JOHN 10 - Akthar Trongirhna (BSI)

Sadam Kemvaa Pandam

¹ “Keiin nankuunga atatak a kisonchou, ‘Tunangkhat in sadamkon thonga luutnoh a, apangtinga kalla akluut miikha inru inraansa;

² chuta thonga akluut miikhava sadam kemsa.

³ Amahturel thong akngaak in thong amhoong; sadam in amah ahou antheih, che amah sadam eita anminga a ongei.

⁴ Amah sadam eita ankonnata amthruhlai, anmah anmaa a seh, che sadam in amah aknuta anjuih, alamva amah ahouta anrom.

⁵ Aktleina akthleng miivaa aknu juihnohtuei, chuta aktlei mii ankuungnata tlaantuei, alamva anmah in aktleinata akthleng miiva ahou romnoh ei.’ ”

⁶ Mah pandam i Jisu in ankuunga huuina a asonei, chuta anmah kuunga asonkha loutheinoh ei.

Jisu vah Akthra Sadamkem Khasa

⁷ Chunna veikhat inlenga Jisu in ankuunga asonei, “Keiin nankuunga atatak a kisonchou, keiva Sadamkonvaa thong khasang.

⁸ Kei kmaa a akthleng annaamte inru inraan sengei; chuta anmah anhouta sadam in rungainoh ei.

⁹ Keiva thong khasang; tungangkhat in keikuunga luutleva, amahta kakaltu, che amah in sehloonna meiphul asaakna aktuuktu.

¹⁰ Inrumii in amruknatu, thatnatu mahche ammaangnatu noh a thlengnoh; anmah in akring anphahnatu keiin thlengsang, mahchu inleisolh a anphahnatu.

¹¹ Keiva akthra sadamkem khasang. Akthra sadamkem in amah sadam turel achaan amthlah.

¹² Baobeh akthrulh, sadamta kemnoh mii in, uiiramuiipii athleng amuh in sadamta eia atlaan; che uiiramuiipii in sadamta eita a atlaanei che heihei akthek ei.

¹³ Amah in tlaanna amah ei alamva amahvah baobeh akthrulh miining mahche sadam turelva akirkho aril maluutnoh.

¹⁴ Keiva akthra sadamkem khasang; kei sadam eita ansak kromei che anmah inkho keita kanromang,

¹⁵ Pa in keita keirom khananga, keiinkho Pa ta krom; chunna kei sadam turella kichaan kamthlah.

¹⁶ Kei sadam akonna ak amnoh aktleiakho kei sadam ammei; anmahkho keiin kithlentuei, che anmah in kei kihou antheihtu. Mahchunna sadamlom inkhat mahche sadamkem inkhat vei tuei.

¹⁷ Churella Pa in keita keirilvol, alamva kei kichaan kamthlahpei mahchuta veikhat inlenga kaphahnatu.

¹⁸ Tukhat inkho kikuungna chaan lounoh, mahchu kitakrouin ja a kamthlah. Kei chaanta kamthlahnatu kei kituui am, che mahchu veikhat inlenga klohnatu tuuikho am; mah trongthuun i Pa tingnata kphahpei.”

¹⁹ Mahtrong irella Judi ankaar a veikhat inthrek inbaak suuklasei.

²⁰ Anmah aktam in anson, “Mahmii i khousaar chuunga innahsa; jarella atrongta nanrungeihme?”

²¹ Aktlei in anson, “Mah i khousaar chuung mii inkhatva atrongnoh. Khousaar in mitchota ammuhchek ume?”

Jisu ta Anjanoh

²² Aknu achunna maithruunna Thlaam Katna buhdoonkha Jerusalemma suuksa.

²³ Mahchu phalbia tla, che Solomon vaa mathruunna thlaam innmuk a Jisu in sehsa.

²⁴ Chunna Judi in Jisu ta kooia anngrihche anson, “Nangin kannihta jikcha soot a namsimna umangungme? Nangin Khrista chele kankuunga seenga kanisonrosa.”

²⁵ Chunna Jisu in ankuunga amsangei, “Keiin nankuunga kisonpeichou, che nannih in keita kamlotnoh sachou. Keiin Pa akminga kitlohthlou anaamte, kei turella sakhi amlan;

²⁶ chuta nannih in keita kamlotnoh sachou, alamva nannihva kei Sadam nohchou.

²⁷ Kei Sadamtva kihou antheih, keiin anmahta kromei, che anmah in kei kiknuta kanjuih ang;

²⁸ che anmahta ache amnoh akring kamlanei, mahche anmahva tikniakho maangnoh usei, che anmahta tukhat inkho kikutnata keisutnoh tuei.

²⁹ Anmahta keikuunga amlan Pa in aktlei naamte chunga akliin, che tukhat inkho anmahta Pa kutnata sut cheknoh tuei

³⁰ Pa leh keiva inkhat ningung.”

³¹ Veikhatla Judi in amahta andennatu lung anchunpei.

³² Jisu in ankuunga amsangei, “Pa tingnata akthra thlou jikcha nankuunga kammuh peichou; mahsuung akhanna jarella keita lung nandensam angme?”

³³ Judi in amisang, “Akthra thlou nitloh kharella nangta lung nakdeennoh ung chuta Ringpu ta leem manuih a nitrong kharelna; alamva miikhatcheta nitakta Ringpu namvei.”

³⁴ Jisu in ankuunga amsangei, “Mah i nannih trongsuura injhinohme, ‘Keiin kisonchou, nannihva rappunoh choume?’

³⁵ Ringpu trong akthlengta amah in rappu ta ongle (ringjihva koii cheknohtu),

³⁶ keiturelva Pa in maseenga tukleiramma kamthlah peiang, che ‘Keiva Ringpu Asa kupa ang’ ta kisonlai khatloh a nannih inla nangva Ringpu ta leem manuih a trongche nantih angme?

³⁷ Keiinta Pa athlouta tlohnoh angle, chuleva keita kamlotnohve;

³⁸ mahchuta keiin tloh angle, nannih in keita kamlotnoh choulakho, Pa in keikuunga am mahche keiin Pa kuunga ammangta nanromnatu che romma amahkuunga nan amnatu kthloukha malotve.”

³⁹ Veikhatla amahta ansuurnatu insuulsei, chuta ankutnata inlitsa.

⁴⁰ Chunna Jisu in Jordon araalla John in matsah a alupna amunkhanna veikhat inlenga mahchunna amsa.

⁴¹ Amahkuunga mii khalmo thlengei; che anmah in anson, “John va daang jakhatkho tlonoh, chuta mahmii irella John in asonva chim.”

⁴² Ohkhanna miitam in Jisu ta amilotpei.