JEMS 4 - Akthar Trongirhna (BSI)

Tukleiramsoh Inpaijou

¹ Raal in jangamsuukme, mahche nannih nankaara innah insuul suuk in jangamsuukme? Nannih nankaara raal suukchou i nannih in nanditta mapelnatu nansuul khannata amsuuk nohme?

² Nannih in divah nandit, chuta phahnohchou; nannih in mii nanthat, miita kallakchou, chuta phahvah cheknohchou; nannih in inkhon inraanchou, chuta nannihtu amnoh, alamva nannih in nihnohchou.

³ Nannihche phahnohchou, alamva nannih in chimnoh a nannih, mah nannihkha nanditna lamkhanna nanhuuinatu nannih.

⁴ Malotnoh miieio! Tukleiramta inpaipi i Ringpu soh jekna vei tih i romnoh choume? Alamchunna tunangkhat in tukleiramsoh anpaijale atak anrouta Ringpu ta amah jekna amveipei.

⁵ Chunohle ringjih ah, “Inih isuunga ak am li in kallakho khalmo akdit” ta amah in asonni sulningta namidonme?

⁶ Chuta amah in ralla malungsi inimlanpei. Churella amah in ason, “Ringpu in in orhta athing, chuta inruruh miikuungah malungsi amlan.”

⁷ Alamchunna nitak pumte Ringpu kuungah masilro. Rappu ta louthingro, cheleva amah in nikuungnata tlaantu.

⁸ Ringpu kuung innaive che amah in nankuungah innaitu. Aleh am eio, nankut maseengve nanril innih amthring miieio, nanril maseengve.

⁹ Klah knang veive, marhuuive, che trapve. Nannih in nannuihkha marhuuitinga mathlengve mahche nannih in nanroomthokha klah knangting thlenve.

¹⁰ Akpu amaikuungah nantaksaak inruruhve, che amah in nannihta nanimliintu.

Khristen Unao eita Andah a Pichaar Tlohrella Matrit

¹¹ Unaoeio, nannih khat in khat chungah thranoh a trongnohve. Amah unaochungah thranoh trong mahche amah unaota pichaar tlohle, amahvah trongsuurta thranoh a trong sache trongsuurta pichaar atlohpei. Chuta nangin trongsuurta pichaar tlohchele, nangva trongsuurta amjuih miinohche chuta nangva trongsuurta pichaar aktloh mii che.

¹² Trongsuur amlan mahche pichaar aktloh mii khat am, amahva miita kalkho achek mahche manangkho achek. Chuta nanthringpi miita pichaar aktloh nangva tucheme?

In orh Noh natu Matrit

¹³ “Mi in nohle tungva ah inih in mah khuuboom khanna seh a ohkhanna kumkhat amma inbaobeh imlatche ichuungnatu ithrultu” tih a aksoneio, pek thlengve;

¹⁴ Tungva jangvei ume nannih in romnohchou. Nannih nanchaan i jangme nanromme? Alamva nannihvah lai kaksuunga andang che kmaang sumphai sachou.

¹⁵ Mahchu chunga, “Akpu in amdon veile mah i itlohtu” ta nannih in nanson tupot.

¹⁶ Chuta nannih in kthoi kliinna in orhchou. Mainang kthoi kliin naamte thranoh.

¹⁷ Tunangkhat in akchimthlou tih a aromche amah inta tlohnohleve, mahchu amah kuungava aleh veisa.