JEMS 5 - Akthar Trongirhna (BSI)

Akdoon Ankuungah Matrit

¹ Pek thlengve, kdoon eio, nanchungah khalmo klah knang thlengsam taningva trapve che ongve.

² Nandoon nankhaal kthusa mahche nanpuun nanrei veithra in asaakpei.

³ Khatkho nannih ra–ao mahche harngou koolhing kalsa, che mah koolhing khanna nannihta naniandahna sakhi veitu. Mah in oinanga nanruungta nanisaaktu. Nannih in acheni natu lalta nanpeipei.

⁴ Anve, nannih nanlouvah thlou tlohna kutlang aman malandah a nansihkha nannih nanlouvah ong inga kutlangman kanipeveta aanga ammeikha Akpu kuungah tlungsa.

⁵ Nannih in thaleichungah inlek inlik a che nanril mathlanna amchou; thatnatu akni athlengsam khanna nanrilta manoua amchou.

⁶ Nannih in akchimlamseh eita namilaalpei, che nanthatpei; mahkha amah in nanithingnoh.

Soot Doutrang che Ngen

⁷ Alamchunna unaoeio, Akpu in athlengnohmiil doutrangve. Anve, thaleichungah khalmo amanchaal chi akrahta luhnatu loutloh mii in gaak a am, amah in anrang khatkho akthil khuta athlengnohmiil doutranga ngaaklipnoh a am.

⁸ Nannihkho doutrangve, nanril chet a ngirve, alamva Akpu in athlengsamkha innaisa.

⁹ Unaoeio, nannihta pichaar nanitlohnoh natu nannih inkhat in in khat chungah in andah insihnohve; anve, pichaar Akpu in innkhaara ngirra am.

¹⁰ Unaoeio, Akpu ningah aktrong ringraan in anlah annangkha mahche doutranga antloh ankhal antak ah aksuukha nantak a pandam veia louve.

¹¹ Anve, chet a akdouchekha mii eita inih in tlan akphahta iongei. Job in khalmo adouchek nannih in nantheihpei che Akpu in atlohsam thloukha nannmuhpei, Akpu i jikchah phah mii machaal khatkho rilvoltheih meio.

¹² Chuta mah naamte chunga ringram, thalei nohle aktleita sonna trongchet malanna seita tlohnohve, chuta nannih in oi tihchoule oi tihve, indah ang tihchoule indah ang tihve, mahchuvah maraaltinga nannih in nantlaknoh natu.

¹³ Nannih nankaara tunangkhat klah knang akphah amchouma? Amah in ngenso. Tukhat in roomthok a tlanchouma? Amah in mapaakna laa tlohso.

¹⁴ Nannih nankaara tunangkhat kna ksachouma? Amah in khakla anpaeita ongso, che anmah in Akpu minga thao teia amahturel ngen eiso;

¹⁵ malot a ngenva aknakhata akaltu, che Akpu in amahta amthrattu amah inta alehthlou tlohle amahta Akpu in a iptu.

¹⁶ Alamchunna kna nanimthrat natu khatleh khat nanleh inson inphoong choulaia, khat in khat turella ngenjouve. Akchimlamseh mii in angenva thlou khanna atuui trang.

¹⁷ Elijah kho mii inihnang inihsoh intrim, amah in khu asuur noh natu aril luut a angen; chunna kumthumle thla kuruk phah thaleichunga khu suurnoh.

¹⁸ Mahchuche veikhat inlenga amah in angenla ringram in khu amlan, che thalei in chi amrahpei.

¹⁹ Kiuh kinaeio, nankaarna tukhat in akchimnata invaia sehle, che tunangkhat in amahta veikhat inlengpile, Akpu in amah alehta a ip tih i atak in romso.

²⁰ Alehchel mii khat in chimnoh lamma sehta tunangkhat in inlengpia thlenle akthlen miikhan li inkhat thita akalpei mahche aleh chachahta a iptu tih i amah in romso.