JOHN 17 - Akthar Trongirhna (BSI)

Jisu in Aroi Turel Angen

¹ Jisu in mah ita atrongche, ringramta intouva anche ason, “Pa, lai i thlengsa; Nisa kupata paarhtra maveiro mahche Nisakupa inkho nangta paarthra amveinatu,

² nangin miinaamtetu tuui namlannanga, ache amnoh chaankho akuunga malanro.

³ Mahche akchim Ringpu inkhatruta che nangin namthlah Jisu Khrista ta anmah in anromnatu, mah i ache amnoh chaan khasa.

⁴ Keiin kitlohnatu thloukha kikuunga namlan angkha kimchepeia, thaleichunga nangta paarthra kamliin peiche;

⁵ Che ipekva Pa, tukleiram seemnoh amaa a nangsoh inruuia kei paarthra louam khanna nangkuunga keita paarthra kamveiro.

⁶ “Tukleiram nata kikuunga namlanmii ankuunga keiin nikmingla kamdangpei; anmahchuva nangtasei, mahche nangin anmahta kikuunga namlan peiang, che anmah in nitrongta antak ah ansihpei.

⁷ Ipekva nangin bilam kikuunga namlan anaamte; nangtingna ta anmah in anrom;

⁸ alamva nangin kikuunga namlan trong eita anmah kuunga kamlanpei, chuche anmah in mahchuta louloua, keiin nikuungnata thlengsang ta anmah inkho chimma anrompei, mahche nangin keita namthlah angta anmah inkho amilotpei.

⁹ Keiin anmah turella kingen; keiin tukleiram turella ngennoh ang, chuta nangin kikuunga namlan anmah turelna, alamva anmahva nangnitasei,

¹⁰ Kei kita anaamte i nang nitasa, che nang nimii eikho kei ktasei, che keiin anmahninga paarthra kphahpei.

¹¹ Che ipekva kei tukleiramma amnoh usang, chuta anmahva tukleiramma am umangei, che kei nikuunga thlengsang. Akseeng Pa, inih in khalek iveinanga anmahkho anveinatu, kikuunga namlan anmahta nangminga kem eiro.

¹² Keiin anmahsoh kiamlaiva, kikuunga namlanche anmahta nang nikminga kikemmei; che keiin anmahta kikoollei, ringjih trongkha atlungnatu akmaangvaa asa kupa khanoh a, anmah tukhatkho maangnoh ei.

¹³ Chuta ipekva kei nikuunga thlengsang, che anmah antak a kei kroomthok mathlungnatu keiin tukleiramma trongsang.

¹⁴ Keiin nang nitrongta ankuunga kamlanei; che tukleiram in anmahta intirhsei alamva keiva tukleiram nanoh ang mah khananga, anmahkho tukleiram nanoh ei.

¹⁵ Keiin anmahta tukleiram nata lou eirota nikuunga ngennoh ang, chuta anmahta thranoh khannata kem eirota kingenche.

¹⁶ Keiva tukleiram nanoh ang mah khananga, anmahkho tukleiram nanoh ei.

¹⁷ Anmahta akchimma maseeng eiro; nang nitrongva akchim.

¹⁸ Keita tukleiramma namthlah angkha mah khananga keiinkho anmahta tukleiramma kamthlah ei.

¹⁹ Alamva anmahta akchimma inkatnatu, anmah rella kei kitakho inkatsang.

²⁰ “Anmah relna khop keiin ngennoh ang, chuta anmah antrong apaalla keita kamlot anmah turelnakho kingen,

²¹ Mahche anmah annaam khalek anveinatu; nangin keita namthlah angta tukleiram in amilotnatu, Pa o, nangin keikuunga che keiin nikuunga kiam nanga, anmah inkho nikuunga an amnatu keiin kingenche.

²² Inih in khalek iveinanga anmah inkho khalek anveinatu, kikuunga namlan paarthrakha keiin anmah ankuunga kamlanpei,

²³ Keiin anmah kuunga che nangin kikuunga niam anmah in mapungpha a khalek veinatu relna, chunna nangin keita namthlah peiang che niril namvol peiang, mah khananga anmahta nangin nirilvolsei ta tukleiram in aromnatu relna.

²⁴ Pa, tukleiram mathronnoh amaanata nangin keita niril namvol anga, nangin kikuunga namlan paarthra khata kikuunga namlanmii ankuungakho amnatu, kei kiamna aphomma anmahkho keisoh amjou kikdit.

²⁵ Akchim Pa, tukleiram invah nangta nakromnoh ei, chuta keiinva krompeiche; che nangin keita namthlah angta anmah inkho anrompei.

²⁶ Nangin keita niril namvol angkha anmah ankuungakho amnatu, che keiin anmah ankuungakho kiamnatu, nang nikminga anmahta kamrompei ei, chela kamromla umangei.”