JOHN 6 - Akthar Trongirhna (BSI)

Jisu in Mii Akpul Rangata Amsaak

¹ Mah i aknua Jisu in Kalili tuiiboom Tiberias araalla sehsa.

² Che mii khalmo tam in amah aknuta anjuihpei, alamva amah in akna mii ankuunga daang jikcha atlohkha anmuh.

³ Jisu in muulla akalche ohchunna aroisoh inbokjousei.

⁴ Pekva Juditu laalna ujouhoong chol jaonoh buhdoonna aknikha innaisa.

⁵ Intouva a an in, mii khalmo tam amahkuunga thleng amuh a, Jisu in Philip kuunga ason, “Anmah in ansaaktu ramnata tol ilei ume?”

⁶ Mah asonni amahta chaang annatu atlohning, alamva amah atak in kha atloh ume arom.

⁷ Philip in amahkuunga amsang, “Kutlang reija innih aman akho ansaaktuphu tol leinakho bangnohtu.”

⁸ Aroi ankaarna Simon Pitar anao Andriu in akuunga ason,

⁹ “Mah khanna niimtol ranga leh nga innih aksih nao kupasa inkhat am; chuta mii khalmo tam i kha itloh usa?”

¹⁰ Jisu in ason, “Mii naamteta mabok eive.” Amah amunchunna meiphul thratea moong; maiphul chunga annaam inboksei, anmahva kupa akpul rangavak ei.

¹¹ Chunna Jisu in tol atumta louva ampaakche anbok miita ansempei; mahchunanga nga chukho anmah in anvon anvah nohmiil ansaakpei.

¹² Che anmah naamte in anvon anvahche Jisu in aroita atih ei, “Jakhatkho mamaangnoh a anlei akirkaarkha chunve.”

¹³ Chunna anmah in mahchuta amichunpei, che mii in mahchuta ansaakche niimtol ranganata anlei akirkaarkha luktoong somlei innih sip a anthaal.

¹⁴ Amah in atloh daang khata anmuh in anson, “Tukleiramma akthleng ringraankha taktak a mahmii isa.”

¹⁵ Chunna amahta namma kurung amiveinatu kansuursam peiang ta arompeia, Jisu in veikhatla akroua muulla insengsa.

Jisu in Tuiichunga Akeh ah Seh

¹⁶ Cheva khulouhram athlengin, amah aroiva tuiiboomma trumsei,

¹⁷ anmah in muli chuunga tuiiboom vanna Kaparnaum phah a ansehnatu amithronpei. Cheva inthimsa, Jisu vah ankuunga thlengnohmang.

¹⁸ Thli tranga araangrella tuiiboomma tuiisolh thlengsa.

¹⁹ Anmah in kilomitar inthum nata rangavak mulita anthoh in, Jisu in tuiiboom chunga akeh ah seh a thlengsa mulikuung phah a innai anmuhpei. Chunna anmah in intrisei,

²⁰ chuta anmah kuunga asonei, “Intrinohve; keisang.”

²¹ Cheva anmah in roomthok a amahta mulisuunga anloulohpei, che kak hanga anmah in antlungnasam tuiipaal khanna mulikha tlungsa.

Mii in Jisu ta Anjon

²² Akhuvar a tuiiboom araalla miitam in muli inkhatruta am anmuhningsa, che Jisu in aroisoh inruuia mulia chuungnohsa, chuta amah aroivah anroua sehningsei.

²³ Chulata Akpu in mapaak a tol ansaakna amunkha naia Tiberias tingnata muli ste ankuunga thlengei.

²⁴ Jisu kho aroikho mah khanna amnohseita anrompeia, anmah in muli chuunga Jisu akjon Kaparnaum a sehsei.

Jisu vah Ringna Tol

²⁵ Che anmah in Jisu ta tuiiboom araalla antuuk a amahta anson, “Rabbi, tik a onna thlengcheme?”

²⁶ Jisu in anmahta amsangei, “Keiin nankuunga taktak a kisonchou, nannih in keita nanjon angi daang nanmuh kharelnanoh, chuta nannih in niimtol nansaakche nanvon anvah kharelna.

²⁷ Akmaangsam saakphu relna thlou tlohnohve, chuta miivaa Asa kupa in nankuunga nanimlansam ache amnoh ringna phah amsam saakphu kharella thlou tlohve alamva amahta Pa Ringpu in chum anampei.”

²⁸ Chunna akuunga anson, “Ringpu athlou kantlohnatu kannih in jangthlouta kantlohtu tlame?”

²⁹ Jisu in ankuunga amsangei, “Akpu amah in amthlah amahta malot i Ringpu vah thloukhasa.”

³⁰ Chunna ankuunga asonei, “Chuleva kannih in muh a kamilotnatu, jaknang daang nampaang ume?”

³¹ Kan pa kanpu in raprilla manna ansaak; nga tloh injih nangsa. “Amah in ringramna tol ankuunga amlannei”

³² Chunna Jisu in ankuunga asonei, “Keiin nankuunga taktak a kisonpeichou, ringramnata tol nanimlankha Moses noh, Pa in ringramnata akchim tolta nanimlanpei.

³³ Alamva Ringpu vaa tolli maisa mah chuvah ringramnata trumma tukleiramma ringna nanimlanpei.”

³⁴ Anmah in akuunga anson, “Akpu, lai amrella kannihta tol kanimlanro.”

³⁵ Jisu in ankuunga asonei, “Keital i ringnatu tol khasang; keikuunga akthleng mii in traamnoh usa, che keita amlot mii in tikniakho atuii raalnoh usa.

