JOHN 2 - Akthar Trongirhna (BSI)

Kana a Changvaang

¹ Nijanthum tihpia Kalili na Kana a changvaang inkhat am, Jisu anukho mahchunna injao.

² Changvaang achunna Jisu kho, aroieikho ankouhpei.

³ Chunna ngangli atuii avaat inva Jisu anuin amahkuunga ason, “Anmah ngangli atuii thangsa.”

⁴ Chunna amahta ason, “Kumeio, nangleh keiin itlohtuphu jangamme? Keitu lai thlengnohmang.”

⁵ Amah anuin roijuih ankuunga asonei, “Amah in nankuunga nanison nanisonkha tlohve.”

⁶ Judi ei heikoh a maseengna khuuthloubeel kuruk mahchunna amithrun, beel inkhat khat a litar reijavak chal.

⁷ Jisu in anmahta asonei, “Khuuthloubeel anaamtea tuii masipve.” Che anmah in khuuthloubeel anaamteta tuii amisippei.

⁸ Che amah in ankuunga asonei, “Pekva nannih in suuk a buhdoon antong amrel mii ninga heivesa.” Che mahchu anheipei.

⁹ Mahchuta buhdoon antong amrel mii in amtem in ngangli tuii veisa, mahchu ramnata anthlenme romnoh (khuuthlou beelnata aksuuk roijuih khop in mahchuta anromning) buhdoon antong amrel mii in changrita aong,

¹⁰ che amahta ason, “Mii in matsah a aktuita ansemmaan; mahchuta inkhopseima antihlai tuinohbebta ansemmang; chuta nangva akthra nganglituiita pekphah nisihmang.”

¹¹ Mah i Kalili vaa Kana a Jisu in matsahrem ampaang daangsa, chunna amah paarthrata amdangpei; che aroi in amahta amilotpei.

¹² Mahchu aknua anu, anao mahche aroi eisoh Kaparnaum a jungsei; che ohkhanna anmah in nikhat ninih nichuunga amsei.

Jisu in Mathruunna Thlaamma Seh

¹³ Judi ei laalna buhdoon aphahlai, Jisu in Jerusalem a hangsa.

¹⁴ Mathruunna thlaamma siilchal, sadam, mahche khuinu juura khatkho inbok a baobeh khoia an amlaia antuukpiei.

¹⁵ Mahchunna Jisu in ruisung seemma, siilchal, sadam, mahche anaamteta mathruunna thlaamnata amnomei, che baobeh apum ankhoihna anmah tebor anaamteta achung athlang amlatpei.

¹⁶ Che khuinu akjuureita asonei, “Mah naamte i loukirve; nannih in Keipa innta baobeh malatna inn maveinohve.

¹⁷ Keiinna mah nantlohthlou irella kiril sok a kaangsang” ta ringjih a injihkha amah aroi in inthiehsei.

¹⁸ Mahchunna Judi ei in amahta anson, “Mah thlou nitloh in kankuunga jaknang daang nammuhsam ungme?”

¹⁹ Jisu in ankuunga amsangei, “Mah mathruunna thlaam i mamaangve, mahche keiin nithumma kiseemtu.”

²⁰ Mahchunna Judi in anson, “Mah mathruunna thlaam i anseemna kum soplilei kuruk luut, mah chunangin nithum suunga niseemchek ume?”

²¹ Chuta Jisu inva amah akseeng aruungta asonna.

²² Alamchunna Jisu in thinata aringlai, amah aroi in maita asonna naita intheihsei; chunna anmah in ringjihkho mahche Jisu in asontrongta amilotpei.

Jisu in Miihoongta Arom

²³ Ipek Jisu in Jerusalem a laalna buhdoon suunga amlai, amah in daang jikcha atlohta anmuh in, amah akminga mii jikcha in amahta amilotpei;

²⁴ chuta Jisu atak inva anmah ankuunga malotna amnoh,

²⁵ alamva annaamteta aromei che tunangkhat in aktleiturel sakhi malanna amnoh alamva amah in miiril suunga amkha jangme arom.