JOHN 13 - Akthar Trongirhna (BSI)

Jisu in Aroi Ankehta Achaam

¹ Ipek laalna buhdoon amaa a, Jisu in tukleiram nata Apa kuunga ansehnatu pungkha thlengsa ta aromlai, tukleiramma ak am amiieita arilvolsei, achena phah a anmahta arilvolsei.

² Che anmah in buhdoon ansaaksuunga, Simon asa kupa Judas Iskariot arilsuunga Jisu ta ajurhnatu seitan in chuungsa.

³ Jisu Apa in anaamte akut a amlanpei khatkho Ringpu kuungnata thlengsang che Ringpu kuunga sehla usang ta aromin,

⁴ buhdoonnata inthoua, apuunta akomma asihche amah anaamta puunthreh ah inraaksa.

⁵ Cheva kuteenga tuii asuungche, aroi ankehta chaam amthronpei, che anraakna puunthreh a anuulei.

⁶ Amah in Simon Pitar kuunga thlengsa; che Pitar in akuunga ason, “Akpu, nangin kikehta nichaam samme?”

⁷ Jisu in akuunga amsang, “Keiin kitlohsam i ipek nangin romnohche, chuta aknua nirom umang.”

⁸ Pitar in akuunga ason, “Nangin kilehta chaam janohluungtu.” Jisu in akuunga amsang, “Keiin nikehta nakchaamnoh angleva nangva kei kiroinohche.”

⁹ Simon Pitar in akuunga ason, “Akpu kikeh khop noh chuta kikutleh kikangkho.”

¹⁰ Jisu in akuunga ason, “Tuii insilche mii khavah chaamnatu darkaar amnoh, akeh khopta inchaam uning, chuta amahvah anaamtea seengsa; che nannihva seengsachou, chuta nannaamte vanohchou.”

¹¹ Alamva amahta akjuursam atak in arom; mah kharella amah in ason, “Nannihva nannaamte seengnohchou.”

¹² Anmah ankehta achaamche, apuunta alohpei, che anbokna a veikhat inbok a anmahta asonei, “Keiin nankuunga kitlohthloukha nanromme?

¹³ Nannih in keita Lulok mahche Akpu ta nan ongang; nannih chimchou, alamva kei i amahtalsang.

¹⁴ Chunna keiin nannihtu Akpu mahche Lulokho veia, nankehta chaamsangle, nannihkho khatleh khat nankeh inchaamve.

¹⁵ Alamva keiin nankuunga kitloh kikhal khananga, nannihkho nantloh nankhalnatu athlou veia kammuhpeichou.

¹⁶ Keiin nankuunga atak a kisonchou, ‘Roijuih inkhat in amah Akpuchunga ralla liinnoh; che akseh inkho amahta amthlah chunga ralla liinnoh.’

¹⁷ Mah kisonita nannih in romchoule, che maita tloh chouleva nannihva doiphah veisachou.

¹⁸ Keiin nannaam turel trongnoh ang, keiin kacharkha keiin krom; mah chuvah ringjihkhata atlungnatu, ‘Keitol aksaa amah in keita kandah a kichunga akeh athoongpei.’

¹⁹ Mah i asuuknoh maa a, ipek nankuunga kisonpeichou, chunna mahchu asuuklaiva keisang tihkha nannih in keita namilotnatu mah thloui kitlohpei.

²⁰ Keiin nankuunga atatak a kisonchou, ‘Keiin tukhat kamthlahmii khata ja a aklou mii in keita kanloh peiang; che nannih inta keita keilou choule keita kamthlahmii khata nanlohpei.’ ”

Jisu Anjurhsam in Atakta Matsah Aphoong

²¹ Jisu in nga tloh a atronglai, amah akli khalmo lahsa, che sakhi malanna ason “Keiin taktak a kisonchou, nankaarna inkhat in keita keijurhtung.”

²² Amah in tukuunga trongme anromnoh in, aroi in khatleh khat in ansei.

²³ Jisu in aroi ankaarna arilvol inkhat in Jisu avonna inbeia am.

²⁴ Chunna Simon Pitar in akuunga inruk a ason, “Amah in turella trongme, ruiro.”

²⁵ Chunna Jisu avonna inbeia am mii in akuunga ason, “Akpu, mahmiichu tume?”

²⁶ Jisu in amsang, “Keiin tol akir phuumma kamlansam mii khasa.” Nga tloh a amah in tol akirta aphuumche, Simon Iskariot asa kupa Juda ta amlanpei.

²⁷ Tol akirta amlanche aknua, seitan in akuunga luutsa. Jisu in akuunga ason. “Nitlohsamchu inthademma tlohrosa.”

²⁸ Mah i jarella amahkuunga asonme ta ipek tebor a anbok tukhat inkho romnoh ei.

²⁹ Alamva Juda vah skhao aksih taningva. “Ujou hoongna turella inihtu darkaar am leiro,” chunohle anranriing kuunga malanrota Jisu in akuunga asonbrata arouin amidon.

³⁰ Chunna tol akirta alohche, kak hanga amah in inthruhsa; mahchu khulouh na.

Akthar Trongthuun

³¹ Amah in anthruhnua, Jisu in ason, “Ipek miivaa Asa kupata paar amthratpei, che amah apaalla Ringpu ta paar amthratpei;

³² Che Ringpu vaa paarthrata amah apaalla madangle, chuleva Ringpu in miiva Asa kupata atak in kak hanga paar amthrattu

³³ Andih naoeio, lai kaksuunga nannihsoh amjousang. Nannih in keita nanjontung; che Judi ankuunga keiin kisonnanga keiin ipek kisonchou, ‘Keiin kisehna samma nannih in thlengcheknoh uchou.’

³⁴ Akthar trongthuun khat keiin nankuunga kamlanchou, mah chuvah keiin nannihta kirilvol nangchoua, nannih khatleh khat ril involve

³⁵ Nannih inta khatleh khat ril involchoule, miinaam in nannih i kei kiroi chouta naniromtu.”

Pitar in Andahsam Jisu in Matsah Aphoong

³⁶ Simon Pitar in amahta ason, “Akpu, ram sehsam cheme?” Jisu in amsang, “Keiin kisehna samma nangin keijuih cheknoh uche, chuta aknua nakjuih umang ang.”

³⁷ Pitar in amahkuunga ason, “Akpu, jarelna keiin ipektal nakjuih cheknoh tungme? Nangturel keichaan kamthlahtu.”

³⁸ Jisu in amsang, “Keiturel nichaan namthlahchek ume? Keiin nikuunga atak a kisonche, nangin keita nandahna veithum aphahnohmiil, aarkhong in khak inkhuungnohtu.”