JEMS 2 - Akthar Trongirhna (BSI)

Achaknoh Thlouta Tlohnohnatu Matrit

¹ Kiuh knaoeio, inih paarthravaa akpu Jisu Khrista ta malot i keimii miimii manaia malotnoh.

² Alamva nannih in nanboomna ah ra–ao kutsi thunna che khalmo innaal puunrei silh mii khat thlengle, che akbuur puunrei silh a inran khatkho thlengle,

³ mahchu nannih in khalmo innaal puunrei aksilhta nansonnohme, “Mah akthra phom in inbokro,” che anran miikuungah, “Nangva ohkhan ngirra amro” nohle “Keiin kikchilhna a inbokro” ta sonchoule,

⁴ nankaara nanroua miisak miimai anna thlou nantlohnohme, che thranoh ril madonna pichaar aktloh veinoh choume?

⁵ Kirilvol unaoeio, rungaive, Ringpu in tukleiramma anraneita malotting amdoonnatu che anmahta arilvol ankuungah amlannatu trongchet atlohche kurung huunna ah lalchun anveinatu anmahta acharnoh eime?

⁶ Chuta nannihva inran miita injahnohchou. Akdoon in nannihta naniroii nohme mahche anmahtal in pichaar koolla thrulh thrulh a nanikainoh eime?

⁷ Nantakchungah naniongna injahna mingta anmah in manuih a trongnoh eime?

⁸ Ringjih nujuih a, “Nangin nanthringpita nitaktal nanga rilvolro,” kurungvaa trongsuurta tak a mathlung choule nannih in thra nantlohpei.

⁹ Chuta nannih inta miisak miimai manaia madangchoule, nannih in alehthlou nantlohpei, nannih in trongsuurta khoi veia trongsuur in nanimlaalpei.

¹⁰ Alamva tukhat in trongsuur pumte ngaak a seh ang atihche, alamkhat ah acheknohna veile, amah in anaamte alaalna veisa.

¹¹ Alamva amah in ason, “Miimei miisa laalnohve,” che asonla, “Mii thatnohve.” Nangin miimei miisa laalnoh chele chuta mii thatchele, nangin trongsuurta akhoi veisache.

¹² Chunna thlaang thlaangna trongsuur thlanga pichaar atlohsam amtaningva nannih in trongkho trongve che athloukho tlohve.

¹³ Alamva miikuungah rilvoltheih mamuhnoh amahmii khata rilvoltheih jaonoh apichaar atlohtu; rilvoltheih in pichaarta achek.

Malot Khatkho Athlou Veia Tloh

¹⁴ Kiuh knaoeio, tukhat in keiva malot ammang atihche athlouta jaonohle amahtu achuunga jangamme? Amah in amlot khanna amahta kal achekume?

¹⁵ Tunangkhat in amah uhte kupa nohle uhte kumei khat in puunrei nohle akni aknitu asaak a iintuphu amnohle,

¹⁶ che nankaarna mii khat in anmahningah, “Leh oia seh loonve, nantak malumve mahche nanvon mavahve” atihche anmah anruungtu akanata malannohle jangachuungna amme?

¹⁷ Mahchunanga malotkho athlouta jaonohle na thiuning.

¹⁸ Chuta mii khat in asontu, “Nangkuungah malot amkha athlou jaonoh” a keikuungah kammuhro, che keiin kamlotkha athlou veia nikuungah nanmuhtang.

¹⁹ Ringpu khatning tih a nangin namlot; nangin namlotkha thrasa. Khousaarluung inkho amilot che dir dirta inchuunei.

²⁰ Kboih a amdon nango, athlou jaonoh a malotva akrah amnoh tih i nangin nimuhjame?

²¹ Inih Pa Abraham in asa kupa Isaak ta thiilkuungah akatlaikhan, amahta thlouin amchimnohme?

²² Malot khanna amah athlousoh inruuia atlohpijou ta nangin nirom, mahche thlouin malotta mapung ampha.

²³ Ringjih in asonkha tlungsa mahchuva, “Abraham in Ringpu amlotpei, che amahta akchimlamseh ta ateenpiei.”

²⁴ Mii khat in malot khop noh a amah athlouin amchim ta nannih in nanrom.

²⁵ Mahchunanga aruung juura inbaobeh akthrulh Rahap in pao akphurhmii eita amah in louloua, asihche anmahta aktlei lamting matheih a amseh eikha, athlouin amahta amchimnohme.

²⁶ Alamchunna li jaonoh ruung in kthinanga, athlou jaonoh malotkho mahchunanga kthining.