), che inngeihna aknia nannih in miita anvun nantan.

²³ Moses trongthuunta akoihnoh nahtu inngeihna aknia miita anvun tanchoule keiin inngeih nia mii aknata kamthratkhem rella nannih in keichunga namilung inhaangnohme?

²⁴ Miisak anna pichaar tlohnohve, chuta akchim pichaar tlohve.”

Mahmii i Misaiah me?

²⁵ Alamchunna Jerusalem na mii arouin anson, “Anmah in thatreita anjonkha mahmii inohme?”

²⁶ Che onna amah in indanglonga tronga amsa, cheva amahkuunga jakhatkho sonnohsei! “Mahmii i tak a Khrista sa ta anrompeime?

²⁷ Chuta Khrista in tik a thlengume, ramnata thlengume tukhat inkho romnoh; chulata amahvah ramnata thlengme irom.”

²⁸ Chunna Jisu in mathruunna thlaamma amtheih ei, “Nannih in keita nanromang, che ramnata thleng umeta nanromnoh angme? Chuta keiin kichek kamneh roua thlengnoh ang; keita kamthlah amahkha akchimsa, amahta nannih in romnohchou.

²⁹ Keiinvah amahta kirom, alamva keita kamthlah amahkuung nata thlengsang.”

³⁰ Chunna amahta suurnatu anjon; chuta tukhat inkho achunga kut thlaknoh mangei, alamva amah apung epekphah thlengnohmang.

³¹ Chulata miitam ankaar nata mii jikcha inva amahta malot a anson, “Mahmii in atloh daang chunga Khrista in athleng laia ralla atloh umang?”

Jisu Ansuurnatu Raalmii Amithlah

³² Jisu rella mii khalmo tamin chikchakta insoeita Pharisi in antheihpei, chunna akthloi thiimpu leh Pharisi in amahta ansuurnatu phrangkita amithlah ei.

³³ Mahlai Jisu in ason, “Keiin nannihsoh kak soot a amjoutung, mahchuche keita kamthlah amahkuunga sehlatung;

³⁴ Nannih in keita nanjontung chuta keituuknoh uchou; keiin kiamna a nannih in thlengcheknoh uchou.”

³⁵ Judi in khatleh khat insonsei, “Inih in tuuk icheknoh natu ram amunna mahmii in sehsam reime? Kriik ankaar a inthek invorh ak am inih mii ankaar a seh a Kriik eita matheihtang atihmeio?

³⁶ ‘Nannih in keita nanjontung chuta keituuknoh uchou,’ che ‘Keiin kiamna a nannih in thleng cheknoh uchou’, ta amah in atrongi jaknang trongsame?”

Ringna Chaan Amlan Tuii

³⁷ Ujouhoong acheni akthloi nia, Jisu in ngirra rool inkaanga onga trong araan, “Tunangkhat in atuii raalle, amah in keikuunga thlenga iinso.

³⁸ Keita amlot amah in, ringjih in asonnanga, ‘Amah arilsuunga akringvaa avaatuii luungtu.’ ”

³⁹ Pek tunangkhat in amahta amlot mii in anphahsam Li kharella ason; alamva Likha malannohmang, mah chuvah Jisu kha paar mathratnoh mang.

Miikaara Inthrek Inbaak Suuk

⁴⁰ Mahtrong chuta antheih in, mii arouin anson, “Amah i tak a ringraansa.”

⁴¹ Aktlei in anson, “Amah i Khrista khasa.” Chuta mii arouin anson, “Khrista in Kalili nata thlengume?

⁴² Khrista va Davit innsuungna, Davit in a amna khuu Bethlehem nata inthruhta ringjih in asonnohme?”

⁴³ Chunna amahrella mii ankaar a inthrek inbaak suuksei

⁴⁴ Arou inva amahta ansuurja hangsa, chuta tukhat inkho amah achunga kutthlak cheknohsei ak.

Aktloh Akhal Judi in Amahta Amilotnoh

⁴⁵ Anmah in anthlenglaia Pharisi in anlouson, “Nannih in amahta jarella thlennoh choume?”

⁴⁶ Phrangki in amisang, “Tukhat inkho mahmiinanga trongnoh mangei!”

⁴⁷ Pharisi in ankuunga amisang, “Nannihkho amahnoh lamtinga nanisehpi peime?

⁴⁸ Amahta malotnatu tukhat in nankuungnata nohle Pharisi tingnata akchek amnehtrong inthruhsme?

⁴⁹ Trongsuur romnoh miitamva phool anphahpei.”

⁵⁰ Mah i matsah a Jisu kuunga seh a intuukpi anmah ankaarna Nikodimas in ankuunga asonei,

⁵¹ “Inih trongsuur nujuih a mii khat in jangthlouta atlohmeta matsah a rungaihnoh maanna miita pichaartloh ajame?”

⁵² Amahkuunga amisang, “Nangkho Kalili na miinohcheme? Majonna anve Kalili nata ringraan tukhatkho inthruhnoh.”

Kupa Laalrella Ansuur Kumei

⁵³ Cheva anmah in inn inna inlengsei.