JEMS 3 - Akthar Trongirhna (BSI)

Malei

¹ Kiuh kinaoeo, inih in ralla akrik pichaar iphahsam irom taningva nankaarna miitam in lulok veinoh eime.

² Alamva inaamtein isoina jikcha am, tukhat in tronga asoina amnohle amahva mapungpha miisa, che amah aruung pumtekha kut inchal achekpei.

³ Inih in ison amijuih natu skolbao a kool ahang imluk; chunna skol in isonta amjuihnatu inih in anbaoa thir imluk a aruungpumte inih in ching ichek, chunna atak apumteta matuh a inphurhjana ah phurh ichek.

⁴ Muli eikho anve, khalmo liin seilakho aktrang thli in anmahta raanna phurh seilakho mulita machimnava mulisung apaalla akthoumii in amsehjana thloua maseh achek.

⁵ Chunanga malei i andih akholkhat, chulata khalmo liin thlou rella in orh. Meitrek indihte in akliin kumaangta kaang achek!

⁶ Maleiva mei. Chimnoh lamma inisehpi tukleiram, mah i inih iruungsuungah akhol khattu veia meia inihaal mahche repnang in meia inithlak.

⁷ Mah chuvah alam jikchana sa va ei, anvonna intolla akseh ei mahche tuiiboom suungah akring, anmahta mii in madam ichek ei khatkho madamma thlengme,

⁸ chuta tukhat inkho maleiva madam cheknoh–amahva thranoh a amning, maleivah thihnatu tuur in sip.

⁹ Malei in inih Pa Akputa impaakna, mahche malei in ringpu ahoonga aseem miita phool itlohna.

¹⁰ Mapaak mahche phool tloh i nar khannata thleng. Kiuh knaoeio, mainang veinoh tupotchou.

¹¹ Dop anthruhna khalek a akthlumle inkha inpoolla inthruhnoh?

¹² Kiuh kinaoeio, thotthing akuunga chorphol inrah ajame? Nohle nanglirah aruia thotthing inrah ajame? Mahchunanga dop khatnata machihtuii mahche akthlumtuii mathruhjou cheknoh.

Achungtingna Lousing

¹³ Nannih nankaara aksing mahche akrom tu amchoume? Amah in lousingta inruruhsoh inruuia amah athlou anaam akthra chaan aringna ah madangso.

¹⁴ Chuta nannih nanrilla inkhah a kallak mahche akroutukhop insuulna madonchoule, thoinohve, akchim turella chimnoh trong trongnohve.

¹⁵ Mainang lousingi achung tingnata thlengnoh, chuta thaleina, akseengnoh che rapputingna.

¹⁶ Alamva kallak am mahche akroutukhop thrulh mainang amna ah inhaltlam khatkho thranohthlou anaamte am.

¹⁷ Chuta achung tingnata thleng lousingvh matsah a akseeng, mahchuche leh oi, ril tap, inthup amnoh, khatleh khat inrom, rilvoltheih che akrah thra, ril intluunnoh amnoh khatkho seengnoh amnoh.

¹⁸ Mahche akchimlamseh akrahva leh oi amlan mii in leh oi avorh.