³⁶ Chuta keiin nankuunga kisonchou, nannih in keita nanmuh peiang chuphao keita kamlotnohchou.

³⁷ Pa in keikuunga amlan anaamte keininga thlengtu; keikuunga akthleng miita tikniakho manomnohtung.

³⁸ Keiin kamdonta kitlohnatu ringramnata thlengnoh ang, chuta keita kamthlah Akpu amah in amdonta kitlohnatu thlengsang;

³⁹ che keita kamthlah Akpu amah in amdonkhavah maisa, amah in keikuunga amlan anaamteta keiin jakhatkho mamaangnoh a, chuta achena aknia amringna turelnasa.

⁴⁰ Alamva Pa in amdonkhavah maisa, mah chuvah Asa kupata muh a amlot mii naamte in ache amnoh a ring anphahna turelnasa; che amah in keita achenia kamringtung.”

⁴¹ “Keiva ringramnata akthleng tol khasang” ta Jisu in asonkhanna Judi in amahkuunga anson.

⁴² Anmah in anson, “Mahmii i Joseph asa kupa Jisu khanohme, anuleh apava iromnohme? Che keiva ringramnata aktrum angta ipek khatloh a asonme?”

⁴³ Jisu in ankuunga amsangei, “Nannih seeng nankaar a insonohve.

⁴⁴ Keita kamthlah Pa in keichingnoh avah tukhat inkho kikuunga thleng cheknoh, che keiin amahta achena aknia kamringtu.

⁴⁵ Mah i ringraan nirik a injih khasei, ‘Anmah naamteta Ringpu in amtheih tuei.’ Pa tingnata aktheih mahche tamma akrom mii naamte in keikuunga thlengei.

⁴⁶ Tunangkhat in Pa ta nanmuhpei tihnoh ang Ringpu tingnakhop in Pa ta amuhning.

⁴⁷ Keiin nankuunga taktak a kisonchou, amlot mii khanna ache amnoh a ring aphahpei.

⁴⁸ Keiva ringnatu tol khasang.

⁴⁹ Nanpa nanpuin raprilla manna kha sakho ansaak, thikho thisei.

⁵⁰ Ringramnata akthleng tolkha maisa, mah chuvah tunangkhat in maita saaleva thinohtu.

⁵¹ Ringramnata aktrum akring saakphukha keisang; tunangkhat in mah tol ita saaleva, amah in ache amnoh a ring aphahtu; che tukleiram in ringna turella keiin kamlansam saakphukha kei kitaksa.”

⁵² Cheva Judi in khatleh khat trong indenseia, ansonpei, “Khatloh a amah atakta isaaknatu inihkuunga inimlan ume?”

⁵³ Chunna Jisu in ankuunga asonei, “Keiin nannihta atak a kisonchou, nannih inta miivaa Asa kupa atakta saanoh choule che amahvaa athiita innohchoule, nantak a akring amnohtu;

⁵⁴ kei kitakta aksaa mahche kei kithiita ak iin mii in ache amnoh ring aphahtu, che amahta keiin achena aknia kamringtu.

⁵⁵ Alamva kei kitak i saakphu khasang, mahche kei kithii i iinphu khasa.

⁵⁶ Kei kitakta aksaa mahche kei kithiita ak iin amahkuunga keiin amtung. Che keiin akuunga injomma amtung.

⁵⁷ Akring Pa in keita kamthlah mahche keiin Pa rella kiring nangjimma, keita keisaamii in kei turella amahkho ringusa.

⁵⁸ Ringramnata aktrum tolkha maisa, ipa ipuin ansaakche thieikha ohkhanangnoh saakphu ita aksaa amah in ache amnoh a ringtu.”

⁵⁹ Amah in Kaparnaum a amtheih ei nanga, mahtrongi sinakok a asonei.

Ache Amnoh Ringna Trong

⁶⁰ Amah aroi in maita antheih in akuunga anson, “Mah i aklutrongsa, tunang in arungeihchek ume?”

⁶¹ Chuta amah aroi in insoeita Jisu in aromma ankuunga asonei, “Mah kson in nannih nanril inlengna veime?

⁶² Chuleva miivaa Asa kupa in matsah a a amna a akalkha nannih in muchoule khatloh a nanson ume?

⁶³ Chaan amlankha Lisa, ruung inva jakhatkho akanana amnoh; keiin nankuunga kson trongeikha li leh chaan khasa.”

⁶⁴ Chuta nannih nankaar a amlotnoh ste ammangchou. Alamva amlotnoh mii eikha che amahta akjuur miikha tunangmeta matsah a arompei.

⁶⁵ Che amah in ason, “Churella keiin nankuunga kisonchou, Pa inta amahkuugna malannohle, tukhat inkho keikuunga thleng cheknohtu.”

⁶⁶ Maiche aknua amah aroi aktam in inlengsei, che amahsoh veikhat sehjou nohsei.

⁶⁷ Jisu in aroi somlei ihta asonei, “Nannihkho nanlengjasme?”

⁶⁸ Simon Pitar in akuunga amsang, “Akpu, tukuunga seh usungme? Nangkuunga ache amnoh chaantrong am;

⁶⁹ kannih in nangta malot a kanrompeiche mah chuvah Nangva Akseeng Ringpu khache.”

⁷⁰ Jisu in ankuunga amsangei, “Keiin nannih somleinihta kcharnoh choume, nankaarna inkhatva rappu chuungsame?”

⁷¹ Simon Iskariot asa kupa Juda rella Jisu in mahtrongi asonpei, alamva somleinih ankaarna inkht in amahta ajurhsam.